02-Nov-2020

ବଲାଙ୍ଗିର, (ସନ୍ତୋଷ କୁମାର ଠାକୁର): ଖରିଫ୍ ଧାନ ଫସଲ ବୀମା ପ୍ରଦାନରେ ବିଳମ୍ବ, ପାତର ଅନ୍ତର, ବିଭାଜନ ପ୍ରକ୍ରିୟା କରାଯାଉଛି ବୋଲି କୋସଲ ରାଜ୍ୟ ସମନ୍ୱୟ ସମିତି ଅଭିଯୋଗ କରିଛି । ଏଥି ପାଇଁ କୋସଲ ରାଜ୍ୟ ସମନ୍ୱୟ ସମିତି ତରଫରୁ ଫସଲବୀମା ଶିଘ୍ର ପ୍ରଦାନ ଦାବିକୁ ନେଇ ଆନ୍ଦୋଳନ କରିବାକୁ ନିଷ୍ପତ୍ତି ନିଆଯାଇଛି । ପ୍ରଥମ ପର୍ଯ୍ୟାୟରେ ଦେଓଗାଁ ବ୍ଲକ ମଧ୍ୟରେ କୋସଲ ରାଜ୍ୟ ସମନ୍ୱୟ ସମିତି ତରଫରୁ କେନ୍ଦ୍ରୀୟ ଉପାଧ୍ୟକ୍ଷ ମନୋରଂଜନ ସାହୁ ଓ ସାଧାରଣ ସଂପାଦକ ବିଭୁଦତ୍ତ ମିଶ୍ରଙ୍କ ନେତୃତ୍ୱରେ ବିଭିନ୍ନ ପଂଚାୟତର ଚାଷୀମାନଙ୍କୁ ସଂଗଠିତ କରି ଆସନ୍ତା ତା.୦୬.୧୧.୨୦୨୦ରେ ଦେଓଗାଁ ତହସିଲଦାର ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ଦାବିପତ୍ର ପ୍ରଦାନ କରିବା ପାଇଁ ପ୍ରସ୍ତୁତି ବୈଠକରେ ନିଷ୍ପତ୍ତିି ନିଆଯାଇଛି । ଆଜି ଦେଓଗାଁ ବ୍ଲକର ଗାଇବାହାଲ, ସିକୁଆଁ ଓ ବଡବନ୍ଧ ଠାରେ ଡା.ଶୁଶାନ୍ତ କୁମାର ଚାନ୍ଦଙ୍କ ସଭାପତିତ୍ୱରେ ଯଥାକ୍ରମେ ଶିବ ବିଶ୍ୱାଲ, ନବିନ ପ୍ରଧାନ ଓ ମାନଭଞ୍ଜନ ଗଡତ୍ୟାଙ୍କ ନେତୃତ୍ୱରେ  ଉକ୍ତ ତିନୋଟି ପଂଚାୟତରେ ଚାଷୀମାନଙ୍କର ବୈଠକ ଅନୁଷ୍ଠିତ ହୋଇଥିଲା ।  ଏଥିରେ କୋସଲ ରାଜ୍ୟ ସମନ୍ୱୟ ସମିତିର କେନ୍ଦ୍ରୀୟ ଉପାଧ୍ୟକ୍ଷ ଶ୍ରୀ ସାହୁ, ସବୁ କ୍ଷେତ୍ରରେ ଏପରି କି କୃଷି, ଶିକ୍ଷା ଓ ସ୍ୱାସ୍ଥ୍ୟ ପରି ଗୁରୁତ୍ୱପୂର୍ଣ୍ଣ ବିଭାଗରେ ସରକାର ପାତରଅନ୍ତର ନିତି ଅବଲମ୍ବନ କରୁଛନ୍ତି ଓ ଏହାର ଏକମାତ୍ର ବିକଳ୍ପ ସ୍ୱତନ୍ତ୍ର କୋସଲ ରାଜ୍ୟ ବୋଲି ମତବ୍ୟକ୍ତ କରିଥିଲେ । ସାଧାରଣ ସଂପାଦକ ଶ୍ରୀ ମିଶ୍ର ଫସଲବୀମା ଓ ଚାଷୀମାନଙ୍କର ବିଭିନ୍ନ ସମସ୍ୟା ଉପରେ ଆଲୋଚନା କରି ଚାଷୀମାନେ ସଂଗଠିତ ହେବାକୁ ପରାମର୍ଶ ଦେଇଥିଲେ । ଆଗାମୀ ଦିନରେ ଏ ଅଂଚଳର ସମସ୍ତ କୃଷକମାନଙ୍କୁ ସଂଗଠିତ କରି ଏକ ବଡ ଧରଣର ଚାଷୀ ଆନ୍ଦୋଳନ ତଥା ସ୍ୱତନ୍ତ୍ର କୋସଲ ରାଜ୍ୟ ଦାବିର ଆନ୍ଦୋଳନକୁ ତିବ୍ରତର କରାଯିବ ବୋଲି ବୈଠକରେ ପ୍ରକାଶ କରିଥିଲେ ।