06-Mar-2022

ବରଗଡ଼:  ସଭ୍ୟ ସମାଜରେ ମହିଳା ଓ ପୁରୁଷଙ୍କୁ ସମାଜ ସମାନ ଦୃଷ୍ଟିରେ ଦେଖୁଥିବା ବେଳେ ମହିଳାଙ୍କ ଆତ୍ମସମ୍ମାନ ଓ ସୁରକ୍ଷା ଏବେ ସର୍ବ ପ୍ରଥମ ସ୍ଥାନରେ ରହିଅଛି । ମହିଳା ମାନେ ଆଉ କୌଣସି କ୍ଷେତ୍ରରେ ପଛୁଆ ବା ଅବହେଳିତ ହୋଇ ନାହାନ୍ତି ।ନିଜର ଶକ୍ତି ଓ ସାମର୍ଥ୍ୟ ବଳରେ  ସମାଜରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରି ସାରିଛନ୍ତି ନାରୀ । ଏପରିକି ମହିଳା ମାନଙ୍କୁ ସ୍ୱତନ୍ତ୍ର ସମ୍ମାନ ଦେବା ଲକ୍ଷ ନେଇ ଜାତୀୟ ତଥା ଅନ୍ତର୍ଜାତୀୟ ସ୍ତରର ମାର୍ଚ୍ଚ ୮ ତାରିଖକୁ ବିଶ୍ୱ ମହିଳା ଦିବସ ଭାବରେ ପାଳନ କରାଯାଉଛି । ସମାଜରେ ନାରୀ ସବୁ କ୍ଷେତ୍ରରେ ନିଜର ପରାକାଷ୍ଠା ଦେଖାଇ ସାରିଥିବା ବେଳେ ଏବେ ବି କିଛି କ୍ଷେତ୍ରରେ କିଛି ପଶୁ ପ୍ରକୃତିର ଲୋକ ନାରୀଙ୍କୁ ଅଦ୍ୟାବଧି ନିର୍ଯ୍ୟାତନା ଦେବା ବନ୍ଦ କରିନାହାନ୍ତି । ଏପରିକି ମାନସିକ ବିକୃତି ଥିବା ମହିଳାଙ୍କୁ ଉପଯୁକ୍ତ ଥଇଥାନ କରିବା ପରିବର୍ତ୍ତେ ସେମାନେ ଅବାଞ୍ଛିତ ଗର୍ଭ ଧାରଣ କରିବା ଭଳି କୁତ୍ସିତ ଘଟଣା ନଜରକୁ ଆସିଛି । 
       ସତ୍ୟ ଉଦାହରଣ ଭାବେ ରବିବାର ଜଣେ ମାନସିକ ବିକୃତି ମହିଳାଙ୍କୁ ଅତାବିରା ବ୍ଲକ ର ଏକ ଗାଁରୁ ଅତି ଅସହାୟ ଅବସ୍ଥାରେ ସଂକଳ୍ପ ପରିବାର  ଉଦ୍ଧାର କରି ବରଗଡ଼ ଜିଲ୍ଲା ସଖୀ ସେଣ୍ଟର କୁ ଆଣିଥିଲା । ଉକ୍ତ ମହିଳାଙ୍କ ପ୍ରାଥମିକ ଚିକିତ୍ସା ପରେ ସେ "ଛ" ମାସର ଗର୍ଭବତୀ ଥିବା ଜଣା ପଡିଛି । ଜଣେ ମସ୍ତିଷ୍କ ବିକୃତି  ମହିଳାଙ୍କୁ କେହି ନରରାକ୍ଷସ ନିଜର ଯୌନ କ୍ଷୁଧା ଚରିତାର୍ଥ କରିବା ପାଇଁ ପାଶବିକ ଅତ୍ୟାଚାର କରି ଅବାଞ୍ଛିତ ଗର୍ଭ ଧାରଣ କରାଇଛି । ସମ୍ପୃକ୍ତ ମହିଳା ଜଣକ କିଛି ଜାଣିପାରୁ ନଥିବା ବେଳେ ନିଜ ଗର୍ଭରେ ୬ ମାସର ଏକ ଶିଶୁ କୁ ବଢ଼ାଇ ଚାଲିଛନ୍ତି ।
     ଏପରି ଅବସ୍ଥାରେ  ସମ୍ପୃକ୍ତ ମହିଳାଙ୍କ ଉତ୍ତମ ଚିକତ୍ସା, ଗର୍ଭର ସୁରକ୍ଷା ତଥା ଠିକ ସମୟରେ ସନ୍ତାନର ପ୍ରସବ କରିବା ବର୍ତ୍ତମାନ ମୁଖ୍ୟ ସମସ୍ୟା ହୋଇ ଛିଡା ହୋଇଅଛି । ମାନସିକ ବିକୃତି ମହିଳାଙ୍କ କେହି ଆତ୍ମୀୟ ସ୍ଵଜନ୍ୟ ନଥିବା ବେଳେ କିମ୍ବା ତାର ପରିଚୟ ଜଣା ପଡୁନଥିବା ଯୋଗୁଁ ତାଙ୍କର ରହିବା ଖାଇବା ଓ ଚିକିତ୍ସା ପାଇଁ କଣ ପଦକ୍ଷେପ ନିଆଯିବ ତାହାକୁ ନେଇ କିଛି ସ୍ଥିର ହୋଇପାରୁ ନାହିଁ।
         ଏକବିଂଶ ଶତାବ୍ଦୀରେ ମଣିଷ ଉଗ୍ର ଆଧୁନିକତା ଆଡକୁ ମୁହାଁଉ ଥିବାବେଳେ ନିଜର ଯୌନ ଆକାଂକ୍ଷା ପାଇଁ ଯେ କୌଣସି ସ୍ତରକୁ ଯିବାର ନଜିର ମଧ୍ୟ କିଛି କମ ନୁହେଁ । ଜଣେ ପାଗଳୀ ମାଁ ଅନାବଶ୍ୟକ ଭାବେ ଏକ ନବାଗତ ଭବିଷ୍ୟତକୁ ଗର୍ଭରେ ଧରି ବୁଲୁଛନ୍ତି । ଆଉ କିଛି ମାସ ପରେ ଭୂମିଷ୍ଠ ସନ୍ତାନଟି ତାର ପରିଚୟ ଖୋଜିବ । ସେତିକି ବେଳକୁ ବିନା ଦୋଷରେ ସମ୍ପୃକ୍ତ ଛୁଆଟି ଜାରଜ ସନ୍ତାନର ପରିଚୟ ନେଇ ବୁଲିବ । ତେବେ ଦୋଷ କରିବ କିଏ ? କ୍ଷୁଧା ମେଣ୍ଟାଇବା କିଏ ?ପରିଣାମ ଭୋଗିବ କିଏ ?