22-Dec-2021

ପାଟଣାଗଡ଼ : ସରକାର ବର୍ତ୍ତମାନ ସରକାରୀ ଉଚ୍ଚ ବିଦ୍ୟାଳୟ ମାନଙ୍କୁ ୫ଟି ତଥା ମୋ ସରକାର ଯୋଜନାରେ ସାମିଲ କରିଛନ୍ତି। ସେଥିପାଇଁ କୋଟି କୋଟି ଟଙ୍କା ବିନିଯୋଗ କରୁଥିବା ଜଣାପଡିଛି। କିନ୍ତୁ ବିଦ୍ୟାଳୟ ମାନଙ୍କୁ ସ୍ମାର୍ଟ କରିଦେଲେ କ'ଣ ହେବ ସ୍ମାର୍ଟ ହେବାକୁ ହେଲେ ପାଠପଢ଼ା ମଧ୍ୟ ସ୍ମାର୍ଟ ହେବା ଦରକାର। ତତ୍ ସଙ୍ଗେ ସଙ୍ଗେ ବିଦ୍ୟାଳୟ ମାନଙ୍କୁ ଭରପୁର ଶିକ୍ଷକ ରଖିବା ନିହାତି ଆବଶ୍ୟକ। ସୂଚନା ଅନୁସାରେ ବଲାଙ୍ଗିର ଜିଲ୍ଲା ବେଲପଡା ବ୍ଳକ କାନୁଟ ସରକାରୀ ଉଚ୍ଚ ବିଦ୍ୟାଳୟ ମଧ୍ୟ ୫ଟି ଅନ୍ତର୍ଭୁକ୍ତ। କିନ୍ତୁ ଦୁଃଖର ବିଷୟ କହିବା କୁ ଗଲେ ପ୍ରଧାନ ଶିକ୍ଷକ ନାହାନ୍ତି। ଏହି ବିଦ୍ୟାଳୟଟି ୧୯୭୮ ମସିହାରେ ସ୍ଥାପିତ ହୋଇଥିଲା ଏବଂ ଏହା ବେଲପଡା ବ୍ଳକ ର ୧୫ ଖଣ୍ଡ ଗାଁର ବିଦ୍ୟାଳୟ ଭାବେ ପରିଚିତ। ଏବେ ପ୍ରତ୍ୟେକ ପଞ୍ଚାୟତ ରେ ଉଚ୍ଚ ବିଦ୍ୟାଳୟ ନିର୍ମାଣ ହୋଇଥିଲେ ସୁଦ୍ଧା ବର୍ତ୍ତମାନ ଏଠାରେ ୩୦୦ ରୁ ଉର୍ଦ୍ଧ୍ବ ଛାତ୍ରଛାତ୍ରୀ ପାଠ ପଢ଼ୁଥିବା ଦେଖିବାକୁ ମିଳୁଛି। ଅନେକ ଦିନରୁ ଦୁଇ ତିନି ବର୍ଷ ହେଲା ଏଠାରେ ପ୍ରଧାନ ଶିକ୍ଷକ ନାହାନ୍ତି ବୋଲି ଅଞ୍ଚଳବାସୀ ଙ୍କ ମନରେ ଅସନ୍ତୋଷ ଦେଖାଦେଇଛି।ଏ ବିଷୟରେ ଅନେକ ଥର ଗୋଷ୍ଠୀ ଶିକ୍ଷା ଅଧିକାରୀ ଙ୍କୁ ଜଣାଇଥିଲେ ସୁଦ୍ଧା କୌଣସି ସୁଫଳ ମିଳିନାହିଁ। ଜଣେ ମହିଳା ଶିକ୍ଷୟିତ୍ରୀ ଏଠାରେ ପ୍ରଧାନ ଶିକ୍ଷକ ଦାୟିତ୍ବରେ ଥିବା ବେଳେ ସେ ବିଦ୍ୟାଳୟ ର ବିଭିନ୍ନ ଉନ୍ନତିମୂଳକ କାର୍ଯ୍ୟ କରିବାରେ ଅସମର୍ଥ ବୋଲି ଗ୍ରାମର ଭଦ୍ରବ୍ୟକ୍ତି ମାନେ ମନ୍ତବ୍ୟ ଦେଇଛନ୍ତି। ଏଥିପ୍ରତି ଜିଲ୍ଲା ପ୍ରଶାସନ ଧ୍ୟାନ ଦେଇ ଏଠାରେ ଜଣେ ପ୍ରଧାନଶିକ୍ଷକ ନିଯୁକ୍ତି ଦେବାକୁ ଗ୍ରାମବାସୀ ଦାବି କରିଛନ୍ତି।