22-Jul-2021

ବଲାଙ୍ଗିର,(ପ୍ରେରଣା ଖବର) : ପେଗାସସ ଗୁଇନ୍ଦାଗିରି ଘଟଣା ସାମନାକୁ ଆସିବା ପରେ ବର୍ତ୍ତମାନ ସାରା ଦେଶରେ ଚହଳ ପଡିଯାଇଛି । ଉକ୍ତ ଘଟଣାରେ ମୋଦୀ ନେତୃତ୍ୱାଧିନ କେନ୍ଦ୍ର ସରକାର ତାଙ୍କର ବିରୋଧି ଗୋଷ୍ଠିର ରାଜନେତା, ଗଣମାଧ୍ୟମର ପ୍ରତିଷ୍ଠିତ ପ୍ରତିନିଧି ଏପରିକି ସର୍ବୋଚ୍ଚ ନ୍ୟାୟାଳୟର ବିଚାରପତିମାନଙ୍କ ଫୋଟ ଟେପିଂ କରି ପରବର୍ତ୍ତି ସମୟରେ ନିଜର ସ୍ୱାର୍ଥ ପାଇଁ ସେସବୁ ବ୍ୟବହାର କରିଛି । କେନ୍ଦ୍ର ସରକାର ଜାଣିବା ଦରକାର ଏପରି କରିବା ସମ୍ବିଧାନ ବିରୋଧିô । ଏଥିରେ ବ୍ୟକ୍ତିର ମୌଳିକ ଅଧିକାରର କ୍ଷୁର୍ଣ୍ଣ ହେଉଛି । ଜନସାଧାରଣ ତଥା ନିଜ ରାଜନୈତିକ ବିରୋଧିଙ୍କ ଫୋନ ଟେପିଂ କରିବା କେନ୍ଦ୍ର ସରକାରର ଏକଛତ୍ର ମନୋଭାବ ର ସ୍ପଷ୍ଟ ପ୍ରମାଣ ମିଳୁଛି । ଏଭଳି ପରିସ୍ଥିତିରେ ଦେଶର ଜାତୀୟ ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ତେଣୁ ଏହି ଘଟଣା ପାଇଁ  କେନ୍ଦ୍ର ସରକାରର ସ୍ୱରାଷ୍ଟ୍ର ମନ୍ତ୍ରୀ ଅମିତ ସାହା ନିଜେ ଦୋଷ ସ୍ୱିକାର କରି ନିଜ ପଦବୀରୁ ତୁରନ୍ତ ଇସ୍ତଫା ଦିଅନ୍ତୁ ବୋଲି ଆଜି ଏକ ସାମ୍ବାଦିକ ସମ୍ମିଳନୀରେ ବଲାଙ୍ଗିର ବିଧାୟକ ତଥା ରାଜ୍ୟ ବିଧାନସଭାର କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଦାବି କରିଛନ୍ତି । ଏହା ସହ ସେ ଆହୁରି ମଧ୍ୟ କହିଛନ୍ତି ଏହି ଘଟଣାକୁ ରାଜ୍ୟ କଂଗ୍ରେସ ତଥା ବଲାଙ୍ଗିର ଜିଲ୍ଲା କଂଗ୍ରେସ ତରଫରୁ ଦୃଢ ନିନ୍ଦା କରିବା ସହ ଆଗାମୀ ଦିନରେ ଦଳ କେନ୍ଦ୍ର ସରକାର ବିରୁଦ୍ଧରେ ରାଜରାସ୍ତାକୁ ଓହ୍ଲାଇବ ବୋଲି ପ୍ରକାଶ କରିଛନ୍ତି । ସାରା ଦେଶରେ ହଇଚଇ ସୃଷ୍ଟି କରିଥିବା ଏହି ଗୋଇନ୍ଦାଗିରି ଘଟଣା ଏକ ନିରପେକ୍ଷ ତଦନ୍ତ ଯଥା ସର୍ବୋଚ୍ଚ ନ୍ୟାୟାଳୟର ଏକ କାର୍ଯ୍ୟରତ ବିଚାରପତି କିମ୍ବା ଜଏଣ୍ଟ ପାଲ୍ୟାମେଣ୍ଟରୀ କମିଟି ଦ୍ୱାରା ଏହାର ନିରପେକ୍ଷ ତଦନ୍ତ କରି ଦୋଷୀ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ କରିଛନ୍ତି ଶ୍ରୀ ମିଶ୍ର । ତା ସହ ରାଜନୈତିକ ବିରୋଧିଙ୍କୁ ପ୍ରଧାନମନ୍ତ୍ରୀ ଭୟ ନ କରି ପାଲ୍ୟାମେଣ୍ଟରେ ଏହା ଉପରେ ବିବୃତ୍ତି ରଖନ୍ତୁ ବୋଲି ବିଧାୟକ ଶ୍ରୀ ମିଶ୍ର ଦାବି କରିଛନ୍ତି । ସାମ୍ବାଦିକ ସମ୍ମିଳନୀରେ ବିଧାୟକ ଶ୍ରୀ ମିଶ୍ର ବର୍ତ୍ତମାନ ଧାନ କିଣାକୁ ନେଇ ଉଭୟ କେନ୍ଦ୍ରରେ ସରକାର କରିଥିବା ବିଜେପି ଓ ରାଜ୍ୟରେ ସରକାର ଗଢିଥିବା ବିଜେଡି କୁମ୍ଭିରକାନ୍ଦଣା କାନ୍ଦୁଛନ୍ତି ବୋଲି କହିଛନ୍ତି । ଉଭୟ ଦଳ ମୁଦ୍ରାର ଦୁଇ ପାଶ୍ୱର୍ ଭଳି ପରସ୍ପର ପରିପୁରକ । ଏହା ଅଶ୍ୱିନୀ ବୈଷ୍ଣବଙ୍କ ରାଜ୍ୟସଭା ପ୍ରାର୍ଥିତ୍ୱକୁ ବିଜେଡି ସମର୍ଥନ କରି ପ୍ରମାଣ କରିସାରିଛି । କଂଗ୍ରେସ ଦଳ ଏବଂ ସେ ନିଜେ ବହୁ ପୂର୍ବରୁ ଏଫ୍‌ସିଆଇ ଧାନ କିଣୁ ବୋଲି ଦାବି କରି ଆସୁଛନ୍ତି । ଏପରିକି ମାନ୍ୟବର ଉଚ୍ଚତର ନ୍ୟାୟାଳୟ ବଲାଙ୍ଗିର ଜିଲ୍ଲାରେ ଏଫ୍‌ସିଆଇ ଧାନ କିଣୁ ବୋଲି ନିର୍ଦ୍ଦେଶ ଦେଇଥିଲେ ଏବଂ କିଛି ବର୍ଷ ଏଫ୍‌ସିଆ ଏହି ଜିଲ୍ଲାରୁ ଧାନ ମଧ୍ୟ କିଣୁଥିଲା କିନ୍ତୁ ଦୁଃଖର ବିଷୟ ରାଜ୍ୟ ସରକାର ଖୋଦ୍ ମାନ୍ୟବର ଉଚ୍ଚତମ ନ୍ୟାୟାଳୟଙ୍କ ନିର୍ଦ୍ଦେଶକୁ ବାରମ୍ବାର ଅବମାନନା କରି ଆସୁଛନ୍ତି । କେନ୍ଦ୍ର ସରକାର ଏଫ୍‌ସିଆଇକୁ ସିଧା ସିଧା ନିର୍ଦ୍ଦେଶ ଦେଇ ଚାଷୀଙ୍କ ଧାନ କିଣିପାରିବେ । କିନ୍ତୁ କେନ୍ଦ୍ର ସରକାର ସେପରି କରୁନାହାନ୍ତି । ଏପଟେ ରାଜ୍ୟସରକାର ଧାନ ନ କିଣିଲେ କେନ୍ଦ୍ର ସରକାର ଏଫ୍‌ସିଆଇ ମାଧ୍ୟମରେ କିଣିବା ପାଇଁ ବାଧ୍ୟ ହେବେ । କିନ୍ତୁ ଦୁର୍ନିତିକୁ ପ୍ରଶ୍ରୟ ଦେବା ପାଇଁ ଉଭୟେ ସରକାର ସେପରି କିଛି ନ କରି ପରସ୍ପରକୁ ଦୋଷ ଦେଇ ଚାଷୀଙ୍କ ପାଇଁ କୁମ୍ଭିର କାନ୍ଦଣା କାନ୍ଦୁଛନ୍ତି । ତେଣୁ ଆମେ ଦାବି କରୁଛୁ ଯେ ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶ ହିସାବରେ ଚାଷୀଙ୍କ ସମସ୍ତ ଧାନକୁ ସର୍ବନିମ୍ନ ମୁଲ୍ୟରେ ଏଫ୍‌ସିଆଇ ମାଧ୍ୟମରେ ଧାନ କିଣାଯାଉ । ଆହୁରି ମଧ୍ୟ ବର୍ତ୍ତମାନ ପେଟ୍ରୋଲ ଓ ଡିଜେଲର ଦାମ ଅହେତୁକ ବୃଦ୍ଧି ଯୋଗୁଁ ସାଧାରଣ ଜନତା କରୋନା ମହାମାରୀ ସମୟରେ ବହୁତ ହଇରାଣ ହେଉଛନ୍ତି । ତେଣୁ  କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଉପରୁ ଟିକସ ହ୍ରାସ କଲେ ଦେଶର ଖାଉଟି ପଟ୍ରୋଲ,ଡିଜେଲ ଓ ରନ୍ଧନ ଗ୍ୟାସକୁ ବର୍ତ୍ତମାନର ଦରଠାରୁ ଅଧା ଦରରେ ପାଇପାରିବେ । ତେଣୁ ଆମର ସ୍ପଷ୍ଟ ଦାବି କେନ୍ଦ୍ର ସରକାର ପଟ୍ରୋଲ ଡିଜେଲ ଉପରୁ ଟିକସ ହ୍ରାସ କରନ୍ତୁ । ଆଜି ଉପସ୍ଥିତ ଥିବା ଗଣମାଧ୍ୟମର ପ୍ରତିନିଧିମାନେ ଜିଲ୍ଲା ଭିତରେ ବିଭିନ୍ନ ଯୋଜନାରେ ହୋଇଥିବା ପ୍ରୀୟାପ୍ରିତି ତୋଷଣ ଓ ଦୁର୍ନିତି ଉପରେ ମଧ୍ୟ ପ୍ରଶ୍ନ ପଚାରିଥିଲେ । ଉତ୍ତରରେ ଶ୍ରୀ ମିଶ୍ର କହିଥିଲେ ଦୁର୍ନିତିର ମୁଳତ୍ପାଟନ କରିବାକୁ ହେଲେ ସମସ୍ତଙ୍କ ସାମୁହିକ ଉଦ୍ୟମ ଦରକାର । ଗଣମାଧ୍ୟମ ମଧ୍ୟ ଏ ଦିଗରେ ସଜାଗ ହୋଇ ଖବର ପରିବେଷଣ କରିବା ଦରକାର । ତାହା ହେଲେ ଦୁର୍ନିତି କରୁଥିବା ବ୍ୟକ୍ତି ଏ ସବୁ କରିବା ପାଇଁ ଭୟ କରିବ ବୋଲି ସେ କହିଥିଲେ । ସମ୍ପୁର୍ଣ୍ଣ କୋଭିଡ୍ କଟକଣାରେ ଅନୁଷ୍ଠିତ ହୋଇଥିବା ଆଜିର ଏହି ସାମ୍ବାଦିକ ସମ୍ମିଳନୀରେ ବିଧାୟକ ଶ୍ରୀ ମିଶ୍ରଙ୍କ ସହ ଜିଲ୍ଲା କଂଗ୍ରେସ ସଭାପତି ଦିଲିପ ବେହେରା ଏବଂ ମହିଳା କଂଗ୍ରେସ ସଭାନେତ୍ରୀ ମିଳନୀ ସାହୁ ମଂଚାସୀନ ଥିଲେ ।