04-Feb-2022

ସ୍ୱାଧୀନତା ପରେ ବିକାଶର ମାପକାଠିରେ ଭାରତର ଅନେକ ରାଜ୍ୟ ପଛରେ ରହିଯାଇଥିଲେ। ବିଶେଷକରି ପାହାଡ଼ ପର୍ବତ ଘେରା  ଉତ୍ତର-ପୂର୍ବ ରାଜ୍ୟଗୁଡିକ। ଏହି ରାଜ୍ୟଗୁଡ଼ିକ ଲାଗି ସ୍ୱତନ୍ତ୍ର ପଦକ୍ଷେପର ଆବଶ୍ୟକ ଥିବାବେଳେ ତାହା ହେଉନଥିଲା। ହେଲେ 2014 ପରେ ଏହି ରାଜ୍ୟଗୁଡିକ ଭିତ୍ତିଭୂମି କ୍ଷେତ୍ରରେ ନୂତନ ରେକର୍ଡ ସୃଷ୍ଟି କରିବାକୁ ଯାଉଛନ୍ତି।  ଏହାର କାରଣ ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରତିବଦ୍ଧତା। ଏହି ପ୍ରତିବଦ୍ଧତା ଉତ୍ତର-ପୂର୍ବକୁ ଭାରତର ବିକାଶର ଇଞ୍ଜିନ ଭାବରେ ବିବେଚନା କରେ। ସିକ୍କିମ ବିମାନବନ୍ଦର ହେଉ ବା ଆସାମର ସେତୁ କିମ୍ବା ଉତ୍ତର-ପୂର୍ବରେ ବ୍ୟାପକ ବିସ୍ତାର ହେବାକୁ ଥିବା ରେଳ-ସଡ଼କ ସଂଯୋଗ, ଏସବୁ କ୍ଷେତ୍ରରେ କେନ୍ଦ୍ର ସରକାର କୌଣସି ସୁଯୋଗ ହାତଛଡ଼ା କରିବାକୁ ଚାହୁଁନାହାଁନ୍ତି। ଏହି ଧାରାରେ, ମଣିପୁରର ରାଜଧାନୀ ଇମ୍ଫାଲକୁ ବ୍ରଡ ଗେଜ ରେଳଲାଇନ୍ ସଂଯୋଗ କରିବା ପାଇଁ ବର୍ତ୍ତମାନ ବିଶ୍ୱର ସର୍ବୋଚ୍ଚ ରେଳ ବ୍ରିଜ ତିଆରି ଚାଲିଛି। 111 କିଲୋମିଟର ଲମ୍ବା ଜିରିବାମ-ଇମ୍ଫାଲ ରେଳ ଲାଇନ ପ୍ରକଳ୍ପ ଅଧୀନରେ ଏହା ନୋନେ ଜିଲ୍ଲାରେ ନିର୍ମାଣ କରାଯାଉଛି। ଏହି ଅଞ୍ଚଳ ଇକୋ ସେନ୍ସିଟିଭ୍ ଜୋନ୍ ପରିଧିରେ ଆସୁଥିବାରୁ ଏହି ସେତୁକୁ ଭୂକମ୍ପ ପ୍ରତିରୋଧକ କରାଯାଉଛି। ଏହି ବ୍ରିଜ୍ ରିକ୍ଟର ସ୍କେଲରେ 8.5 ମାପ ବିଶିଷ୍ଟ ଭୂକମ୍ପର କମ୍ପନକୁ ସହ୍ୟ କରିପାରିବ। ଡିସେମ୍ବର 2023 ରେ ଏହି ପ୍ରକଳ୍ପ ଶେଷ ହେବ । ଏହି ସେତୁ ନିର୍ମାଣ ଦ୍ୱାରା 111 କିଲୋମିଟର ଦୂରତା ପ୍ରାୟ 2.5 ଘଣ୍ଟା ମଧ୍ୟରେ ସମ୍ପୂର୍ଣ୍ଣ ହେବ। ବର୍ତ୍ତମାନ ଜିରିବମ୍ ଏବଂ ଇମ୍ଫାଲ୍ ମଧ୍ୟରେ ଦୂରତା 220 କିମି। ଏହାକୁ ଅତିକ୍ରମ କରିବାକୁ 10 ରୁ 12 ଘଣ୍ଟା ଲାଗେ। ବ୍ରିଜ୍ ସମ୍ପନ୍ନ ହୋଇଗଲେ 111 କିଲୋମିଟର ଦୂରତା ଅଢ଼େଇ ଘଣ୍ଟାରେ ସମ୍ପୂର୍ଣ୍ଣ ହେବ। ଏହି ବ୍ରିଜ୍ର ଉଚ୍ଚତା 141 ମିଟର ହେବ, ଯାହା କୁତୁବ ମିନାରର ଉଚ୍ଚତାଠାରୁ ପ୍ରାୟ ଦୁଇଗୁଣ ଅଧିକ। ବର୍ତ୍ତମାନ ଦୁନିଆର ସର୍ବୋଚ୍ଚ ସେତୁ ୟୁରୋପର ମୋଣ୍ଟେନେଗ୍ରୋରେ ଅଛି। ଏହାର ଉଚ୍ଚତା 139 ମିଟର।