29-Oct-2021

ବଲାଙ୍ଗୀର/ଲୋଇସିଂହା, (ବିନୋଦ କୁମାର ଦୀପ): ବଲାଙ୍ଗିର ଜିଲ୍ଲା ଲୋଇସିଂହା ଥାନା ଫାସଡ଼ ନିକଟସ୍ଥ ସକମା ଠାରେ ଥିବା ଯୁବୋଦୟ କଲେଜ ମହିଳା ହଷ୍ଟେଲରେ ଆତ୍ମହତ୍ୟା  କରିଥିବା ଯୁକ୍ତ ୨ ବିଜ୍ଞାନ ଛାତ୍ରୀ ଆଶା ମେହେରଙ୍କ ପରିବାର ତାଙ୍କ ଝିଅକୁ ହତ୍ୟା କରିଥିବା ଅଭିଯୋଗ କରିଛନ୍ତି l ବରଗଡ଼ ଜିଲ୍ଲା ବୁଡେନ ଥାନା ଦହିତା ଗ୍ରାମର ମହୀରାମ ମେହେରଙ୍କ ଝିଅ ଆଶା ଯୁବୋଦୟ କଲେଜର ଯୁକ୍ତ ୨ ବିଜ୍ଞାନ ଦ୍ଵିତୀୟ ବର୍ଷର ଛାତ୍ରୀ ଥିଲେ l ଦଶହରା ଛୁଟି ସରିବା ପରେ ମାତ୍ର କିଛି ଦିନ ପୂର୍ବରୁ ସେ ଘରୁ ହଷ୍ଟେଲକୁ ଆସିଥିଲେ l ଘରୁ ଆସିବା ବେଳେ ତାଙ୍କ ସ୍ୱାସ୍ଥ୍ୟ ଠିକ ଥିବା ସହିତ ସେ ବେଶ ଖୁସି ଜଣା ପଡୁଥିଲେ l କାହାରି ସହିତ ତାଙ୍କ ଶତ୍ରୁତା ମଧ୍ୟ ନ ଥିବା ପରିବାର ଲୋକେ ପ୍ରକାଶ କରିଛନ୍ତି l ହଠାତ ତାଙ୍କ ଦେହ ଖରାପ ହେବା ନେଇ ହଷ୍ଟେଲ କର୍ତ୍ତୃପକ୍ଷ ମୃତା ଛାତ୍ରୀଙ୍କ ପରିବାର ଲୋକଙ୍କୁ ଖବର ଦେଇଥିଲେ l ପରିବାର ଲୋକେ ଆସିବା ପରେ ହଷ୍ଟେଲ ସିଲିଂ ଫ୍ୟାନରେ ଆଶାଙ୍କ ଝୁଲନ୍ତା ମୃତଦେହ ଦେଖିବାକୁ ପାଇଥିଲେ l ତେବେ ଆଶାଙ୍କୁ ହତ୍ୟା କରାଯାଇଥିବା ନେଇ ତାଙ୍କ ସମ୍ପର୍କୀୟ ଭାଇ ଧୀରେନ୍ଦ୍ର ମେହେର ଅଭିଯୋଗ କରିଛନ୍ତି l ଅପରପକ୍ଷରେ ପରିବାର ଲୋକଙ୍କ ଅଭିଯୋଗକୁ ଖଣ୍ଡନ କରିଛନ୍ତି କଲେଜ କର୍ତ୍ତୃପକ୍ଷ l ଛାତ୍ରୀ ଜଣକ ତାଙ୍କ ସାଙ୍ଗମାନଙ୍କ ଅନୁପସ୍ଥିତିର ସୁଯୋଗ ନେଇ କୌଣସି କାରଣରୁ ହଷ୍ଟେଲ କୋଠରୀରେ ଆତ୍ମହତ୍ୟା କରିଥିବା କଲେଜ କର୍ତ୍ତୃପକ୍ଷ ପ୍ରକାଶ କରିଛନ୍ତି l ଏପରିକି ଛାତ୍ରୀଙ୍କ ଆତ୍ମହତ୍ୟା ଖବର ଜଣାପଡିବା ପରେ ସଙ୍ଗେ ସଙ୍ଗେ ସ୍ଥାନୀୟ ପୋଲିସ ଓ ମୃତା ଛାତ୍ରୀଙ୍କ ପରିବାର ଲୋକଙ୍କୁ ଖବର ଦିଆଯାଇଥିବା କଲେଜ ନିର୍ଦ୍ଦେଶକ ଅମ୍ବରିଶ ଦାସ ପ୍ରକାଶ କରିଛନ୍ତି l ଏଥିସହିତ ନିରପେକ୍ଷ ତଦନ୍ତ ପାଇଁ ପୋଲିସକୁ ସମସ୍ତ ପ୍ରକାର ସହଯୋଗ କରାଯାଉଛି ବୋଲି ସେ ଗଣମାଧ୍ୟମ ସମ୍ମୁଖରେ ସୂଚନା ଦେଇଥିଲେ l  ଲୋଇସିଂହା ପୋଲିସ ଏ ନେଇ କେସ ନଂ-25/2021ରେ ଏକ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଥିବା ଜଣାଯାଇଛି l ଅପରପକ୍ଷରେ ଛାତ୍ରୀ ଆତ୍ମହତ୍ୟା ଘଟଣା ପରେ ହଷ୍ଟେଲରେ ରହୁଥିବା ଅନ୍ୟ ଛାତ୍ରୀମାନେ ଭୟଭୀତ ଅବସ୍ଥାରେ ରହିଛନ୍ତି l ଅଭିଭାବକ ମାନେ ତାଙ୍କ ପିଲାଛୁଆଙ୍କୁ ହଷ୍ଟେଲରୁ ଘରକୁ ନେଇ ଯାଉଥିବା ଦେଖିବାକୁ ମିଳିଛି l ହଷ୍ଟେଲରେ କେତେଛାତ୍ରୀ ରହୁଥିଲେ ସେ ନେଇ କର୍ତ୍ତୃପକ୍ଷ କୌଣସି ସୂଚନା ଦେବାକୁ ମନା କରିବା ବେଳେ ପ୍ରାୟ 50 ରୁ ଅଧିକ ଛାତ୍ରୀ ହଷ୍ଟେଲ ଛାଡି ସୁରକ୍ଷିତ ମନେ କରିଛନ୍ତି l