29-Jul-2021

କୁଚିଣ୍ଡା,(ସଂଜୀବ ପାଣିଗ୍ରାହୀଙ୍କ ରିପୋର୍ଟ): ସମ୍ବଲପୁର ଜିଲ୍ଲା ବାମରା ବ୍ଲକ ରଙ୍ଗିଆଟିକ୍ରା ପଞ୍ଚାୟତରେ ହୋଇଥିବା ଅନାସ୍ଥା ପ୍ରସ୍ତାବ ଉପରେ ଭୋଟ୍‌ ଗ୍ରହଣ ଶେଷ ହୋଇଛି। ସରପଞ୍ଚ ଚମ୍ପାବତୀ ମିଞ୍ଜ ହାରି ଯାଇଥିବା ସୂଚନା ମିଳିଛି। ଅନାସ୍ଥା ସପକ୍ଷରେ ୧୦ଟି ଭୋଟ୍‌ ପଡ଼ିଥିବା ବେଳେ ବିପକ୍ଷରେ ମାତ୍ର ଗୋଟିଏ ଭୋଟ୍‌ ପଡିଥିଲା I କୁଚିଣ୍ଡା ଉପଜିଲ୍ଲାପାଳ ଙ୍କ ନିର୍ଦ୍ଦେଶକ୍ରମେ ଚଳିତ ମାସ ୨୭ ତାରିଖରେ ଅନାସ୍ଥା ପ୍ରସ୍ତାବ ଭୋଟ ଗ୍ରହଣ ପାଇଁ ଦିନ ଧାର୍ଯ୍ୟ ହୋଇଥିଲା। ଏହି କ୍ରମରେ ମଙ୍ଗଳବାର ପୂର୍ବାହ୍ନ ୧୧ଟା ପରେ ବାମରା ଏବିଡିଓ ସୁଶାନ୍ତ ପଣ୍ଡା ରିଟର୍ଣ୍ଣିଂ ଅଫିସର ଦାୟିତ୍ବରେ ଥାଇ ଭୋଟ ପ୍ରକ୍ରିୟା ସଂପାଦନ କରିଥିଲେ I ମ୍ୟାଜିଷ୍ଟ୍ରେଟ ଦାୟିତ୍ବରେ ବାମରା ତହସିଲଦାର ଅନିଲ କୁଲୁ ତଥା ଶାନ୍ତି ଶୃଙ୍ଖଳା ଦାୟିତ୍ବରେ ଗୋବିନ୍ଦପୁର ଥାନାଧିକାରୀ ଅଜୟ ଜେନା ଓ ମହୁଲପାଲି ଥାନାଧିକାରୀ ଯାଜ୍ଞସେନୀ ନାଏକ ସ୍ୱତନ୍ତ୍ର ଫୋର୍ସ ସହ ମୁତୟନ ଥିଲେ। ପଞ୍ଚାୟତର ମୋଟ ୧୨ଟି ୱାର୍ଡ ମଧ୍ୟରୁ ୨ଟି କୌଣସି କାରଣରୁ ଖାଲି ପଡ଼ିଥିବା ବେଳେ ୧୦ ଜଣ ୱାର୍ଡ ମେମ୍ବର ଓ ସରପଞ୍ଚଙ୍କ ସହ ମୋଟ ୧୧ ଜଣ ଉପସ୍ଥିତ ରହି ଅନାସ୍ଥା ପ୍ରସ୍ତାବରେ ଭୋଟ ଦେଇଥିଲେ। ସେଥିରୁ ଗୋଟିଏ ଭୋଟ୍‌ ସରପଞ୍ଚଙ୍କ ସପକ୍ଷରେ ଯାଇଥିଲା ବେଳେ ୧୦ଟି ବିପକ୍ଷରେ ଥିଲା I ସବ ଡିଭିଜନାଲ ପଞ୍ଚାୟତ ଅଫିସର ଟିକେଶ୍ୱର କିଷାନ ଓ ବ୍ଲକ ଡବ୍ଲୁଇଓ ରଞ୍ଜନ ରାମ ନିର୍ବାଚନ ପରିଚାଳନା କରିଥିଲେ। ଆସନ୍ତ ୩୦ ତାରିଖ ଦିନ ବାମରା ବ୍ଲକ ମହୁକୁମା ଗୋବିନ୍ଦପୁର ପଞ୍ଚାୟତରେ ମଧ୍ୟ ସରପଞ୍ଚ ମୀନାକ୍ଷୀ ମାଝୀଙ୍କ ବିରୋଧ ଆସିଥିବା ଅନାସ୍ଥା ପ୍ରସ୍ତାବ ଭୋଟ ଗ୍ରହଣ ପ୍ରକ୍ରିୟା ଅନୁଷ୍ଠିତ ହେବ ବୋଲି ଜଣାପଡ଼ିଛି।