03-Nov-2021

ଧର୍ମଗଡ଼ ( ଜ୍ୟୋତିରଞ୍ଜନ ବେମାଲ).                     ସରକାର ଗ୍ରାମାଂଚଳର ଶ୍ରମିକ ମାନଙ୍କୁ ଦୈନିକ କାମ ଯୋଗାଇ ଦେଇ ପରିବାର ପ୍ରତିପୋଷଣ କରିବାକୁ ସ୍ୱାବଲମ୍ବୀ କରିବା ପାଇଁ ବିଭିନ୍ନ ଯୋଜନା କରୁଛନ୍ତି । ହେଲେ ରାଜ୍ୟ ସରକାର ଏହି ଯୋଜନାରେ ଶ୍ରମିକ ମାନଙ୍କୁ କାମ ଯୋଗାଇ ଦେଇପାରୁନଥିବାରୁ ଗ୍ରମାଂଚଳରେ ଥିବା ଶ୍ରମିକ ମାନେ କାମ ଅଭାବରୁ ନିଜ ଜୀବନକୁ ଦଲାଲ ହାତରେ ଟେକି ଦେଇ ବାହାର ରାଜ୍ୟକୁ ଦାଦନ ଖଟିବାକୁ ଯିବାକୁ ବାଧ୍ୟ ହେଉଛନ୍ତି ଏବଂ ମାନସିକ ଓ ଶାରିରିକ ନିର୍ଯ୍ୟାତନାର ଶିକାର ହେଉଛନ୍ତି । ଏଭଳି ଏକ ଅଭିଯୋଗ ଆସିଛି କଳାହାଣ୍ଡି ଜିଲ୍ଲା ଧର୍ମଗଡ ବ୍ଲକ ରଏନଗୁଡା ଗାଁରୁ ।  ଧର୍ମଗଡ ବ୍ଲକ ଜୟନ୍ତପୁର ପଂଚାୟତ ର ରଏନଗୁଡା ଗାଁ   ଏହି ଗାଁର ଅଧିକାଂଶ ଲୋକେ କୁଲି ମଜୁରି କରି ନିଜର ପରିବାରର ଭରଣପୋଷଣ କରିଥାନ୍ତି । ହେଲେ କାମ ଧନ୍ଦା ଅଭାବରୁ ନିଜ ଜୀବନକୁ ଦାଦନ ଦଲାଲ ହାତରେ ବିକ୍ରି କରି ଏବେ ମାନସିକ ଓ ଶାରିରିକ ନିର୍ଯ୍ୟାତନାର ଶିକାର ହେଉଥିବା ଅଭିଯୋଗ ଆସିଛି । ରଏନଗୁଡା ଗ୍ରାମର ୧୦ରୁ ଉର୍ଦ୍ଧ୍ୱ ଲୋକ କୋକସରା ବ୍ଲକ ବଡପୋଡାଗୁଡା ଗ୍ରାମର ଦାଦନ ଦଲାଲ କାଳିଆ ମେହେର ର ପ୍ରଲୋଭନରେ ଆସି ଦାଦନ ଖଟିବା ପାଇଁ ନବରଙ୍ଗପୁର ଜିଲ୍ଲା ଉମରକୋଟ କୁ କାମ ପାଇଁ ଯାଇଥିଲେ । ହେଲେ ଦାଦନ ଦଲାଲ ତାଙ୍କୁ ଉମରକୋଟ ଠାରେ ଛାଡି ଫେରାର ମାରିବା ପରେ ଉମରକୋଟ ଠାରେ ଥିବା ଦୁଇ ଜଣ ଦାଦନ ଦଲାଲ ତାଙ୍କୁ ନେଇ ଆନ୍ଧ୍ରପ୍ରଦେଶରେ ଖଟାଉଥିବା ଅଭେିଯାଗ ଆସିଛି । ଆନ୍ଧ୍ରପ୍ରଦେଶରେ ରଏନଗୁଡାର ଶ୍ରମିକ ମାନଙ୍କୁ ମାନସିକ ଓ ଶାରିରିକ ନିର୍ଯ୍ୟାତନା ଦେଉଥିବା ଶ୍ରମିକ ମାନେ ନିଜ ପରିବାରକୁ ଫୋନ ଯୋଗେ ଜଣାଇବାରୁ ଜୟନ୍ତପୁର ସରପଂଚଙ୍କୁ ସହିତ ସମସ୍ତ ପରିବାର ବର୍ଗ ଆସି ଧର୍ମଗଡ ଉପଜିଲ୍ଲାପାଳ ଠାରେ ଶ୍ରମିକ ମାନଙ୍କୁ ଉଦ୍ଧାର ପାଇଁ ଜଣାଇଛନ୍ତି । ତେବେ ଧର୍ମଗଡ ବ୍ଲକରେ ମନରେଗା ଯୋଜନାରେ କାମ ଯୋଗାଇ ଦିଆଯାଉନଥିବା ଯୋଗୁଁ ବାଧ୍ୟ ହୋଇ ଶ୍ରମିକ ମାନେ ରାଜ୍ୟ ବାହାରକୁ ଯାଇ ଦାଦନ ହୋଇ ନିର୍ଯ୍ୟାତନାର ଶିକାର ହେଉଥୀବା ଅଭିଯୋଗ କରିଛନ୍ତି ଜୟନ୍ତପୁର ସରପଂଚ । ଅନ୍ୟପଟେ ଜିଲ୍ଲା ଶ୍ରମ ଅଧିକାରୀଙ୍କ ସହିତ ଯୋଗାଯୋଗ କରି ଦାଦନ ମାନଙ୍କୁ ଶିଘ୍ର ଉଦ୍ଧାର କରାଯିବ ବୋଲି ସହକାରୀ ଜିଲ୍ଲାପାଳ କହିଛନ୍ତି । କେନ୍ଦ୍ର ସରକାରଙ୍କ ଶ୍ରମିକ ମାନଙ୍କ ପାଇଁ ରହିଥିବା ମନରେଗା ଯୋଜନାକୁ ସ୍ଥାନୀୟ ପ୍ରଶାସନିକ ସଠିକ ଭାବେ କାର୍ଯ୍ୟକାରୀ ନକଲେ ଏମିତି ଦାଦନ ସଂଖ୍ୟା ବଢିବା ସହ ନିର୍ଯ୍ୟାତିତ ହୋଇ ମୃତ୍ୟୁବରଣ କରି ଫେରୁଥିବେ ଦାଦନ ବୋଲି ସାଧାରଣରେ ଚର୍ଚ୍ଚା ହେଉଛି।