02-Aug-2021

ବିନିକା (ହିମାଂଶୁ ଶେଖର ପୁଟେଳ):ସାଙ୍କେତିକ ଭାଷାକୁ ଭାଷାର ମାନ୍ୟତା  ମିଳିବା ପରେ ମାଧ୍ୟମିକ ପାଠ୍ୟକ୍ରମରେ ସାମିଲ ହେଲା ସାଙ୍କେତିକ ଭାଷା ଯାହା ଫଳରେ ଆଜି ବିନିକାର ହେପି ହେଣ୍ଡ ଫର ଦି ଡେଫ ପାଠ୍ୟକ୍ରମର ଏନ୍ତୁଡିଶାଳ ପାଲଟିଥିବା ରୁ ବିଭିନ୍ନ ମହଲରେ ଖୁସିର ଲହରୀ ଖେଳିଯାଇଛି l ସୂଚନାଯୋଗ୍ୟ ଯେ ଗତ ଜୁଲାଇ ମାସ ୨୯ ତାରିଖରେ ଭାରତ ସରକାର ନୂତନ ଶିକ୍ଷାନୀତି ୨୦୨୦ରେ ବ୍ୟାପକ ପରିବର୍ତ୍ତନ ଆଣିଥିଲେ।ଏହି  ଶିକ୍ଷାନୀତିରେ ସାଙ୍କେତିକ ଭାଷାକୁ ମାଧ୍ୟମିକ ଶିକ୍ଷାରେ ଅନ୍ତର୍ଭୁକ୍ତ କରିବା ନିଷ୍ପତି ଲକ୍ଷଲକ୍ଷ ଶ୍ରବଣ ବାଧିତ ଛାତ୍ରଛାତ୍ରୀ ମାନଙ୍କ ଠାରେ ନୂତନ ଉତ୍ସାହ ଏବଂ ଉନ୍ମାଦନା ଖେଳାଇ ଦେଇଛି।କିନ୍ତୁ ସମସ୍ତେ ଜାଣି ଆଶ୍ଚର୍ଯ୍ୟ ହେବେଯେ ଏହି ନୂତନ ସାଙ୍କେତିକ ଭାଷାର ପାଠ୍ୟକ୍ରମର ଏନ୍ତୁଡ଼ିଶାଳ ହେଉଛି ଓଡିଶାର ସୁବର୍ଣ୍ଣପୁର ଜିଲ୍ଲା ବିନିକା ବ୍ଲକର ସିନ୍ଦୁରପୁର ଗ୍ରାମରେ ଥିବା ହେପି ହେଣ୍ଡସ ସ୍କୁଲ ଫର ଦି ଡେଫ ଅଟେ। ୨୦୧୮ ମସିହାରେ ରୁରାଲ ଲାଇଫ ଲାଇନ ଟ୍ରଷ୍ଟ ଅଧୀନରେ ଚାଲିଥିବା ହେପି ହେଣ୍ଡସ ସ୍କୁଲ ଫର ଦି ଡେଫର ସଦସ୍ୟ ମାନେ ସୁଦୂର ଇଂଲଣ୍ଡର ଇଉନିଭରସିଟି ଅଫ ଲେଙ୍କାସେଆର ସହିତ ମିଶି ଶ୍ରବଣ ବାଧିତ ଛାତ୍ରଛାତ୍ରୀ ମାନଙ୍କ ଶିକ୍ଷାର ଗୁଣାତ୍ମକ ମାନକୁ ବିକାଶ କରିବା ଲକ୍ଷ୍ୟରେ ଏକ ପାଠ୍ୟକ୍ରମ ତିଆରି କରିଥିଲେ। ଯେଉଁ ପାଠ୍ୟକ୍ରମ ତିଆରି ତାଲିମ ପାଇଁ ପ୍ରଫେସର ଉଳରେକି ଜେସନ ଅନ୍ତର୍ଜାତୀୟ ସାଙ୍କେତିକ ଭାଷା ଏବଂ ଗଭେଷଣାର ଡ଼ାଇରେକ୍ଟର ଭାରତ ଆସି ବିନିକା ସହର ରେ ରହି ବିଭନ୍ନ ରାଜ୍ୟରୁ ଆସିଥିବା ଶ୍ରବଣ ବାଧିତ ଶିକ୍ଷକ ମାନଙ୍କୁ ତାଲିମ ଦେଇଥିଲେ। ସେହି ତାଲିମ ର କେନ୍ଦ୍ରବିନ୍ଦୁ ଥିଲା ହେପି ହେଣ୍ଡ ସ୍କୁଲ ଫର ଦି ଡେଫ। ଏହି ସ୍କୁଲର ଡାଇରେକ୍ଟର ଶିବାଜୀ ପଣ୍ଡା ଲଣ୍ଡନରେ ପ୍ରଫେସର ଥିଲେ ଯିଏକି ଶ୍ରବଣ ବାଧିତ ସମାଜର ମଙ୍ଗଳ ନିମନ୍ତେ ଉଚ୍ଚ ବେତନ ଯୁକ୍ତ ଚାକିରୀ ଛାଡି ଆସି ବିନିକା ବ୍ଲକର ସିନ୍ଦୁରପୁର ଗ୍ରାମରେ ଏକ ସ୍କୁଲ ଖୋଲିଲେ।ଏହି ସ୍କୁଲଟି ଶ୍ରବଣ ବାଧିତ ପିଲାମାନଙ୍କ ଶିକ୍ଷାର ଗଭେଷଣା ଗାର।ଅତଏବ ଦୁଇବର୍ଷର କଠିନ ପରିଶ୍ରମ ପରେ ପାଠ୍ୟକ୍ରମ ତିଆରି ହୋଇଥିଲା।NIOS ସହିତ ମିଶି ଏହି ପାଠ୍ୟକ୍ରମକୁ ତିଆରି କରାଯାଇଥିଲା।ସାଙ୍କେତିକ ଭାଷାର ଏହି ପାଠ୍ୟକ୍ରମ ଶ୍ରବଣ ବାଧିତ ପିଲାଙ୍କ ଶିକ୍ଷା କ୍ଷେତ୍ରରେ ଏକ ମାଇଲ ଖୁଣ୍ଟ ସାବ୍ୟସ୍ତ ହେବ ବୋଲି ଆଶା କରାଯାଉଛି l