01-Sep-2021

ବଲାଙ୍ଗୀର,(ପ୍ରେରଣା ଖବର)- ବଲାଙ୍ଗୀର ଲୋକସଭା ସାଂସଦ ସଙ୍ଗୀତା କୁମାରୀ ସିଂଦେଓ ମଙ୍ଗଳବାର ରାଜେନ୍ଦ୍ର ବିଶ୍ୱବିଦ୍ୟାଳୟ ପରିଦର୍ଶନରେ ଯାଇଥିଲେ । ସେଠାରେ ବିଶ୍ୱବିଦ୍ୟାଳୟର ଜମିପଟ୍ଟା ଓ ଭିତ୍ତିଭୂମିକୁ ନେଇ କୁଳପତି ପ୍ରଫେସର ଡ. ଉମାବଲ୍ଲଭ ମହାପାତ୍ର ଓ ପୁରାତନ ଛାତ୍ର ସଙ୍ଗଠନ ପ୍ରତିନିଧି ମଣ୍ଡଳୀ ସହ  ଆଲୋଚନା କରିଥିଲେ । ରାଜେନ୍ଦ୍ର କଲେଜକୁ ବିଶ୍ୱବିଦ୍ୟାଳୟ ମାନ୍ୟତା ମିଳିଥିଲେ ମଧ୍ୟ ଗୁରୁତ୍ୱପୂର୍ଣ୍ଣ ୟୁଜିସି ଅଧିନିୟମ ୧୯୫୬ ଧାରା ୧୨ (ବି) ସ୍ୱୀକୃତି ଏଯାଏଁ ମିଳିନାହିଁ । ଏହି ସର୍ତ୍ତବଳୀ ପୂରଣ କରିବା ଦିଗରେ ରାଜେନ୍ଦ୍ର ବିଶ୍ୱବିଦ୍ୟାଳୟରେ କୁଳପତି-ସାଂସଦ ଓ ପୁରାତନ ଛାତ୍ର ସଙ୍ଗଠନ ପ୍ରତିନିଧି ମଣ୍ଡଳୀର ଆଲୋଚନା ହୋଇଥିଲା । ଛାତ୍ର ପ୍ରତିନିଧି ମଣ୍ଡଳୀରେ ଅସୀମ ପଟ୍ଟନାୟକ, ଆଡଭୋକେଟ୍ ଭବାନୀ ଶଙ୍କର ଶତପଥି, ଜିଲା ଓକିଲ ସଂଘ ସଭାପତି ପ୍ରବୀଣ ମିଶ୍ର, ଅଧ୍ୟାପିକା ସୁରାଲି ମହାନ୍ତି, ପ୍ରଭାସ ପାଣିଗ୍ରାହୀ, ରତନ ମହାରଣା, ଧର୍ମେନ୍ଦ୍ର ପ୍ରସାଦ ନନ୍ଦ, ଶିବାଜୀ ମହାନ୍ତି ଉପସ୍ଥିତ ରହି ବିଭିନ୍ନ ବିଷୟରେ ଆଲୋଚନା କରିଥିଲେ । ରାଜେନ୍ଦ୍ର ବିଶ୍ୱବିଦ୍ୟାଳୟର ଜମିପଟ୍ଟା, ଆବଶ୍ୟକ ଜମି ଓ ଭିତ୍ତିିଭୂମି ବିକାଶ ସହ ଷ୍ଟାଫ୍ ନିଯୁକ୍ତି ଉପରେ ଆଲୋଚନା ହୋଇଥିଲା । ବିଶ୍ୱବିଦ୍ୟାଳୟ ଜମିରେ ଥିବା ଜବରଦଖଲ ଉଚ୍ଛେଦ ପ୍ରସଙ୍ଗରେ ମଧ୍ୟ ଆଲୋଚନା ହୋଇଥିଲା । ଏହା ସହିତ ଏହି ଶିକ୍ଷାନୁଷ୍ଠାନକୁ ଏକ ଉତ୍କର୍ଷ ବିଶ୍ୱସ୍ତରୀୟ ଶିକ୍ଷାନୁଷ୍ଠାନରେ ପରିଣତ କରିବା ଦିଗରେ କେନ୍ଦ୍ର ଉଚ୍ଚଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହିତ ଆଲୋଚନା କରିବେ ବୋଲି ସାଂସଦ ଶ୍ରୀମତୀ ସିଂଦେଓ ପ୍ରତିଶ୍ରୁତି ଦେଇଥିଲେ । ରାଜ୍ୟ ସରକାର ଓ ଜିଲା ପ୍ରଶାସନ ଆବଶ୍ୟକ ଜମି ଯୋଗାଇଦେଲେ ୟୁଜିସି ଅଧିନିୟମ ୧୯୫୬ ଧାରା ୧୨ (ବି) ଅନୁମୋଦନ ପାଇଁ ଉଦ୍ୟମ କରାଯିବ ବୋଲି କହିଥିଲେ । ଏହି ଶିକ୍ଷାନୁଷ୍ଠାନରେ ଏକ ବିଜ୍ଞାନ ଓ କାରିଗରୀ ହବ୍‌, ଅତ୍ୟାଧୁନିକ ଇ-ଲାଇବ୍ରେରୀ ଖୋଲିବା ଦିଗରେ କେନ୍ଦ୍ର ସୂଚନା ପ୍ରୟୁକ୍ତି ମନ୍ତ୍ରୀଙ୍କ ସହ ଆଲୋଚନା କରିବାକୁ ସାଂସଦଙ୍କୁ ଅନୁରୋଧ କରାଯାଇଥିଲା । ଏହି ଆଲୋଚନା ସମୟରେ କୂଳସଚିବ ପ୍ରଫେସର ଦୁର୍ଗାପ୍ରସନ୍ନ ମହାପାତ୍ର ତଥା ପୂର୍ବତନ ଛାତ୍ରନେତା ଅନନ୍ତ ଦାଶ, ଚିତ୍ତ ରଂଜନ ମିଶ୍ର, ସୁରମୟ ମିଶ୍ର, ଅନିଲ ପାଣିଗ୍ରାହୀ, ଦିନେଶ ଶର୍ମା, ପିତାମ୍ବର ଖମାରି ପ୍ରମୁଖ ଉପସ୍ଥିତ ଥିଲେ । ବିଶ୍ୱବିଦ୍ୟାଳୟ ପାଇଁ ଏକ ମାଷ୍ଟରପ୍ଳାନ୍ ପ୍ରସ୍ତୁତ କରିବାକୁ ସାଂସଦ ସିଂଦେଓ କୁଳପତିଙ୍କୁ ପରାମର୍ଶ ଦେଇଥିଲେ । କୁଳପତି ପ୍ରଫେସର ମହାପାତ୍ର ବିଶ୍ୱବିଦ୍ୟାଳୟର ଉନ୍ନତି ସଂକ୍ରାନ୍ତରେ ସାଂସଦ ଓ ପୁରାତନ ଛାତ୍ରଙ୍କ ସହଯୋଗ ଲୋଡିଥିଲେ । ସୂଚନାଯୋଗ୍ୟ ଯେ ବିଶ୍ୱ ବିଦ୍ୟାଳୟର ଜମି ସମସ୍ୟାକୁ ନେଇ ପୂର୍ବତନ ଛାତ୍ରଙ୍କ ଏକ ପ୍ରତିନିଧି ମଣ୍ଡଳି ପୂର୍ବରୁ ସାଂସଦ ଶ୍ରୀମତୀ ସିଂଦେଓଙ୍କ ସହିତ ଆଲୋଚନା କରିଥିଲେ ଓ ବିଶ୍ୱ ବିଦ୍ୟାଳୟ ପରିଦର୍ଶନ କରିବା ନିମନ୍ତେ ଅନୁରୋଧ କରିଥିଲେ ।