27-Oct-2021

ନୟାଗଡ଼,(ପ୍ରଦୀପ କୁମାର ପଣ୍ଡା) ଭିନ୍ନକ୍ଷମଙ୍କ ଶିକ୍ଷା ପୁନର୍ବାସ ଓ ସଶକ୍ତି କରଣ ଦିଗରେ କାର୍ୟ୍ୟରତ ସ୍ବେଚ୍ଛାସେବୀ ସଂଗଠନ ସେବା ଦ୍ଵାରା ଦୃଷ୍ଟିହୀନ ଛାତ୍ର ଛାତ୍ରୀମାନଙ୍କୁ ରେଡିଓ ବଣ୍ଟନ କାର୍ୟକ୍ରମ ଅନୁଷ୍ଠିତ ହୋଇଯାଇଛି। ନୟାଗଡ଼ ଜିଲ୍ଲାର ବିଭିନ୍ନ ବ୍ଲକରେ ଜାତୀୟ ଦୃଷ୍ଟିବାଧିତ ଅନୁଷ୍ଠାନ, ମୁମ୍ବାଇଙ୍କ ଆର୍ଥିକ ଓ ବୈଷୟିକ ସହାୟତାରେ ସେବା ଦ୍ଵାରା ପରିଚାଳିତ ଦୃଷ୍ଟି ବାଧିତ ଛାତ୍ର ଛାତ୍ରୀମାନଙ୍କ ନିମନ୍ତେ ସମନ୍ଵିତ ଶିକ୍ଷା ଯୋଜନା ଅନ୍ତର୍ଗତ ସମସ୍ତ ୩୦ ଜଣ ଦୃଷ୍ଟି ହୀନ ଛାତ୍ର ଛାତ୍ରୀମାନେ ଏହା ଦ୍ଵାରା ରେଡ଼ିଓ ପାଠଶାଳା ଓ ଶିକ୍ଷା ସୁରଭି କାର୍ୟକ୍ରମ ମାଧ୍ୟମରେ ଘରେ ଶିକ୍ଷା ଗ୍ରହଣ କରି ପାରିବେ। ଏହି ଅବସରରେ ସେବାର ଉପସଭାପତି ସଞ୍ଜୟ କୁମାର ସୁବୁଦ୍ଧିଙ୍କ ଅଧ୍ୟକ୍ଷତାରେ ଆୟୋଜିତ ଉତ୍ସବରେ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ସର୍ବେଶ୍ଵର ପାଣିଗ୍ରାହୀ ମୁଖ୍ୟ ଅତିଥି ରୁପେ ଯୋଗ ଦେଇ ରାଜ୍ୟ ସରକାରଙ୍କ ବିଦ୍ୟାଳୟ ଗଣ ଶିକ୍ଷା ବିଭାଗ ଦ୍ଵାରା କୋରାନା ମହାମାରୀ ଯୋଗୁଁ ବିଦ୍ୟାଳୟ ଆସି ପାରୁନଥିବା ଛାତ୍ର ଛାତ୍ରୀମାନଙ୍କ ପାଇଁ ଆରମ୍ଭ ହୋଇଥିବା ରେଡିଓ ପାଠଶାଳା ଓ ସ୍ବେଚ୍ଛାସେବୀ ସଂଗଠନ “ଆଇଆଇସି’ ଦ୍ଵାରା ଆରମ୍ଭ ହୋଇଥିବା “ଶିକ୍ଷା ସୁରଭି’କୁ ରେଡିଓମାଧ୍ୟମରେ ଶୁଣିବା ପାଇଁ ଦୃଷ୍ଟି ବାଧିତ ଛାତ୍ର ଛାତ୍ରୀ ମାନଙ୍କ ପାଇଁ ଅତ୍ୟନ୍ତ ଲାଭ ଦାୟକ ହେବ ବୋଲି ମତବ୍ୟକ୍ତ କରିଥିଲେ। ସମ୍ମାନିତ ଅତିଥି ରୁପେ ସେବାର ସାଧାରଣ ସମ୍ପାଦକ ଅମରେନ୍ଦ୍ର କୁମାର ଦାସ ପରିଜା ଓ ବରିଷ୍ଠ ସଭ୍ୟ ହରେକୃଷ୍ଣ ପରମଗୁରୁ ଯୋଗ ଦେଇ ଦୃଷ୍ଟି ହୀନ ଶିଶୁଙ୍କ ଶିକ୍ଷାଦାନରେ ରେଡିଓର ଭୂମିକା ଉପରେ ଆଲୋକପାତ କରିଥିଲେ। ସେବା ସ୍ଵତନ୍ତ୍ର ବିଦ୍ୟାଳୟର ଅଧକ୍ଷ ବୈକୁଣ୍ଠ ନାଥ ମହାପାତ୍ର ଧନ୍ୟବାଦ ଅର୍ପଣ କରିଥିଲେ। ସମନ୍ଵିତ ଶିକ୍ଷା ପ୍ରକଳ୍ପର ଶିକ୍ଷୟତ୍ରୀ ପାୟସ୍ୱିନି ରଥ, ଶିକ୍ଷକ ଲୋକଜିତ ପରିଡ଼ା, ନବ କିଶୋର ମଲ୍ଲିକ, ଦିଲ୍ଲୀପ କୁମାର ସାହୁ, ବିଚିତ୍ର ପ୍ରଧାନ ଓ ପ୍ରଶାନ୍ତ କୁମାର ସାହୁ ସହଯୋଗ କରିଥିଲେ।