12-Dec-2021

କର୍ଲାମୁଣ୍ଡା:( ପ୍ରଦୀପ କୁମାର ସାହୁ): ଆବଶ୍ୟକ କର୍ମଚାରୀ ଅଭାବ ସାଙ୍ଗକୁ ଅଧିକାରୀ ମାନଙ୍କ ଆନ୍ତରିକତା ଅଭାବ ଯୋଗୁଁ ସାଧାରଣ ଲୋକଙ୍କ  ବ୍ଲକ ପ୍ରଶାସନ ପ୍ରତି ଭରସା ଦିନକୁ ଦିନ ତୁଟିବାରେ ଲାଗିଛି।ଏଭଳି ପରିସ୍ଥିତି  କଳାହାଣ୍ଡି ଜିଲ୍ଲା କର୍ଲାମୁଣ୍ଡା ବ୍ଲକରେ ଏବେ ଦେଖିବାକୁ ମିଳିଛି। ଏହି ବ୍ଲକ ଟି ୧୨ଟି ପଞ୍ଚାୟତକୁ ନେଇ ଗଠିତ ହୋଇଥିବା ବେଳେ ୧୨ଟି ପଞ୍ଚାୟତକୁ ମାତ୍ର ୭ଜଣ କାର୍ଯ୍ୟନିର୍ବାହୀ ଅଧିକାରୀ ଦାୟୀତ୍ୱ ରେ ରହିଛନ୍ତି।ଠିକ୍ ସେହିଭଳି ମ.ରାମପୁର ବ୍ଲକର ସହକାରୀ ଯନ୍ତ୍ରୀ ନିହାର ରଂଜନ ମାଝୀ ଓ  ଖାଉଟି ଯୋଗାଣ ଅଧିକାରୀ  ସାନ୍ତାକର ପଧାନ ମଧ୍ୟ କର୍ଲାମୁଣ୍ଡା ବ୍ଲକ ଅତିରିକ୍ତ ଦାୟିତ୍ୱରେ ଅଛନ୍ତି। ମାତ୍ର ୩ଜଣ  କନିଷ୍ଟ ଯନ୍ତ୍ରୀ ରହିଥିବାରୁ ୧୨ପଞ୍ଚାୟତ ର ଉନ୍ନୟନ କାର୍ଯ୍ୟ ଗୁଡିକ ଠିକ ଭାବେ ତଦାରଖ ହୋଇପାରୁ ନାହିଁ l ନିର୍ମାଣ କାର୍ଯ୍ୟ ଗୁଡିକର ସ୍ଥାୟୀତ୍ୱ ନେଇ ଏବେ ସନ୍ଦେହ ସୃଷ୍ଟି ହୋଇଛି।ଅନ୍ୟପଟେ ଦୀର୍ଘ ଦିନରୁ ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ,(ଡବ୍ଲୁଇଓ) ପ୍ରଗତି ସହାୟକ (ପିଏ), ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ (ଏବିଡ଼ିଓ)ପଦବୀ ଖାଲି ରହିଥିବାରୁ ବିବାହ ପଞ୍ଜିକରଣ ପ୍ରମାଣପତ୍ର ଲୋକେ ପାଇ ପାରୁ ନ ଥିବା ସାମାଜିକ କର୍ମୀ ସୁରେଶ ଚୌଧୁରୀ ଅଭିଯୋଗ କରିଛନ୍ତି ।ଠିକ ସେହିପରି ନରେଗା ଏପିଓ, କ୍ୟାଶିଅର ପଦବୀ ଭଳି ଅନେକ ପଦବୀ ଗୁଡିକ ଖାଲି ରହିଥିବାରୁ ସାଧାରଣ ଲୋକେ ଅନେକ ସମୟରେ ହଇରାଣ ହେଉଥିବା ଦେଖିବାଜୁ ମିଳିଛି।ଏହା ଛଡା ବ୍ଲକର ଉଦ୍ୟାନ ବିଭାଗ,ମୃତ୍ତିକା ସରକ୍ଷଣ ବିଭାଗ, ଫିସରୀ ବିଭାଗର କର୍ମଚାରୀ ମାନେ ବ୍ଲକ କାର୍ଯ୍ୟଲୟ କୁ ନିୟମିତ ଭାବେ ଆସୁ ନ ଥିବାରୁ ଲୋକଙ୍କ ନିକଟକୁ ସରକାରୀ ଯୋଜନା ଠିକ୍ ଭାବେ ପହଞ୍ଚି ପାରୁ ନଥିବା ସାମାଜିକ କର୍ମୀ ପ୍ରଦୀପ କୁମାର ରଣା କହିଛନ୍ତି।ଏଣୁ ଏଥିପାଇଁ ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କରିଛନ୍ତି।