14-Feb-2022

ବଲାଙ୍ଗୀର: (ମଳୟ ମିଶ୍ରଙ୍କ ରିପୋର୍ଟ) : ଗତ ରବିବାର ୧୪ ତାରିଖରେ ବଲାଙ୍ଗୀରରୁ ଛତିଶଗଡ ପଟକୁ ଯାଉଥିବା ୨୦୦କେଜି ଟ୍ରକ୍ ଭର୍ତ୍ତି ଗଞ୍ଜେଇ ବଲାଙ୍ଗୀର ସୀମାନ୍ତବର୍ତ୍ତୀ ରାସ୍ତାରେ ପଦ୍ମପୁର ଅବକାରୀ ବିଭାଗ ହାତରେ ଜବତ ହୋଇଛି । ପଦ୍ମପୁର ଅବକାରୀ ଥାନାଧିକାରୀ ହେମକାନ୍ତ ସୁନା ଓ ତାଙ୍କ ସହକର୍ମୀମାନେ ସନ୍ଦେହରେ ଏହି ବଡ ଟ୍ରକ୍ ( MP 09 HG7314 )ଟିକୁ ସନ୍ଦେହରେ ଅଟକାଇବାରୁ ଡ୍ରାଇଭର ଟ୍ରକ୍ ଛାଡି ପଳାଇଥିବା ପ୍ରକାଶ ।

ତେବେ ବଲାଙ୍ଗୀରଜିଲ୍ଲାରେ ଏହା ପ୍ରଥମ ବା ନୂଆଘଟଣା ନୁହେଁ । ଗତ କିଛିବର୍ଷଧରି ବୌଦ୍ଧଫୁଲବାଣୀରୁ ସୋନପୁର ପଟରୁ ଓ ମାଲକାନଗିରି ରାୟଗଡା ପଟରୁ ବଲାଙ୍ଗୀରଦେଇ କିଛି କିଛିଦିନ ଅନ୍ତରରେ ବିପୁଳପରିମାଣର ଗଞ୍ଜେଇ ଚୋରାଚାଲାଣ ହୋଇ ଆସୁଛି । ଧରାପଡୁଥିଲେ ମଧ୍ୟ ଅଦ୍ୟାବଧି ଏହା ଅବ୍ୟାହତ ରହିଆସିଛି । କିଛିବର୍ଷତଳେ ତରଭା ଓ ସୋନପୁରରେ ଅବସ୍ଥାପିତ ବଲାଙ୍ଗୀରର ଜଣେ ଥାନାଧିକାରୀ ଗଞ୍ଜେଇ ଧରପଗଡ କାରବାରରେ ସମ୍ପୃକ୍ତ ଥିବା ଚର୍ଚ୍ଚାରୁ ତାଙ୍କୁ ତୁରନ୍ତ ସ୍ଥାନନ୍ତର କରାଯାଇଥିଲା । ସେ ଏକ ଗଞ୍ଜେଇ ଚୋରାଚାଲାଣ କରୁଥିବା ଗାଡିକୁ ନିଜେ ପାର୍ କରାଉଥିବାବେଳେ ରାତିଅଧରେ ଗ୍ରାମବାସୀଙ୍କ ହାତରେ ଧରାପଡିଥିଲେ । ଆହୁରି ମଧ୍ୟ ଆନ୍ତଃରାଜ୍ୟ ଗଞ୍ଜେଇ ଚୋରାଚାଲାଣକାରୀଙ୍କୁ ଧରପଗଡ ପରେ ସେସବୁ ମାମଲାର ସାକ୍ଷୀରୂପେ ସେଇ ଅଭିଯୁକ୍ତମାନଙ୍କୁ ଦର୍ଶାଇ ବିବଦମାନ ହୋଇପଡିଥିଲେ ।

କିଛିଦିନତଳେ ବଲାଙ୍ଗୀର ସହରର ଆରଟିଓ ଛକରେ ଏକ କୁକୁଡାଖାଦ୍ୟ ଡମ୍ଫରରେ ବିପୁଳପରିମାଣର ଗଞ୍ଜେଇ ଚୋରାଚାଲାଣବେଳେ ବଲାଙ୍ଗୀର ପୁଲିସ୍ ହାତରେ ଜବତ ହେବା ସହ ଡ୍ରାଇଭରକୁ ଗିରଫ କରିଥିଲା । ତେବେ ଏହାର ଅସଲ ମାଫିଆ ବା ରାକେଟର ପର୍ଦ୍ଦାଫାଶ୍ ହୋଇପାରିଲାନାହିଁ । ଆହୁରି ମଧ୍ୟ ଆରଟିଓ ଛକର ବଲାଙ୍ଗୀର ସରକାରୀ ବସ୍ ଷ୍ଟାଣ୍ଡ୍ ର ଠିକାଦାର ଓ ବଲାଙ୍ଗୀର ଆରଟିଓ ଛକ ନିକଟରେ  ରହୁଥିବା ତୁଷୁରାର ଜଣେ ବଡ ବ୍ୟବସାୟୀ ରାଇସ୍ ମିଲ୍ ମାଲିକ ନିରଞ୍ଜନ କେଡିଆଙ୍କୁ ରାୟଗଡା - ମୁନିଗୁଡା ପୁଲିସ୍   ବିହାରକୁ କୁଣ୍ଡାଟ୍ରକ୍ ରେ ଗଞ୍ଜେଇ ଚୋରାଚାଲାଣ କରିଆସୁଥିବା ମାମଲାରେ ଆସି ଗିରଫ କରିଥିଲା ଓ ସେ ଜେଲ୍ ରୁ ଏବେ ବାହାରିଥିବା ପ୍ରକାଶ ।

ସୋନପୁର- ବଲାଙ୍ଗୀର ରାସ୍ତାରେ ବରାବର ଗଞ୍ଜେଇ ଧରାପଡିଥାଏ । କନ୍ଧମାଳ ବୌଦ୍ଧପଟରୁ ତୁଷୁରା ଦେଇ ବଲାଙ୍ଗୀର ପଟକୁ ମଧ୍ୟ ଏହା ଆସୁଛି । ଆନ୍ଧ୍ର କୋରାପୁଟ ମାଲକାନଗିରି ରାୟଗଡାପଟରୁ ବଲାଙ୍ଗୀର ଦେଇ ସମ୍ବଲପୁର , ଝାଡଖଣ୍ଡ , ବିହାର , ଛତିଶଗଡ ଆଦି ବାହାରରାଜ୍ୟକୁ ମଧ୍ୟ ଏପରି ଚୋରାଚାଲାଣ ଅବ୍ୟାହତ ରହିଆସିଛି ।

ବଲାଙ୍ଗୀର ଜିଲ୍ଲା ଅବକାରୀ ଅଧିକ୍ଷକଙ୍କ କାର୍ଯ୍ୟାଳୟ ଛକରେ କିଛିଦିନତଳେ ଏକ ଗଞ୍ଜେଇଟ୍ରକ୍ ଧରାପଡିଥିଲା । ବଲାଙ୍ଗୀର ବସ୍ ଷ୍ଟାଣ୍ଡ୍ , ସହରର ଅନ୍ୟାନ୍ୟ ସ୍ଥାନ , ବଲାଙ୍ଗୀର ଜିଲ୍ଲାର ପାଟଣାଗଡ ଓ ଅନ୍ୟାନ୍ୟ ଅଞ୍ଚଳରେ ଗଞ୍ଜେଇ ଧରାପଡୁଛି । ପ୍ରାୟ ତିନିବର୍ଷତଳେ ବୌଦ୍ଧଜିଲ୍ଲାର କଣ୍ଟାମାଳ ଅଞ୍ଚଳରୁ ବଲାଙ୍ଗୀର ଓ ପାଟଣାଗଡ ଦେଇ ବରଗଡ ଜିଲ୍ଲା ପଦ୍ମପୁର ନିକଟସ୍ଥ କୁଗରୀମୁଣ୍ଡା ଗ୍ରାମକୁ ଏକ ଗଞ୍ଜେଇକାର୍ ଯାଉଥିଲାବେଳେ ଝୁଲେନବର ନିକଟରେ ପାଟଣାଗଡ ପୁଲିସ୍ ହାତରେ ଜବତ ହେବା ସହ କେତେକ ଅଭିଯୁକ୍ତଙ୍କୁ ଗିରଫ କରାଯାଇଥିଲା । ବୁଡେନ ଥାନାନ୍ତର୍ଗତ କୁଗରୀମୁଣ୍ଡା ଗ୍ରାମଟି ପାଟଣାଗଡ- ପଦ୍ମପୁର ରାସ୍ତାରେ ଅଳ୍ପଦୂର ଭିତରକୁ ରହିଛି । ଏହି ଗ୍ରାମଟି ଆନ୍ତଃରାଜ୍ୟ ଚୋରାଖମଗଞେଇ ଚାଲାଣର ପୁରୁଣାପେଣ୍ଠସ୍ଥଳୀ ବୋଲି କୁହାଯାଉଛି । 

ତେବେ କାହିଁକି ବଲାଙ୍ଗୀର , ବୌଦ୍ଧ , କନ୍ଧମାଳ  , ସୋନପୁର ବା ବରଗଡ ପଦ୍ମପୁର ଆଦି ରାସ୍ତାରେ କ୍ରମାଗତଭାବରେ ଗଞ୍ଜେଇ ଚୋରାଚାଲାଣ ହୋଇଆସୁଛି , ଏହାର କାରଣ

ଏହିସବୁ ଜିଲ୍ଲାର ଥାନାପୁଲିସ୍ ଓ ଅବକାରୀ କର୍ମଚାରୀଙ୍କ ଅସାଧୁତାକୁ ଦାୟୀ କରାଯାଇଆସିଛି । କେତେବେଳେ ଦୈବାତ୍ ଧରାପଡିଗଲେ ବା ଲୋକଲୋଚନକୁ ଆସିଗଲେ , ଏହା ଧରପଗଡ କରାଯାଇ ପରେ ଏହାର ଅସଲ ମାଫିଆଙ୍କୁ ମାମଲାକୁ ଦଫାରଫା ବା ତ୍ରୁଟିପୂର୍ଣ୍ଣ କରିଦିଆଯାଇ ଖସାଇ ଦିଆଯାଉଥିବା କୁହାଯାଉଛି । ସଂପ୍ରତି ଅବକାରୀ ବିଭାଗର ରାଜ୍ୟସ୍ତରୀୟ ନିର୍ବାଚନବେଳର କଡାକଡି କାର୍ଯ୍ୟାନୁଷ୍ଠାନ ତାଗିଦ୍ ପରିପ୍ରେକ୍ଷୀରେ ଯଦିଓ କିଛିଟା ତତ୍ପରତା ଲକ୍ଷ୍ୟ କରାଯାଇଛି , ଏହା ଯଥେଷ୍ଟ ନୁହେଁ । ବିପୁଳ ଗଞ୍ଜେଇଚାଷ ଓ ମାଓବାଦୀଙ୍କ ଗତିବିଧି ଯୋଗୁଁ ଏହା ଏଅଞ୍ଚଳରେ ଏକ ଦୁରାରୋଗ୍ୟ ବ୍ୟାଧି ପାଲଟିଗଲାଣି । ମୁଖ୍ୟତଃ ପୁଲିସ୍ ଓ ଅବକାରୀବିଭାଗର ତଦନ୍ତ ନିରପେକ୍ଷ ଓ ତ୍ରୁଟିଶୂନ୍ୟତା ପ୍ରତି ସରକାର ଦୃଷ୍ଟିଦେବା ବାଞ୍ଛନୀୟ ।
 ଅବକାରୀ ନୀତିର ଅନ୍ୟୁନ ୨୦ କେଜି କର୍ପୋରେସନ୍ ପରିବହନ ଓ ସ୍ଥାନୀୟ ଏନଡିପିଏସ୍ ମାମଲାଋଜୁ କରିବାରେ ପୁଲିସ୍ ଓ ଅବକାରୀ ବିଭାଗୀୟ ତଦନ୍ତର କାର୍ଯ୍ୟାନୁଷ୍ଠାନ ଗ୍ରହଣ ପରେ ସଠିକ୍ ଅଭିଯୋଗଫର୍ଦ୍ଦର ଦାଖଲ ସହ ଉପଯୁକ୍ତ ତଥ୍ୟପ୍ରମାଣ ଯୋଗାଡରେ ଜାଣିଶୁଣି ତ୍ରୁଟି ହିଁ ଏହାର ଚୋରାଚାଲାଣକାରୀ ବା ମାଫିଆଙ୍କୁ ନିରଙ୍କୁଶ କରିଛି ।