09-Oct-2026

ଆନ୍ତର୍ଜାତିୟ ବାଳିକା ସପ୍ତାହ ପାଳିତ  

ବରଗଡ଼(ତୁଳସୀ ଚରଣ ଦାଶ): ଆନ୍ତର୍ଜାତୀୟ ବାଳିକା ସପ୍ତାହ ପାଳନ ଅବସରରେ ବରଗଡ଼ସ୍ଥିତ ପିଏମ୍ ଶ୍ରୀ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ‘ଜୁଭେଣ୍ଟିକା ଆଉଟ୍‌ରିଚ୍ କାର୍ଯ୍ୟକ୍ରମ’ ଆୟୋଜିତ ହୋଇଥିଲା।

~~~~~~~~~~~~~~~~~~~ 
 “ବାଲ୍ୟବିବାହର ଅନ୍ତ ଏବଂ ବାଳିକାଙ୍କ ଅଧିକାରରେ ନିବେଶ”*
ବିଷୟବସ୍ତୁକୁ ଆଧାର କରି ବିଦ୍ୟାଳୟ, ବରଗଡ଼ ଟାଉନ୍ ଥାନା ଏବଂ ଜିଲ୍ଲା ସମାଜ ମଙ୍ଗଳ କାର୍ଯ୍ୟାଳୟର ମିଳିତ ସହଯୋଗରେ ଅପରାଧ ବିରୋଧୀ ମହିଳା ଓ ଶିଶୁ ଶାଖା ଏବଂ ୟୁନିସେଫ୍‌ର ସହଭାଗିତାରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା।
ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସୁଶ୍ରୀ ଶାନ୍ତି ସୁନା ଅତିଥିମାନଙ୍କୁ ସ୍ୱାଗତ କରିଥିଲେ। କାର୍ଯ୍ୟକ୍ରମରେ ବରଗଡ଼ ଟାଉନ୍ ଥାନାର ଆଇଆଇସି ଚିତ୍ତରଞ୍ଜନ ମେହେର, ୟୁନିସେଫ୍ ଓ ଏଡ୍ ଏଟ୍ ଆକ୍ସନ୍‌ର ଜିଲ୍ଲା ସଂଯୋଜକ ତରୁଣସେନ ପ୍ରୁସେଠ, ଡିଏଚ୍‌ଇଡବ୍ଲ୍ୟୁର ଜିଲ୍ଲା ସଂଯୋଜକ ଅଂଶୁମାନ ପ୍ରଧାନ, ଟାଉନ୍ ଥାନାର ଏସ୍‌ଆଇ ସୁରଜ ପାନ୍ ଏବଂ ସାଇବର ସେଲ୍‌ର ଏସ୍‌ଆଇ ମଙ୍ଗଳ କିସ୍କୋ ଯୋଗଦେଇ ବିଭିନ୍ନ ବିଷୟରେ ଆଲୋକପାତ କରିଥିଲେ।
ବକ୍ତାମାନେ ବାଲ୍ୟବିବାହର କୁପରିଣାମ, ବାଳିକାଙ୍କ ଅଧିକାର, ମହିଳା ଓ ଶିଶୁଙ୍କ ସୁରକ୍ଷା, ସାଇବର ଅପରାଧରୁ ସୁରକ୍ଷା ଏବଂ ସଚେତନତାର ଗୁରୁତ୍ୱ ସମ୍ପର୍କରେ ଛାତ୍ରୀମାନଙ୍କୁ ବୁଝାଇଥିଲେ। ଛାତ୍ରୀମାନେ ଉତ୍ସାହର ସହିତ ଆଲୋଚନାରେ ଭାଗ ନେଇ ବିଭିନ୍ନ ପ୍ରଶ୍ନ ପଚାରିଥିଲେ ଏବଂ ବକ୍ତାମାନଙ୍କଠାରୁ ଉପଯୁକ୍ତ ଉତ୍ତର ଓ ପରାମର୍ଶ ଗ୍ରହଣ କରିଥିଲେ।
କାର୍ଯ୍ୟକ୍ରମର ଶେଷରେ ବିଦ୍ୟାଳୟର ବରିଷ୍ଠତମ ଶିକ୍ଷୟିତ୍ରୀ ଶ୍ରୀମତୀ କମଳା ଦାଶ ଧନ୍ୟବାଦ ଅର୍ପଣ କରିଥିଲେ। ବିଦ୍ୟାଳୟର ସମସ୍ତ ଶିକ୍ଷକ-ଶିକ୍ଷୟିତ୍ରୀ ଓ କର୍ମଚାରୀଙ୍କ ସମନ୍ୱିତ ସହଯୋଗରେ କାର୍ଯ୍ୟକ୍ରମଟି ସଫଳତାର ସହ ସମ୍ପନ୍ନ ହୋଇଥିଲା।
ବାଳିକାମାନଙ୍କୁ ସଚେତନ, ସଶକ୍ତ ଓ ସ୍ୱାବଲମ୍ବୀ କରିବା ସହ ବାଲ୍ୟବିବାହ ରୋକିବା ଏବଂ ପ୍ରତ୍ୟେକ ବାଳିକାଙ୍କୁ ସୁରକ୍ଷିତ, ସମ୍ମାନଜନକ ଓ ସମାନ ସୁଯୋଗପୂର୍ଣ୍ଣ ଭବିଷ୍ୟତ ପ୍ରଦାନ କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା। 
         ---------×××---------