17-Dec-2021

ନୟାଗଡ଼, (ପ୍ରଦୀପ କୁମାର ପଣ୍ଡା): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ  ଓଡିଶାବାସୀଙ୍କୁ ସ୍ୱତନ୍ତ୍ର ସ୍ୱାସ୍ଥ୍ୟ ସେବା ଯୋଗାଇବା ଲକ୍ଷ୍ୟ ରଖି ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ପ୍ରଚଳନ ଗତ ସେପ୍ଟେମ୍ବର ୧ ତାରିଖରୁ ଆରମ୍ଭ କରିଛନ୍ତି | ଗୋଟିଏ ଗରିବ ଦିନମଜୁରିଆ ତାର ପରିବାରର କୌଣସି ସଦସ୍ୟ ଦୁରାରୋଗ୍ୟ ରେ ପୀଡିତ ହେଲେ ଆର୍ଥିକ ତଥା ମାନସିକ ସ୍ତରରେ ଭାଙ୍ଗି ପଡୁଥିଲା | ଏପରିକି କୌଣସି ସରକାରୀ କିମ୍ବା ବେସରକାରୀ ବଡ ଡାକ୍ତରଖାନାରେ ଚିକିତ୍ସା ପାଇଁ ନିଜର ସୁନା ଅଳଙ୍କାର ଏବଂ ଚାଷ ଜମିକୁ ବନ୍ଧକ ରଖିବାକୁ ବାଧ୍ୟ ହେଉଥିଲା | ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏହି ସବୁ ସମସ୍ୟାର ସମାଧାନ ଲକ୍ଷ୍ୟରେ ସ୍ମାର୍ଟ ହେଲଥ କାର୍ଡ ବ୍ୟବସ୍ଥା କରି ପ୍ରଶଂସାର ପାତ୍ର ସାଜିଛନ୍ତି | ଗତ ୧୪ ତାରିଖରେ ନୟାଗଡ଼ ଜିଲ୍ଲାରେ ସ୍ମାର୍ଟ ହେଲଥକାର୍ଡ ବଣ୍ଟନର ଶୁଭ ଉଦଘାଟନ କରିଥିଲେ ମାନ୍ୟବର ମୁଖ୍ୟମନ୍ତ୍ରୀ | ଇତ୍ୟାବଶର  ସେଦିନ ଦଶପଲ୍ଲା ବିଧାୟକ ତଥା ନୟାଗଡ଼ ବିଜେଡି ସଭାପତି ରମେଶ ଚନ୍ଦ୍ର ବେହେରାଙ୍କ ଦ୍ୱାରା ଗଣିଆ ବ୍ଳକ ପରିସରରେ ଉଦଘାଟନୀ ଉତ୍ସବ ପାଳନ ହୋଇଥିଲା | ଉକ୍ତ ଉତ୍ସବରେ କେବଳ ଗଣିଆ ପଞ୍ଚାୟତ ର ୫୦୭ ଜଣକୁ ଏହି ସ୍ମାର୍ଟ ହେଲଥ କାର୍ଡ ବଣ୍ଟନ କରାଯାଇଥିଲା | ଗଣିଆ ବ୍ଳକର ବାକି  ୭ଟି ପଞ୍ଚାୟତରେ ବିଡିଓ  ଶୁଭ୍ର ପଟେଲଙ୍କ ସଂଯୋଜନାରେ ଆଜି କାର୍ଡ ବଣ୍ଟନ କାର୍ଯ୍ୟକ୍ରମ ରେ ମୁଖ୍ୟ ଅତିଥିଭାବେ ଯୋଗଦେଇଛନ୍ତି ବିଧାୟକ ରମେଶ ଚନ୍ଦ୍ର ବେହେରା | ଉକ୍ତ ମାରାଥନ କାର୍ଡ ବଣ୍ଟନ କାର୍ଯ୍ୟକ୍ରମରେ ସମ୍ମାନିତ ଅତିଥିଭାବେ ଗଣିଆ ବ୍ଳକ ଅଧ୍ୟକ୍ଷ  ସେସଦେବ ସ୍ୱାଇଁ, କନ୍ଧମାଳ ସାଂସଦଙ୍କ ଜିଲ୍ଲା ପ୍ରତିନିଧି ତଥା କିଶୋରପ୍ରସାଦ ଗ୍ରାମ ପଞ୍ଚାୟତର ସମିତି ସଭ୍ୟ ସଦାଶିବ ମିଶ୍ର, ଜିଲ୍ଲା ପରିଷଦ ସଦସ୍ୟ ମହେଶ୍ୱର ମହାରଣା ପ୍ରମୁଖ ଯୋଗ ଦେଇଥିଲେ | ପ୍ରଥମେ ବଡ଼ସିଲିଂଗା ଗ୍ରାମପଞ୍ଚାୟତରୁ ଉକ୍ତ କାର୍ଡ ବଣ୍ଟନ କାର୍ଯ୍ୟକ୍ରମ ଆରମ୍ଭ ହୋଇ ଯଥାକ୍ରମେ ଛାମୁଣ୍ଡିଆ, ରାସଙ୍ଗ, ବେଲପଡା, କିଶୋରପ୍ରସାଦ, କରଡ଼ାପଡ଼ା ଏବଂ ଆଡକଟା ପଞ୍ଚାୟତରେ ସୁବ୍ୟବସ୍ଥିତ ଭାବେ ହିତାଧିକାରୀଙ୍କୁ ହେଲଥ କାର୍ଡ ସହିତ ନୂତନ ଭତା କାର୍ଡ ବଣ୍ଟନ କରାଯାଇଛି |ପ୍ରତେକ ପଞ୍ଚାୟତର ସରପଞ୍ଚ ଏବଂ ସମିତି ସଭ୍ୟ ମାନେ ଏହି କାର୍ଯ୍ୟକ୍ରମରେ ସମ୍ପୂର୍ଣ ସହଯୋଗ କରିଥିଲେ | ଆଜିର ଏହି କାର୍ଯ୍ୟକ୍ରମରେ ସମୁଦାୟ. ୮୫୦୩ ଜଣକୁ ସ୍ମାର୍ଟ ହେଲଥ କାର୍ଡ ବଣ୍ଟନ କରାଯାଇଛି | ଗଣିଆ ବ୍ଳକର ସମୁଦାୟ ୯୦୧୦  ଜଣ ହିତାଧିକାରୀଙ୍କ ପରିବାର ଏବେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସାମିଲ ହୋଇଥିବାରୁ ଅଞ୍ଚଳବାସୀ ମୁଖ୍ୟମନ୍ତ୍ରୀ  ନବୀନ ପଟ୍ଟନାୟକଙ୍କୁ ଭୁରି ପ୍ରଶଂସା କରିବା ସହିତ ହରିବୋଲ ହୁଳହୁଳି ଦେଇ ତାଙ୍କ ଦୀର୍ଘାୟୁ କାମନା କରିଛନ୍ତି | ଏପରିକି ବିଧାୟକ ଏବଂ ଅଧ୍ୟକ୍ଷଙ୍କୁ ମଧ୍ୟ ପ୍ରଶଂସା କରିବା ସହିତ ସମସ୍ତ ଯୋଜନା ଗୁଡିକ ଠିକ ଭାବେ ପହଞ୍ଚାଇବା ହେତୁ ଧନ୍ୟବାଦ ଅର୍ପଣ କରିଛନ୍ତି |