08-Sep-2021

ବଲାଙ୍ଗିର,(ପ୍ରେରଣା ଖବର) ବଲାଙ୍ଗିର ଜିଲ୍ଲା ମଧୁବୈଶ୍ୟ/ଗୁଡିଆ ସମାଜର ବୈଠକରେ ପୂର୍ବ ନିଷ୍ପତ୍ତି ଅନୁଯାୟୀ ମହାମହିମ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କ ମାଧ୍ୟମରେ ସମାଜ ତରଫରୁ ଏକ ଦାବିପତ୍ର ପ୍ରଦାନ କରାଯାଇଛି । ଦାବିପତ୍ର ଅନୁସାରେ ମଣ୍ଡଳ ଆୟୋଗ ଅନୁଯାୟୀ ଓବିସି ସଂଖ୍ୟା ୫୨ ପ୍ରତିଶତ ହେବ ବୋଲି ଆକଳନ କରାଯାଇଛି । କିନ୍ତୁ ଏହା ଉପରେ କୌଣସି ପ୍ରାମାଣିକ ତଥ୍ୟାବଳି କେନ୍ଦ୍ର ତଥା ରାଜ୍ୟ ସରକାରଙ୍କ ପାଖରେ ନ ଥିବାରୁ ଆସନ୍ତା ୨୦୨୧ ଜନ ଗଣନାରେ  ଓବିସି ତଥା ଅନ୍ୟାନ୍ୟ ପଛୁଆ ବର୍ଗଙ୍କ ସହ ଜାତି ଭିତ୍ତିକ ଜନଗଣନାକୁ ଅନ୍ତର୍ଭୁକ୍ତ କରିବା ପାଇଁ ବଲାଙ୍ଗିର ଜିଲ୍ଲା ମଧୁବୈଶ୍ୟ / ଗୁଡିଆ ସମାଜ ଜିଲ୍ଲା ପ୍ରଶାସନ ଠାରେ ଦାବି ଉପସ୍ଥାପନ କରିଛି । ପୁନଶ୍ଚ ଜାତି ଭିତ୍ତିକ ଜନଗଣନା କରି ଓଡିଶା ସରକାର ବିଭିନ୍ନ ରାଜନୈତିକ , ସାମାଜିକ, ଚାକିରି ଇତ୍ୟାଦି କ୍ଷେତ୍ରରେ ଓବିସିମାନଙ୍କ ପାଇଁ ୨୭ ପ୍ରତିଶତ ସ୍ଥାନ ସଂରକ୍ଷଣ କରିବା ସକାଶେ ଦାବିପତ୍ରରେ ଉଲ୍ଲେଖ କରାଯାଇଛି ।  ଏଠାରେ ଉଲ୍ଲେଖଯୋଗ୍ୟ ଯେ ପୂର୍ବରୁ ସାଂସଦରେ ଜାତି ଭିତ୍ତିକ ଜନ ଗଣନା କରିବାକୁ ଘୋଷଣା କରାଯାଇଥିଲା ଏବଂ ଏ ସମ୍ବନ୍ଧରେ ପଛୁଆ ବର୍ଗ ପାଇଁ ସଂରକ୍ଷଣ ବ୍ୟବସ୍ଥା ୨୭ ପ୍ରତିଶତ ଦେବା ପାଇଁ ଜାତୀୟ ଆୟୋଗ ମଧ୍ୟ ସରକାରଙ୍କୁ ପରାମର୍ଶ ଦେଇଥିଲା । ସମାଜର ଜିଲ୍ଲା ସଭାପତି ମନୋରଂଜନ ସାହୁଙ୍କ ନେତୃତ୍ୱରେ ସାଧାରଣ ସଂପାଦକ ଜୟକୃଷ୍ଣ ସାହୁ, ଅନ୍ତର୍ଯ୍ୟାମି ସାହୁ, ଅନୁପ ଚୋପଦାର, ଦିବ୍ୟସିଂ ସାହୁ, ଦେବାଶିଷ ସାହୁ ତଥା ଆଶିଷ କୁମାର ସାହୁଙ୍କ ସହ ସମାଜ ତରଫରୁ ନିମନ୍ତ୍ରିତ ହୋଇ ଆସିଥିବା ଓବିସି ମଂଚର ସଂପାଦକ ପ୍ରଦେଶି ବିଶ୍ୱାଲ ଓ ପୂର୍ଣ୍ଣଚନ୍ଦ୍ର ବିଶ୍ୱାଲ ପ୍ରମୁଖ ଜିଲ୍ଲାପାଳ କାର୍ଯ୍ୟାଳୟରେ ଦାବିପତ୍ର ପ୍ରଦାନରେ ସାମିଲ ହୋଇଥିଲେ । ଦାବିପତ୍ରର ଏକ କିତା ନକଲ ଜାତୀୟ ଆୟୋଗଙ୍କୁ ପ୍ରେରଣ କରାଯାଇଥିାବ ସୂଚନା ଦିଆଯାଇଛି ।