06-Dec-2021

କେନ୍ଦ୍ରାପଡ଼ା(ଶିବ ପ୍ରସାଦ ସେନାପତି) : ବାତ୍ୟା ଜୱାଦ ସମଗ୍ର କେନ୍ଦ୍ରାପଡ଼ା ଅଂଚଳରେ   ନାହିଁ ନଥିବା କ୍ଷୟକ୍ଷତି ଘଟାଇଛି । ଏହି  ଜିଲ୍ଲାର ଗରଦପୁର ବ୍ଲକ ଅର୍ନ୍ତଗତ ବଡ଼ବେତରା ଗ୍ରାମ ପଞ୍ଚାୟତରେ  ଧାନ ଫସଲର ବ୍ୟାପକ କ୍ଷତି ହୋଇଛି | ଧାନସବୁ ପାଚି ବିଲରେ ଛିଡ଼ା ହୋଇଥିବା ବେଳେ ପ୍ରଥମେ ପବନ ତାକୁ ପକାଇଦେଲା | ପରେ ବ୍ୟାପକ ବର୍ଷା ଯୋଗୁ ଏବେ ସବୁ ଧାନ ବିଲରେ ପାଣି ଛିଡ଼ା ହୋଇଛି | ପାଚିଲାଧାନ ବିଲରେ ଗଜା ହୋଇଯିବାର ସମ୍ଭାବନା ଦେଖାଦେଇଛି | ଚାଷୀକୂଳ ମୁଣ୍ଡରେ ହାତ ଦେଇ ବସିଛନ୍ତି |   କ୍ଷତିଗ୍ରସ୍ତ ଚାଷୀଙ୍କୁ ଆର୍ଥୀକ କ୍ଷତି ପୂରଣ ଦିଆଯିବା ନିମନ୍ତେ ସାଧାରଣରେ ଦୃଢ ଦାବି ହୋଇଛି ।

ବାତ୍ୟା ଜୱାଦ ଯୋଗୁ  ପଞ୍ଚାୟତର ବଡ଼ବେତରା, ଭାରିଗୋଳ, କୁସୁନପୁର, ପଟିକିରା ପ୍ରଭୃତ ଗ୍ରାମରେ ଶହ ଶହ ଏକର ଚାଷଜମିରେ ପାଣି ଜମିଥିବାରୁ ଧାନ ଫସଲ ଅମଳ କରିବା ଆଶା ମଉଳି ଯିବାକୁ ବସିଛି | ଚଳିତ ବର୍ଷ ସ୍ଥାନୀୟ ଅଂଚଳର ଚାଷୀମାନେ ସ୍ଥାନୀୟ ବିଭିନ୍ନ ଜାତୀୟ କରଣ ବ୍ୟାଙ୍କ, ସମବାୟ ସମିତି,ଘରୋଇ ଅର୍ଥ ଲଗାଣକାରୀ ସଂସ୍ଥାରୁ ଋଣ ଆଣି ଏପରିକି କେତେକ ଚାଷୀ ଗାଁ ମହାଜନଙ୍କ ଠାରୁ ହାତ ଊଧାରୀ ଆଣି ଧାନଚାଷ କରିଥିଲେ ।

ଚଳିତ ବର୍ଷ ଏହି ଅଂଚଳରେ ଧାନ ଫସଲ ବେଶ ଭଲ ହୋଇଥିଲା । ଫଳରେ ଧାନ ଫସଲ ଉତ୍ପାଦନ ନିମନ୍ତେ ଚାଷୀ ବ୍ୟଗ୍ର ହୋଇ ଉଠୁଥିଲା ବେଳେ ଆକସ୍ମିକ ଭାବେ ବାତ୍ୟା ଜୱାଦ ଚାଷୀ ମୁଣ୍ଡରେ ଏକ ରକମ ଚଡକ ପକାଇଥିଲା । ସ୍ଥାନୀୟ ଅଂଚଳର ପ୍ରାୟ ଅଧିକାଂଶ ଜମିରେ ଧାନ ଫସଲ ସମ୍ପୂର୍ଣ୍ଣ ପାଚି ଯାଇଛି । ଚାଷୀ ଧାନ କାଟିବା ନିମନ୍ତେ ପ୍ରସ୍ତୁତ ହେଉଥିଲା ବେଳେ ଏହି ବାତ୍ୟା ଚାଷୀ ନିମନ୍ତେ ଦାଉ ସାଜିଛି । ସରକାର ଏଥିପ୍ରତି ତୁରନ୍ତ ଧ୍ୟାନ ଦେଇ ଚାଷୀଙ୍କୁ କ୍ଷତିପୂରଣ ଦେବାକୁ ଦାବୀ ହେଉଛି।