31-Jan-2022

ବରଗଡ: (ନିରଞ୍ଜନ ତ୍ରିପାଠୀ)-ଓଡ଼ିଶା ରାଜ୍ୟ ସଡ଼କ ପରିବହନ ନିଗମ ଅଧୀନସ୍ତ କର୍ମଚାରୀଙ୍କ ଅସାବଧାନତା ଯୋଗୁଁ ଆଜି ଏକ ବଡ଼ ଧରଣର ଦୁର୍ଘଟଣା ହେବାର ସମ୍ଭାବନା ସୃଷ୍ଟି ହୋଇଥିଲା, ଡ୍ରାଇଭରଙ୍କ ଉପସ୍ଥିତ ବୁଦ୍ଧି ଯୋଗୁଁ ଯାତ୍ରୀମାନେ ସୁରକ୍ଷିତ ଅଛନ୍ତି । ସୂଚନା ଅନୁଯାୟୀ ବରଗଡ଼ ଜିଲ୍ଲା ବିଜେପୁର ବ୍ଲକ ଅନ୍ତର୍ଗତ ପୁଞ୍ଜିପଥର ଛକ ନିକଟରେ ସରକାରୀ ବସର ଚକ ଖୋଲିଯାଇ ଦୁଇଶହ ମିଟର ପର୍ଯ୍ୟନ୍ତ ଗଡିଯାଇଥିଲା ।ବହୁ କଷ୍ଟରେ ଡ୍ରାଇଭର ଗାଡ଼ିଟିକୁ ନିୟନ୍ତ୍ରଣ କରିଥିଲେ ନଚେତ ସାମ୍ନାରେ ଥିବା କୋଡିଏ ଫୁଟ ଗଭୀର ଗାତରେ ପଡ଼ି ଅନେକ ଯାତ୍ରୀ ମୃତାହତ ହେବାର ସମ୍ଭାବନା ସୃଷ୍ଟି ହୋଇଥାନ୍ତା ।ଏଠାରେ ସୂଚନାଯୋଗ୍ୟ  ଯେ, ବରଗଡ଼ ଠାରୁ ବିଜେପୁର,ପଦ୍ମପୁର ,ପାଇକମାଲ ରାସ୍ତାରେ ନୂଆପଡ଼ା ଜିଲ୍ଲା ଖରିଆର ରୋଡ ପର୍ଯ୍ୟନ୍ତ OR03H100 ନମ୍ବର ବିଶିଷ୍ଟ ହାଇକମ୍ଫ ବସ ପ୍ରତ୍ୟହ ସକାଳୁ ବରଗଡ଼ ରୁ ଖରିଆର ରୋଡ ପର୍ଯ୍ୟନ୍ତ ଚାଲିଥାଏ କିନ୍ତୁ ଓଡ଼ିଶା ରାଜ୍ୟ ସଡ଼କ ପରିବହନ ନିଗମ ଅଧିନସ୍ଥ କର୍ମଚାରୀ ମାନଙ୍କ ଅବହେଳା କାରଣରୁ ଉକ୍ତ ବସର ଚକ ଖୋଲିଯାଇଥିବା ଯୋଗୁଁ ଯାତ୍ରୀମାନେ ତଥା ସ୍ଥାନୀୟ ବୁଦ୍ଧିଜୀବୀ ମାନେ ଉକ୍ତ କର୍ମଚାରୀ ମାନଙ୍କୁ ଦୃଢ଼ ନିନ୍ଦା କରିଥିଲେ । ଏହାଛଡ଼ା ଉକ୍ତ ରାସ୍ତା ଦେଇ ଏହି ପୁରୁଣା ବସ ବଦଳରେ ଏକ ନୂତନ ବସ ଚଳାଚଳ କରିବା ପାଇଁ ସ୍ଥାନୀୟ ଲୋକମାନେ ଦାବୀ କରିଛନ୍ତି ।