07-Mar-2022

ବରଗଡ(ନିରଞ୍ଜନ ତ୍ରିପାଠୀ) : ବରଗଡ ପୌରପରିଷଦ ନିର୍ବାଚନ ପାଇଁ ଆଜି ନାମାଙ୍କନ ପତ୍ର ଦାଖଲର ଶେଷ ଦିବସ ହୋଇଥିବାବେଳେ, ସମସ୍ତ ଦଳ ଆଜି ନିଜ ନିଜର ସମର୍ଥିତ ପ୍ରାର୍ଥୀ ମାନଙ୍କର ନାମାଙ୍କନ ପତ୍ର ଦାଖଲ କରିସାରିଛନ୍ତି | ବରଗଡ ପୌରପରିଷଦରେ ୧୯ ଗୋଟି ୱାର୍ଡ ରହିଥିବାବେଳେ ସମସ୍ତ ୱାର୍ଡ  ପାଇଁ ଏବଂ ପୌର ପରିଷଦ ଅଧ୍ୟକ୍ଷା ଆସନ ପାଇଁ  କଂଗ୍ରେସ ଦଳ  , ବିଜେପି ଦଳ ଓ ବିଜେଡି ଦଳ ସମସ୍ତ ୱାର୍ଡ ମାନଙ୍କରେ ନିଜ ଦଳୀୟ ପ୍ରାର୍ଥୀମାନଙ୍କର  ନାମାଙ୍କନ ପତ୍ର ଦାଖଲ କରିଦେଇଛନ୍ତି ।

  ଅନ୍ୟପଟେ ଆମ ଆଦମୀ ଦଳ ମଧ୍ୟ ୪ ଗୋଟି ୱାର୍ଡ ରେ ୱାର୍ଡ ମେମ୍ବର ପାଇଁ ପ୍ରାର୍ଥୀ ଦେଇଥିବାବେଳେ ପୌର ପରିଷଦ ଅଧ୍ୟକ୍ଷା ପଦବୀ ପାଇଁ ମଧ୍ୟ ପ୍ରାର୍ଥୀପତ୍ର ପ୍ରଦାନ କରିଛି ।
 ତେବେ ଆଜି ପର୍ଯ୍ୟନ୍ତ ବରଗଡ ପୌରପରିଷଦ ନିର୍ବାଚନ ପାଇଁ  ୧୯ ଗୋଟି ୱାର୍ଡରେ , ୱାର୍ଡ ମେମ୍ବର ଆସନ ପାଇଁ ସମୁଦାୟ ୬୯ ଜଣ ପ୍ରାର୍ଥୀ ଓ ପ୍ରାର୍ଥିନୀ ନାମାଙ୍କନ ପତ୍ର ଦାଖଲ କରିଥିବାବେଳେ ପୌରପରିଷଦ ଅଧ୍ୟକ୍ଷା ଆସନ ପାଇଁ ସମୁଦାୟ ୧୨ ଜଣ ପ୍ରାର୍ଥିନୀ ପ୍ରାର୍ଥୀପତ୍ର ଦାଖଲ କରିଛନ୍ତି | 

ଅଧ୍ୟକ୍ଷା ପଦବୀ ପାଇଁ ସମୁଦାୟ ୧୨ ଜଣଙ୍କ ମଧ୍ୟରୁ ୭ ଜଣ ସ୍ଵାଧୀନ ପ୍ରାର୍ଥିନୀ ନାମାଙ୍କନ ପତ୍ର ଦାଖଲ କରିଥିବାବେଳେ ସମୁଦାୟ ୬୯ ଜଣ ୱାର୍ଡ ମେମ୍ବର ପ୍ରାର୍ଥୀଙ୍କ ମଧ୍ୟରୁ  ୬ ଜଣ ସ୍ଵାଧୀନ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିଥିବା ସୂଚନା ରହିଛି | ତେବେ ବିଜେଡି ଦଳ ପଞ୍ଚାୟତ ନିର୍ବାଚନରେ ବହୁ ଆସନ ଅକ୍ତିଆର କରି ବିଜୟୀ ହୋଇଥିବାବେଳେ ଏବେ ପୌର ନିର୍ବାଚନରେ ଏହାର ବ୍ୟାପକ ପ୍ରଭାବ ପଡିବ ଏବଂ ପୌର ନିର୍ବାଚନରେ ମଧ୍ୟ ବିଜେଡି ଦଳ ବ୍ୟାପକ ମାତ୍ରାରେ ବିଜୟୀ ହେବ ବୋଲି ଆଶା ବାନ୍ଧିଥିବା ଜଣାଯାଏ ।