09-Jan-2022

ବଲାଙ୍ଗିର,- ଆଜି ବହୁ ପ୍ରତିକ୍ଷିତ ସୁକତେଲ ନଦୀ ଉପରେ କିରାବାହାଲ-ଛତାମଖନା ସେତୁ ଲୋକାର୍ପିତ ହୋଇଛି । ଏହି ସେତୁ ପାଇଁ ଲୋକେ ଦିର୍ଘ ଦିନରୁ ଦାବି କରିଆସୁଥିଲେ । ଜାତୀୟ ରାଜପଥକୁ ଆସିବା ପାଇଁ ସୁକତେଲ ଆରପଟରେ ଥିବା କିରାବାହାଲ, ରାଣିପାଲି, ଖଲିଆପାଲି, ସେମିଲିଆ, ରାମସିଂହା, ଧମନାସର ଇତ୍ୟାଦି ଅଞ୍ଚଳର ଲୋକଙ୍କୁ ୧୫ କିମି ପର୍ଯ୍ୟନ୍ତ ବୁଲିବାକୁ ପଡୁଥିଲା । ଏହି ସେତୁଟି ବର୍ତ୍ତମାନ ଏହି ଦୂରତ୍ୱକୁ ୫ କିମିକୁ ନେଇ ଆସିଛି । ଏଣୁ ଏହି ସେତୁଟି  ନିଶ୍ଚିତ ଭାବରେ ଗମନା ଗମନ, ସାମାଜିକ ଓ ବୈବଷାୟିକ ଦୃଷ୍ଟିକୋଣରୁ ଏହି ଅଂଚଳ ପାଇଁ ଏକ ଆଶିର୍ବାଦ ଅଟେ  ବୋଲି ଆଜି କିରାବାହାଲ, ଛତାମଖନା ସେତୁର ଲୋକାର୍ପଣ ଉତ୍ସବରେ ମାନ୍ୟବର ବଲାଙ୍ଗିର ବିଧାୟକ ନରସିଂହ ମିଶ୍ର ନିଜ ପ୍ରତିକ୍ରିୟାରେ କହିଛନ୍ତି । ସେ ଏହି ପରିପ୍ରେକ୍ଷିରେ ଏହି ଅଂଚଳର ଲୋକମାନଙ୍କୁ ଅଭିନନ୍ଦନ ଜଣାଇବା ସହ ଲୋକଙ୍କ ଏକତା ଥିଲେ ଏପରି ବିକାଶମୂଳକ କାର୍ଯ୍ୟରେ ସହଜରେ ସଫଳତା ମିଳେ ବୋଲି କହିଥିଲେ । ୨୨ କୋଟି ଟଙ୍କା ବ୍ୟୟ ଅଟକଳରେ ନିର୍ମାଣ ହୋଇଥିବା ଏହି ସେତୁ ଲମ୍ବ  ୨୫୦ ମିଟର ଏବଂ ଏହା ୨୦୧୮ ମସିହା ଜୁନ ମାସ ୨ ତାରିଖ ଦିନ ଭିତ୍ତି ପ୍ରସ୍ତର ଦିଆଯାଇଥିଲା । ଆଜିର ଏହି ଲୋକାର୍ପଣ ଉତ୍ସବରେ ମାନ୍ୟବର ବଲାଙ୍ଗିର ବିଧାୟକଙ୍କୁ ଏହି ଅଂଚଳର ସହସ୍ରାଧିକ ଲୋକ ଏନ୍‌ଏଚ୍ ଠାରୁ ସେତୁ ପର୍ଯ୍ୟନ୍ତ ବିକାଶର ନାରା ଦେଇ ପାଛୋଟି ନେଇଥିଲେ । ସେଠାରେ ପୁର୍ତ୍ତବିଭାଗ ଅଧିକ୍ଷଣ ଯନ୍ତ୍ରୀ ନଳିନିକାନ୍ତ ଦାଶଙ୍କ ଉପସ୍ଥିତିରେ  ବିଧିବଦ୍ଧ ଭାବେ ଫିତାକାଟି ସେତୁର ଉଦ୍‌ଘାଟନ କରିଥିଲେ ବିଧାୟକ ଶ୍ରୀ ମିଶ୍ର । ଏହି ସମୟରେ ଅନ୍ୟମାନଙ୍କ ମଧ୍ୟରେ ସଦର ବ୍ଲକ ଉପାଧ୍ୟକ୍ଷା ଯଶୋବନ୍ତି ବଘାର, ଖଲିଆପାଲି ସରପଞ୍ଚ ରାଣିମା ପାତ୍ର, ଚନ୍ଦନଭାଟି ସରପଞ୍ଚ ମିନା କୁମାରୀ ଭୋଇ, ସହକାରୀ ଯନ୍ତ୍ରୀ ଖକେନ ସିଂହ ପ୍ରମୁଖ ଉପସ୍ଥିତ ଥିଲେ । ଭିତ୍ତିପ୍ରସ୍ତର ପରେ ପରେ କିରାବାହାଲ ଠାରେ ଏକ ବିରାଟ ସାଧାରଣ ସଭାରେ ସ୍ଥାନୀୟ ଲୋକେ ବିଧାୟକ ଶ୍ରୀ ମିଶ୍ରଙ୍କୁ ଉଚ୍ଛର୍ସିତ ସମ୍ବର୍ଦ୍ଧନା ଦେଇଥିଲେ । ପ୍ରତିଉତ୍ତରରେ ଶ୍ରୀ ମିଶ୍ର ଆଗାମୀ ଦୁଇ ବର୍ଷ ମଧ୍ୟରେ ଏହି ସମଗ୍ର ଅଂଚଳର ଲୋକେ ଯେମିତି ରାସ୍ତା, ବିଜୁଳି ଓ ପାଇପ ଯୋଗେ ପିଇବା ପାଣି ପାଇବାରୁ ବଂଚିତ ନ ହେବେ ତାହାକୁ ଦୃଢ ନିଶ୍ଚିତ କରାଯିବ ବୋଲି କହିଥିଲେ । ତାହା ସହ ଅଂଚଳରେ ଥିବା ବିଧବା, ବିକଳାଙ୍ଗ ୩୫ ବର୍ଷରୁ ଉର୍ଦ୍ଧ୍ୱ ରୁ ଅବିବାହିତ ଝିଅ ଯେପରି ସାମାଜିକ ସୁରକ୍ଷା ଯୋଜନାରୁ ଲାଭ ପାଇ ପାରିବେ ସେ ଦିଗରେ ମଧ୍ୟ ସେ ନିଜେ ତତ୍ପରତା ସହ କାମ କରୁଛନ୍ତି ବୋଲି ଦୃଢ ପ୍ରତିଶୃତି ଦେଇଥିଲେ । ଏହା ସହ ସେ ସୂଚନା ଦେଇଥିଲେ ଯେ ଏହି ସେତୁ ରୁ ଅଳ୍ପ କିଛି ଦୂରରେ ଆଉ ଏକ ବିରାଟ ଯୋଜନା ଅନ୍ତଃନଦୀ ଜଳସଂରକ୍ଷଣ ବ୍ୟାରେଜ ନିର୍ମାଣ ହେବାକୁ ଯାଉଛି । ୧୧୭ କୋଟି ଟଙ୍କାରେ ଟେଣ୍ଡର ପ୍ରକ୍ରିୟା ସରି ନିର୍ମାଣକାରୀ ସଂସ୍ଥା ଚୁଡାନ୍ତ ହୋଇସାରିଛି ତାହା ମଧ୍ୟ ଆଉ ଦୁଇ ମାସ ପରେ କାର୍ଯ୍ୟ ଆରମ୍ଭ ହୋଇଯିବ । ଦୁଇ ତିନି ବର୍ଷ ପରେ ଆପଣମାନେ ଦେଖିବେ ଏହି ସୁକତେଲ ନଦୀରୁ ଉଭୟ ପଟେ ଶସ୍ୟା ଶାମାଳା ସବୁଜିମାରେ ଭରିଯିବ । ଚିର ପ୍ରପିଡିତ ଏହି ଅଂଚଳ ଭୂତଳ ଜଳ ସଂରକ୍ଷଣ ଯୋଗୁଁ ଜମିର ଉର୍ବରତା ବଢିବ । ଲୋକଙ୍କ ଅମଳର ମାତ୍ରା ମଧ୍ୟ ବଢି ସେମାନେ ଦୁଇ ପଇସା ଭଲ ରୋଜଗାର କରି ପାରିବେ ବୋଲି ବିଧାୟକ ଶ୍ରୀ ମିଶ୍ର କହିଥିଲେ । ଏହି ସଭାରେ ଜିଲ୍ଲା କଂଗ୍ରେସ ସଭାପତି ଦିଲିପ ବେହେରା, ବ୍ଲକ କଂଗ୍ରେସ ସଭାପତି ରାମ ପ୍ରସାଦ ମିଶ୍ର, ବରିଷ୍ଠ କଂଗ୍ରେସ ନେତା, ଉମାଶଙ୍କର ପଣ୍ଡା, ଶୂଭ୍ରାଂଶୁ ପଣ୍ଡା, ବୁଲୁ ଦାନି, ଲୋପନ ମିଶ୍ରଙ୍କ ସମେତ ଶତାଧିକ କଂଗ୍ରେସ କର୍ମୀ ଉପସ୍ଥିତ ଥିଲେ ।