20-Dec-2021

ବରଗଡ/ଅତାବିରା:- ଅତାବିରା ଏନ୍ ଏ ସି ସ୍ଥିତ ଦୁର୍ଗା ମନ୍ଦିର  ନିକଟରେ ଦଶମ ତମ ରାଜ୍ୟସ୍ତରୀୟ ଟୁନୁ ପଣ୍ଡା ମେମୋରିଆଲ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟ ଆନୁଷ୍ଠାନିକ ଭାବେ  ଉଦଘାଟିତ ହୋଇଯାଇଛି ।ଏହି ଉଦଘାଟନୀ ଉତ୍ସବରେ ମାନ୍ୟବର  ବିଧାୟିକା ଶ୍ରୀମତୀ ସ୍ନେହାଙ୍ଗିନୀ ଛୁରିଆ ମୁଖ୍ୟ ଅତିଥି ରୂପେ ଯୋଗ ଦେଇ ଏହାକୁ ଉଦଘାଟନ କରିଥିଲେ।ବ୍ଲକ ଅଧ୍ୟକ୍ଷା ରିତା ସାହୁ,ଏନ୍ ଏ ସି ଅଧ୍ୟକ୍ଷା ଦୀପାଞ୍ଜଳୀ ଭୋରାସାଗର,ଗୋଷ୍ଠୀ ଉନ୍ନୟନ ଅଧିକାରୀ ବିଶ୍ଵନାଥ ସାହୁ,ତହସିଲଦାର ସୌଭାଗ୍ୟ ବେହେରା, ଫକିର କର୍ଣ୍ଣ,ଅତାବିରା କ୍ରୀଡା ଆସୋସିଏସନ୍ ର ସଭାପତି ସିଦ୍ଧାର୍ଥ ଶଙ୍କର ପଣ୍ଡା,ସମ୍ପାଦକ ଜିତେନ୍ଦ୍ର କୁମାର ଦାଶ,ମୁଖ୍ୟ ଉପଦେଷ୍ଟା ପାର୍ଥ ସାରଥି ପଣ୍ଡା ସମ୍ମାନିତ ଅତିଥି ଭାବେ ମଞ୍ଚାସୀନ ଥିଲେ ।ନିମନ୍ତ୍ରିତ ଅତିଥି ମାନଙ୍କ ଦ୍ଵାରା ପ୍ରଥମେ ସ୍ବର୍ଗତ ଟୁନୁ ପଣ୍ଡାଙ୍କ ଫଟୋଚିତ୍ର ରେ  ଦୀପ ପ୍ରଜ୍ବଳନ ପୂର୍ବକ ଶ୍ରଦ୍ଧା ସୁମନ ଅର୍ପଣ କରାଯାଇଥିଲା।ଅତିଥି ମାନଙ୍କୁ ଉତ୍ତରୀୟ ଦେଇ ସମ୍ବର୍ଦ୍ଧିତ କରାଯାଇଥଲା ।ଆର ଏସ ବି କ୍ରିଷ୍ଣା ମଞ୍ଚ ପରିଚାଳନା କରିଥିଲେ। ଦୀର୍ଘ ଦଶ ବର୍ଷ ଧରି ଏହି ରାଜ୍ୟସ୍ତରୀୟ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟ ଅନୁଷ୍ଠିତ ହୋଇଆସୁଛି ।ଏହି  ଟୁର୍ଣ୍ଣାମେଣ୍ଟରେ ଖେଳ  ଆରମ୍ଭ କରି  ଅତାବିରା ମାଟିର ଗୌରବ ପ୍ରମୋଦ ଭଗତ ପାରା ବ୍ୟାଡମିଣ୍ଟନ ଖେଳାଳି ଭାବରେ ସ୍ଵର୍ଣ୍ଣ ପଦକ ଜିତି ବିଶ୍ଵ ଦରବାରରେ ଅଞ୍ଚଳକୁ ପରିଚିତ କରିଛନ୍ତି । କିନ୍ତୁ ଆଜିଯାଏଁ ଅତାବିରା ରେ ଇଣ୍ଡୋର ଷ୍ଟାଡିୟମ ଟିଏ ହୋଇପାରି ନଥିବା ନେଇ ଏସୋସିଏସନ ର ସଭାପତି ଓ ସଂପାଦକ କ୍ଷୋଭ ପ୍ରକାଶ କରିଥିଲେ।ତେଣୁ ବିଧାୟିକା ଓ ତହସିଲଦାର ୧୫ ଦିନ ଭିତରେ ଷ୍ଟାଡିୟମ ପାଇଁ ଚୟନ ହୋଇଥିବା ସ୍ଥାନ ର ସମସ୍ୟାକୁ ସମାଧାନ କରି ନିର୍ମାଣ

କାର୍ଯ୍ୟ ଆରମ୍ଭ  କରାଯିବ ବୋଲି  ପ୍ରତିଶ୍ରୁତି ଦେଇଥିଲେ। ରାଜ୍ୟ ର ବିଭିନ୍ନ ଜିଲ୍ଲାରୁ ୪୪ ଟି ଦଳ ଏଥିରେ ଅଂଶଗ୍ରହଣ କରି ଖେଳ ପ୍ରଦର୍ଶନ କରିବେ ବୋଲି ଜଣାପଡିଛି।ଜାତୀୟ ସଙ୍ଗୀତ ଗାନ କରାଯାଇ ବିଧାୟିକା  ଫିତା କାଟି ଟୁର୍ଣ୍ଣାମେଣ୍ଟ କୁ ଆରମ୍ଭ ଘୋଷଣା କରିଥିଲେ ।ବାରିପଦା ଓ ପାଟଣାଗଡ ମଧ୍ୟରେ ପ୍ରଥମେ  ମ୍ୟାଚ୍ ଆରମ୍ଭ ହୋଇ ୮-୨୧ରେ ବାରିପଦା ବିଜୟୀ ହୋଇଥିଲା।ଏହା ବ୍ୟତୀତ ଦର୍ଶକ ମାନଙ୍କ ପାଇଁ ଖେଳ ସହ ନୃତ୍ୟ ଗୀତର ଆସର ବି ରଖାଯାଇଛି।ଶେଷରେ ବରିଷ୍ଠ ନାଗରିକ ସଂଘର ସଭାପତି ଧନ୍ୟବାଦ ଅର୍ପଣ କରିଥିଲେ ।