19-Nov-2021

 ବିନିକା(ହିମାଂଶୁ ଶେଖର ପୁଟେଲ) ବିନିକାର ସୌଲପୁର - ଅନ୍ତର୍ଡା ରାସ୍ତାରେ ଟ୍ରାକ୍ଟର ଓ ବାଇକ ମଧ୍ୟରେ ମୁହାମୁହିଁ ଧକ୍କା ହେବାରୁ ୨ଜଣଙ୍କ ମୃତ୍ୟୁ ଘଟି ଥିବା ବେକେ ଜଣେ ଗୁରୁତର ଆହତ ହୋଇ ବୁର୍ଲା ଡ଼ାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡ଼ିଛି l ପୋଲିସ ସୂତ୍ରରୁ ପ୍ରକାଶ ଯେ ବିନିକା ବ୍ଲକ ଅନ୍ତର୍ଡ଼ା ଗ୍ରାମର ଶିବ ସୁନା(୧୬),ଗୁରୁଦେବ ସୁନା(୧୬) ଓ ପୂର୍ଣ୍ଣଚନ୍ଦ୍ର ସୁନା(୧୯) ଗ୍ଲେମ୍ବର ବାଇକ ନଂ OD-31C 2405  ଯୋଗେ ବିନିକା ପଟରୁ ସୈାଳପୁର ରାସ୍ତା ଦେଇ ଘରକୁ ଯାଉଥିଲେ l ଠିକ ସେହି ସମୟରେ ଅନ୍ତର୍ଡ଼ା ପଟରୁ  ଉକ୍ତ ରାସ୍ତାଦେଇ ଆସୁଥିବା ଟ୍ରାକ୍ଟର ନଂ OR-25B 5705 ସହିତ ମୁହାଁ ମୁହିଁ ଧକ୍କା ହୋଇଥିଲା ଫଳରେ ବାଇକରେ ଥିବା ୩ଜଣ ଯାକ ଗୁରୁତର ଆହତ ହୋଇଥିଲେ l ଖବର ପାଇ ଦୁର୍ଘଟଣା ସ୍ଥଳକୁ

ଅଗ୍ନିଶମ ଓ ଆମ୍ବୁଲାନ୍ସ ଗାଡ଼ି ପହଞ୍ଚି ଆହତ ବ୍ୟକ୍ତିଙ୍କୁ ତ୍ୱରିତ ବିନିକା ଡାକ୍ତରଖାନାକୁ ଆଣି ଭର୍ତି କରାଯାଇଥିଲା l ଡାକ୍ତର ଦେଖିବା ପରେ ଶିବ ସୁନାକୁ ମୃତ ଘୋଷଣା କରିଥିବା ବେକେ ଅନ୍ୟ ୨ଜଣଙ୍କ ଅବସ୍ଥା ଗୁରୁତର ଥିବାରୁ ବୁର୍ଲା ସ୍ଥାନାନ୍ତରିତ କରିଥିଲେ l ତେବେ ବୁର୍ଲା ଡ଼ାକ୍ତରଖାନାରେ ପହଞ୍ଚିବା ପରେ ଡାକ୍ତର ଗୁରୁଦେବ ସୁନାକୁ ମୃତ ଘୋଷଣା କରିଥିଲେ l ଅନ୍ୟ ଗୁରୁତର ପୂର୍ଣ୍ଣଚନ୍ଦ୍ର ସୁନା ବର୍ତ୍ତମାନ ବୁର୍ଲାରେ ଚିକିତ୍ସାଧୀନ ଅଛନ୍ତି l ବିନିକାରେ ମୃତ ଶିବ ସୁନାର ଶବ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଛି l ପୋଲିସ ଘଟଣା ସ୍ଥଳରେ ପହଞ୍ଚି ବାଇକ ଓ ଟ୍ରାକ୍ଟର କୁ ଜବତ କରିଛି l ତେବେ ଏହି ଘଟଣା ପରେ ଅନ୍ତାର୍ଡା ଅଞ୍ଚଳରେ ଶୋକର ଛାୟା ଖେଳିଯାଇଛି l