26-Dec-2021

ବଲାଙ୍ଗୀର,(ପ୍ରେରଣା ଖବର)ବଲାଙ୍ଗିର ସଦର ବ୍ଲକ ଖୁଜେନପାଲି ପଂଚାୟତର ପଣ୍ଡରାପିଟା ଠାରେ ଖୁଜେନପାଲି ଗାଁରୁ ଆଟଗାଁ ଉପରଝର ପୁର୍ତ୍ତ ବିଭାଗ ରାସ୍ତା ପର୍ଯ୍ୟନ୍ତ ୧୩ କୋଟି ଟଙ୍କା ବ୍ୟୟ ଅଟକଳର ରାସ୍ତା ପ୍ରସସ୍ତିକରଣ କାମର ଶୁଭ ଭିତ୍ତି ପ୍ରସ୍ତର ମାନ୍ୟବର ବଲାଙ୍ଗିର ବିଧାୟକଙ୍କ କର କମଳରେ ଅନୁଷ୍ଠିତ ହୋଇଯାଇଛି । ପୂର୍ବରୁ ଗ୍ରାମ୍ୟ ଉନ୍ନୟନ ବିଭାଗ ଅଧିନରେ ଥିବା ଏହି ରାସ୍ତା ଲୋକଙ୍କର ଗମନାଗମନ ତଥା ଅଂଚଳର ବ୍ୟବସାୟିକ ଉନ୍ନତି ଦୃଷ୍ଟିରୁ ଏହି ରାସ୍ତାଟିକୁ ପୂର୍ବ ବିଭାଗ ଅଧିନକୁ ଅଣାଯାଇ ରାସ୍ତାଟିର ପ୍ରସସ୍ତିକରଣ କରାଯିବା ସହ ଉନ୍ନତିକରଣ କରାଯିବ । ଦିର୍ଘ ୧୧ କିମି ରୁ ଉର୍ଦ୍ଧ୍ୱ ଥିବା ଏହି ରାସ୍ତା ସହରରୁ

ଖୁଜେନପାଲି, ପଣ୍ଡରାପିଟା, ମାକରଚୁଆଁ ଦେଇ ଆଟଗାଁ, ଉପରଝର ପିଡବ୍ଲୁଡି ରାସ୍ତାକୁ ସଂଯୋଗ କରିବ । ଏହି ରାସ୍ତା ଭିତ୍ତିପ୍ରସ୍ତର ସମୟରେ ବ୍ଲକ ଉପାଧ୍ୟକ୍ଷା ଯଶୋବନ୍ତି ବଘାର, ବ୍ଲକ ସହକାରୀ ଯନ୍ତ୍ରୀ ଶ୍ରୀ ହୋତା, ବିଧାୟକଙ୍କ ବ୍ଲକ ପ୍ରତିନିଧି କିଶୋର ସିଂ ନିନା, ଖୁଜେନପାଲି ସରପଞ୍ଚ ସତ୍ୟବାନ ସାହୁ ପ୍ରମୁଖ ଉପସ୍ଥିତ ଥିଲେ । ଏହି ଗସ୍ତ ସମୟରେ ଖୁଜେନପାଲି ବରକାନି ଉଭୟ ପଂଚାୟତର ଆହୁରି ଅନେକ ଉନ୍ନୟନମୂଳକ ପ୍ରକଳ୍ପ ଯଥା ବାଗଭାଡି ଠାରେ ଅତିରିକ୍ତ ଶ୍ରେଣୀ ଗୃହ, ଖୁଜେନପାଲି ଠାରେ ପ୍ରାଥମିକ ବିଦ୍ୟାଳୟର ଅତିରିକ୍ତ ଶ୍ରେଣୀ ଗୃହ, ଅଙ୍ଗନଓା୍ୱଡି କେନ୍ଦ୍ର ର ଉଦ୍‌ଘାଟନ ଓ କମ୍ୟୁନିଟି ସେଣ୍ଟର, କୁଦେଇପାଲି ରୁ ବାଗଭାଡି ଯିବା ପାଇଁ ସେ ରାସ୍ତାରେ ଥିବା ନାଳ ଉପରେ ପୋଲ, ବରକାନି ଠାରେ କମ୍ୟୁନିଟି ସେଣ୍ଟର ଏବଂ ଅଇଁଲାଚୁଆଁ ଠାରେ ଏକ କମ୍ୟୁନିଟି ସେଣ୍ଟର ଭିତ୍ତି ପ୍ରସ୍ତର ସ୍ଥାପନ ମାନ୍ୟବର ବିଧାୟକଙ୍କ ଦ୍ୱାରା ଅନୁଷ୍ଠିତ ହୋଇଥିଲା । ଏ ଅବସରରେ ବରକାନି ଖେଳ ପଡିଆରେ ଅନୁଷ୍ଠିତ ଫୁଟବଲ ଖେଳର ବିଜୟୀ ତଥା ଉପବିଜୟୀ ଦଳକୁ ମାନ୍ୟବର ବିଧାୟକ ଟ୍ରଫି ଓ ଉପହାର ଦେଇ ପୁରସ୍କୃତ କରିଥିଲେ । ଗାଁମାନଙ୍କରେ ଅନୁଷ୍ଠିତ ହୋଇଥିବା ସଭାମାନଙ୍କରେ ବିଶେଷ କରି ବରକାନି ଠାରେ ପଂଚାୟତ ମୁଖ୍ୟାଳୟ ଥିବା ସତ୍ତ୍ୱେ ସେଠାରେ ଗରିବଙ୍କ ପାଇଁ ଉଦ୍ଦିଷ୍ଟ ମାଗଣା ବିଜୁଳି ପ୍ରଦାନ ରେ ବିଭାଗ ଫେଲ ମାରିଥିବାରୁ ଲୋକଙ୍କ ଦାବି ମୁତାବକ ଶ୍ରୀ ମିଶ୍ର ଅଧିକ୍ଷଣ ଯନ୍ତ୍ରୀଙ୍କୁ ଶିଘ୍ର ବିଜୁଳି ସଂଯୋଗ କରିବା ପାଇଁ ନିର୍ଦ୍ଦେଶ ଦେଇଥିଲେ । ବାଗଭାଡି କୁଦେପାଲି ବାସୀ ବିଜୁଳି ଓ ପିଇବା ପାଣି ସମସ୍ୟାକୁ ନେଇ ଲୋକେ ବିଧାୟକ ଶ୍ରୀ ମିଶ୍ରଙ୍କୁ ଅଭିଯୋଗ କରିଥିଲେ । ଯାହାକି ବିଧାୟକ ଶ୍ରୀ ମିଶ୍ର ପିଇବା ପାଣି ସମସ୍ୟାକୁ ଶିଘ୍ର ପୁରଣ ହେବ ବୋଲି ପ୍ରତିଶୃତି ଦେଇଥିଲେ ।