13-Jan-2022

ସମ୍ବଲପୁର (ପ୍ରେରଣା ଖବର ବ୍ୟୁରୋ) :ଗଙ୍ଗାଧର ମେହେର ବିଶ୍ୱବିଦ୍ୟାଳୟର ସ୍ନାତକୋତ୍ତର ଓଡ଼ିଆ ଭାଷା ଓ ସାହିତ୍ୟ ବିଭାଗର ଅନ୍‌ଲାଇନ୍ ସାରସ୍ୱତ ମାସିକ ମୁଖପତ୍ର 'ଶବ୍ଦଗଙ୍ଗା'ର ବିଂଶତମ ସଂଖ୍ୟା ଆଜି ବିଭାଗମୁଖ୍ୟ ଡକ୍‌ଟର ଲକ୍ଷ୍ମୀପ୍ରିୟା ବେହେରାଙ୍କ ଅଧ୍ୟକ୍ଷତାରେ ଲୋକାର୍ପିତ ହୋଇଯାଇଛି। ଉନ୍ମୋଚନ ସଭାକାର୍ଯ୍ୟରେ ଡ. ବେହେରା ଅଧ୍ୟକ୍ଷତା କରିବା ସହ ପତ୍ରିକାର ସାହିତ୍ୟିକ ଓ ସାରସ୍ଵତ ମୂଲ୍ୟବୋଧ ସମ୍ପର୍କରେ ଉଚ୍ଚକୋଟୀର ବକ୍ତବ୍ୟ ପରିବେଷଣ କରିଥିଲେ । ଏହି ନୂତନ ବର୍ଷ ସଂଖ୍ୟାର ଅତିଥି କବି ଭାବେ ଘେଁସ ମହାବିଦ୍ୟାଳୟର ଓଡ଼ିଆ ଅଧ୍ୟାପକ ଜଗଦୀଶ ସାହୁ ଯୋଗଦେଇ ଛାତ୍ରଛାତ୍ରୀମାନଙ୍କୁ ଓଡ଼ିଆ ଭାଷା ଓ ସାହିତ୍ୟର ମହତ୍ତ୍ଵ ସମ୍ପର୍କରେ ମୂଲ୍ୟବାନ ବକ୍ତବ୍ୟ ଦେବା ସହ ସ୍ୱରଚିତ କବିତା ଶୀର୍ଷକ "ହେ ଈଶ୍ୱରୀ" ମଧ୍ୟ ଆବୃତ୍ତି କରିଥିଲେ। 

ଛାତ୍ର ଶିବାତ୍ମକ ପଣ୍ଡା, ଚନ୍ଦନ ବେହେରା, ତୃଷ୍ଣା ଦାଶ ଓ ମଙ୍ଗରାଜ ମହାପାତ୍ର ପତ୍ରିକା ସମ୍ପର୍କରେ ଓଜଃସ୍ୱିନୀ ବକ୍ତବ୍ୟ ପ୍ରଦାନ କରିଥିଲେ। ଛାତ୍ର ସମ୍ପାଦକ ସୁଦର୍ଶନ ସାହୁ, ଆଶାଜ୍ୟୋତି ଦାସ, ଜଗନ୍ନାଥ ମେହେର ଓ ବର୍ଷାରାଣୀ ନନ୍ଦ କାର୍ଯ୍ୟକ୍ରମ ପରିଚାଳନା କରିଥିଲାବେଳେ ଲିପ୍‌ସା ମେହେର 'ଶବ୍ଦଗଙ୍ଗା'ର ସାରସ୍ୱତ ମୂଲ୍ୟ ଓ ଉପାଦେୟତା ସମ୍ପର୍କରେ ବକ୍ତବ୍ୟ ଉପସ୍ଥାପନ କରିଥିଲେ। ଛାତ୍ରୀ ସୀମା ଶତପଥି ଧନ୍ୟବାଦ ଅର୍ପଣ କରଥିଲେ। ଏହି ଲୋକାର୍ପଣ କାର୍ଯ୍ୟକ୍ରମରେ ବିଭାଗର ସଂଖ୍ୟାଧିକ ଛାତ୍ରଛାତ୍ରୀ ଯୋଗଦେବା ସହ ସକ୍ରିୟ ଭୂମିକା ଗ୍ରହଣ କରିଥିଲେ।