15-Jul-2021

ବଲାଙ୍ଗିର,(ପ୍ରେରଣା ଖବର)- ଆଜି ମାନ୍ୟବର ବଲାଙ୍ଗିର ବିଧାୟକ ନରସିଂହ ମିଶ୍ର ସ୍ଥାନୀୟ ଭୀମଭୋଇ ମେଡିକାଲ କଲେଜ ଡାକ୍ତରଖାନା ର ବିଭିନ୍ନ ସମସ୍ୟାକୁ ନେଇ ମେଡିକାଲ କେଲେଜ ଓ ଡାକ୍ତରଖାନା କର୍ତ୍ତୃପକ୍ଷଙ୍କ ସହ ହସପିଟାଲ ପରିସରରେ ଆଲୋଚନା କରିଛନ୍ତି । ଏହି ଆଲୋଚନା ସମୟରେ ବିଶେଷ କରି କରୋନା ସଂକ୍ରମଣ କିଛି କମିବା ପରେ ଡାକ୍ତରଖାନାର ନିୟମିତ ଚିକିତ୍ସା କେମିତି ଚାଲିଛି । ଏଥିରେ କଣ ସବୁ ସମସ୍ୟା ଅଛି ଏବଂ ତାର ସମାଧାନ କିଭଳି କରାହେବ ସେ ଉପରେ କଲେଜର ଅଧ୍ୟକ୍ଷ ଏବଂ ଡିନ୍ ଡ. ସରିତା ମହାପାତ୍ର, ଅଧିକ୍ଷକ ଡ. ମହେନ୍ଦ୍ର ନାଏକ, ଜିଲ୍ଲା ଚିକିତ୍ସାଧିକାରୀ ଡ.ଭୀମସେନ ସାହୁ, ଏଡିଏମ୍‌ଓ ଡ. ପ୍ରଭାତ ରଥଙ୍କ ସହ ବିଧାୟକ ଶ୍ରୀ ମିଶ୍ର ଆଲୋଚନା କରିଥିଲେ । କୋଭିଡ୍ ସଂକ୍ରମଣ ଯୋଗୁଁ ବିଭିନ୍ନ ବିଭାଗର ଅସ୍ତ୍ରପ୍ରଚାର ସାମହିକ ଭାବେ ବନ୍ଦ ହୋଇଥିବାରୁ ଏଠାକାର ରୋଗୀମାନେ ଅନେକ ହଇରାଣ ହେଉଛନ୍ତି ତେଣୁ ବିଭିନ୍ନ ବିଭାଗର ଅସ୍ତ୍ରପ୍ରଚାର ଶିଘ୍ର ଆରମ୍ଭ କରିବା ପାଇଁ ବିଧାୟକ ଶ୍ରୀ ମିଶ୍ର ନିର୍ଦ୍ଦେଶ ଦେଇଥିଲେ । ମେଡିକାଲ କଲେଜ ଡାକ୍ତରଖାନାରେ ଷ୍ଟାଫ୍ ନର୍ସମାନଙ୍କର ଅଭାବ ବିଭିନ୍ନ ବିଭାଗର ଚିକିତ୍ସାରେ ଅସୁବିଧା ସୃଷ୍ଟି କରୁଛି ବୋଲି ଡ. ସରିତା ମହାପାତ୍ର ସୂଚନା ଦେଇଥିଲେ । ୨୫୬ଜଣ ଷ୍ଟାଫ୍ ନର୍ସ ଜାଗାରେ ବର୍ତ୍ତମାନ ୧୩୭  ପଦବୀ ଶିଘ୍ର ପୁରଣ ହେବାକୁ ଯାଉଥିବା ସୂଚନା ଦେଇଥିଲେ ମେଡିକାଲ କଲେଜ ଅଧିକ୍ଷକ । ଦରକାର ଥିବା ସମସ୍ତ ଷ୍ଟାଫ୍ ନର୍ସ ପୁରଣ ହୋଇପାରିଲେ ଡାକ୍ତରଖାନାରେ ଥିବା ସମସ୍ତ ବିଭାଗର ଆଇସିୟୁ, ଅପରେସନ ଗୃହ ଠିକ୍ ହିସାବରେ ଚାଲିପାରିବ ବୋଲି ଶ୍ରୀ ମିଶ୍ରଙ୍କୁ ସୂଚନା ଦିଆଯାଇଥିଲା । ଡାକ୍ତରଖାନାରେ ଚିକିତ୍ସା ପାଇଁ ଦରକାର ହେଉଥିବା ବିଭିନ୍ନ ଉପକରଣ, ଡାକ୍ତର କର୍ମଚାରୀ ତଥା ଅନ୍ୟାନ୍ୟ ସମସ୍ୟା ଉପରେ ଏକ ସବିଶେଷ ରିପୋର୍ଟ ଦେବା ପାଇଁ ଡାକ୍ତରଖାନା ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ଶ୍ରୀ ମିଶ୍ର । ଆଲୋଚନା ସମୟରେ ବିବିଏମ୍‌ସିଏଚ୍ ର ନୂତନ କୋଠା ନିର୍ମାଣ ଉପରେ ମଧ୍ୟ ଆଲୋଚନା ହୋଇଥିଲା । ବିବିଏମ୍‌ସିଏଚ୍ ରେ ପି.ଜି ପାଠ୍ୟକ୍ରମ ନ ଥିବାରୁ ସୁପରସ୍ପେସାଲିଷ୍ଟ ଡାକ୍ତର ନିଯୁକ୍ତି ହୋଇ ପାରୁନଥିବା ଜଣାପଡିଥିଲା । ଏହା ଉପରେ ବିଧାୟକ ଶ୍ରୀ ମିଶ୍ର ଗତ ବିଧାନସଭା ଅଧିବେଶନରେ ପ୍ରଶ୍ନ କରିଥିବା କହିବା ସହ ଦରକାର ପଡିଲେ ଏହା ପାଇଁ ଦରକାର ହେଉଥିବା ଆଇନ ପରିବର୍ତନ ପାଇଁ ଆଲୋଚନା କରାଯିବା ପାଇଁ କହିଥିଲେ । ମେଡିକାଲ କଲେଜ ପରିସରରେ ଆଇନ ଶୃଙ୍ଖଳା ପରିସ୍ଥିତି, ବେଆଇନ ଦୋକାନ ଗୃହ ନିର୍ମାଣ ତଥା ଡାକ୍ତରୀ ଛାତ୍ରମାନଙ୍କ ପାଇଁ କ୍ରିଡା ଭିତ୍ତିଭୂମି ବିକାଶ ଏବଂ ଆଗାମୀ ଦିନରେ ହେବାକୁ ଥିବା ସ୍ୱାସ୍ଥ୍ୟ ବିଶ୍ୱ ବିଦ୍ୟାଳୟରେ ମଧ୍ୟ ବିଧାୟକ ଶ୍ରୀ ମିଶ୍ର ଉପସ୍ଥିତ ଥିବା ବିବିଏମ୍‌ସିଏଚ୍ ଅଧିକାରୀମାନଙ୍କ ସହ ଆଲୋଚନା କରିଥିଲେ । ଏହି ଆଲୋଚନା ସମୟରେ ଅନ୍ୟମାନଙ୍କ ମଧ୍ୟରେ ହସପିଟାଲ ମେନେଜର ସୁଦିପ୍ତ ଦତ୍ତ, ମନୋରଂଜନ ମୁଣ୍ଡ, ବିଧାୟକଙ୍କ ପ୍ରତିନିଧି ମନୀଷ ମିଶ୍ର, ଅସୀତ ମିଶ୍ର, ଡ. ପ୍ରଶାନ୍ତ ପ୍ରଧାନ, ଉମାକାନ୍ତ ସାହୁ, ସାନନ୍ଦ ମିଶ୍ର ପ୍ରମୁଖ ଉପସ୍ଥିତ ଥିଲେ ।