15-Sep-2021

ବିନିକା (ହିମାଂଶୁ ଶେଖର ପୁଟେଲ) ମଙ୍ଗଳବାର ଅପରାହ୍ନରେ ୩ଜଣ ବ୍ୟକ୍ତି ବାପା,ପୁଅ ଓ ଜ୍ବାଇଁ କଇଁଛ ମାରିବାକୁ ଯାଇ ଏକ କୂଅରେ ଶ୍ୱାସରୁଦ୍ଧ ହୋଇ ମୃତ୍ୟୁବରଣ କରିବା ଭଳି ଅଭାବନୀୟ ଘଟଣା ସାରା ଅଞ୍ଚଳରେ ଶୋକର ଛାୟା ଖେଳି ଯାଇଛି lଘଟଣାରୁ ପ୍ରକାଶ ଯେ ବିନିକା ବ୍ଲକ ଅନ୍ତର୍ଗତ କୁହିବାହାଲ ପଞ୍ଚାୟତ ଆନନ୍ଦପୁର ଗ୍ରାମର ସାଧୁ କାଳସେ (୫୫),ପୁଅ ଆଲୋକ କାଲସେ(୨୧) ଜ୍ବାଇଁ ନବୀନ ମଟାରି(୩୧) ପ୍ରମୁଖ ୩ଜଣ ବ୍ୟକ୍ତି କଇଁଛ ଶିକାର ପାଇଁ ନିକଟସ୍ଥ ଏକ ପରିତ୍ୟକ୍ତ କୁଅ ଭିତରକୁ ପଶିଥିଲେ l ହେଲେ ସେଠାରୁ କେହିବି ବାହାରି ବାକୁ ସମର୍ଥ ହୋଇ ପାରି ନ ଥିଲେ l ଫଳରେ ସେମାନେ ଶ୍ୱାସରୁଦ୍ଧ ହୋଇ କୁଅ ଭିତରେ ହିଁ ମୃତ୍ୟୁ ବରଣ କରିଥିବା ଲୋକଙ୍କ ମଧ୍ୟରେ ସନ୍ଦେହ ଘନୀଭୂତ ହୋଇଥିଲା l ଏହି ଖବର ପ୍ରଚାରିତ ହେବାପରେ ପରିତ୍ୟକ୍ତ କୂଅ ପରିସରରେ ଲୋକଙ୍କ ନାହିଁ ନ ଥିବା ଭିଡ଼ ଜମିଥିଲା l ଶେଷରେ ଉପସ୍ଥିତ ଲୋକେ ବିନିକା ଦମକଳ ବାହିନୀକୁ ଖବର ଦେବା ପରେ ତ୍ୱରିତ ଅଗ୍ନିଶମ କର୍ମଚାରୀ ଘଟଣା ସ୍ଥଳରେ ପହଞ୍ଚି କୂଅ ଭିତରୁ ସେମାନଙ୍କୁ ଉଦ୍ଧାର କରି ବିନିକା ଡାକ୍ତରଖାନାକୁ ଚିକିତ୍ସା ପାଇଁ ଆଣିଥିଲେ l ହେଲେ ଡାକ୍ତର ଦେଖିବା ପରେ ୩ଜଣଙ୍କ ମୃତ୍ୟୁ ଘୋଷଣା କରିଥିଲେ l ଆଜି ମୃତ ୩ଜଣଙ୍କ ଶବ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯିବ  ବୋଲି ଡାକ୍ତରଖାନା ସୂତ୍ରରୁ ଜଣାପଡିଛି l ତେବେ ଏହି ଅଭାବନୀୟ ଦୁଃଖଦ ଘଟଣା ପରେ ଅଞ୍ଚଳରେ ଶୋକର ଛାୟା ଖେଳି ଯାଇଛି l