29-Jun-2021

ବଲାଙ୍ଗିର,(ପ୍ରେରଣା ଖବର)- ଆଦିବାସୀମାନଙ୍କ ପ୍ରତି ଜଙ୍ଗଲ ବିଭାଗର ଅତ୍ୟାଚାର, ଦୈାରାମ୍ୟ, ବେଆଇନ କାର୍ଯ୍ୟକଳାପ ବିରୁଦ୍ଧରେ ଜିଲ୍ଲା ଆଦିବାସୀ କଲ୍ୟାଣ ସଂଘ ବଲାଙ୍ଗିର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛି । ଆଦିବାସୀମାନଙ୍କ ଜଙ୍ଗଲ ଜମି ଅଧିକାର ସମ୍ବନ୍ଧୀୟ ସମସ୍ୟାର ସମାଧାନ ପାଇଁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କ ଜରିଆରେ ଏକ ସ୍ମାରକପତ୍ର ପ୍ରଦାନ କରାଯାଇଛି । ଉକ୍ତ ସ୍ମାରକପତ୍ରରେ ଆଦିବାସୀମାନେ ଦାବି କରିଛନ୍ତି ଯେ ଆଦିବାସୀ ଏବଂ ଅନ୍ୟାନ୍ୟ ପାରମ୍ପରିକ ବନବାସୀଙ୍କ ଜଙ୍ଗଲ ଜମି ଅଧିକାରୀ ସ୍ୱିକୃତି ଆଇନ ୨୦୦୮ ଅନୁସାରେ ଜଙ୍ଗଲ ଜମିର ସତ୍ତ୍ୱ ଅଧିକାର ପ୍ରଦାନ କରିବାରେ ଜଙ୍ଗଲ ବିଭାଗ ଟାଳଟୁଳ ନୀତି ଅବଲମ୍ବନ କରୁଛି । ଆଦିବାସୀମାନେ ୭୦ ବର୍ଷ ଆଗରୁ ୫ ରୁ ୧୦ ଏକର ଜଙ୍ଗଲ ଜମି ଅଧିକାର କରି ଚାଷବାସ କରି ଜିବିକା ଅର୍ଜନ କରୁଥିବା ବେଳେ ଜଙ୍ଗଲ ବିଭାଗର ମନମୁଖି କାର୍ଯ୍ୟ ଯୋଗୁଁ କେବଳ ୨/୩ ଏକର ଜମିର ପଟ୍ଟା ଦିଆଯାଉଛି । ଜଙ୍ଗଲ ବିଭାଗ ଯୁଗ୍ମ ତଦନ୍ତ ବେଳେ ସହଯୋଗ କରୁନାହିଁ । ଆଦିବାସୀମାନଙ୍କୁ ମିଥ୍ୟ ଜଙ୍ଗଲ କେସରେ ଫସାଇ ହଇରାଣ ହରକତ କରାଯାଉଛି । ବଲାଙ୍ଗିର ଡିଏଫ୍‌ଓଙ୍କ ଅଧିନସ୍ଥ ବନ୍ଧପଡା ଫରେଷ୍ଟର ଆଦିବାସୀମାନଙ୍କ ଠାରୁ ପ୍ରଧାନମନ୍ତ୍ରୀ ଆବାସ, ଇନ୍ଦିରା ଆବାସ, ବିଜୁ ପକ୍କାଘର ନିର୍ମାଣ ବାବଦରେ ୩ହଜାର ରୁ ୪ହଜାର ଟଙ୍କା ଅସୁଲି କରୁଛି । ରସିଦ ଦେଉନାହିଁ । ରସିଦ ମାଗିଲେ ମୁଁ ଡିଏଫ୍‌ଓଙ୍କୁ କେତେ ଟଙ୍କା ଦେଇଛି ତୁମ ଜାଣିଛ କି ବୋଲି ଧମକାଉଛନ୍ତି । ଆଦିବାସୀମାନେ ଦିର୍ଘ ୩୦ବର୍ଷ ଆଗରୁ ଚାଷବାସ କରୁଥିବା ଜମିରେ ଜଙ୍ଗଲ ବିଭାଗର କର୍ମଚାରୀମାନେ ବଳପୂର୍ବକ ଚାରା ରୋପଣ କରୁଛନ୍ତି । ଜଙ୍ଗଲ ଅଧିକାର ଆଇନ ଅନୁସାରେ ବ୍ୟକ୍ତିଗତ ଅଧିକାର ଫର୍ମରେ ହିତାଧିକାରୀମାନେ ଆବେଦନ କରି ପଲ୍ଲିସଭାରେ ପାସ ହୋଇ ଉପଖଣ୍ଡ ସ୍ତରୀୟ କମିଟିରୁ ଜିଲ୍ଲାସ୍ତରୀୟ କମିଟିରୁ ଆସିଥିôଲେ ମଧ୍ୟ ଡିଏଫ୍‌ଓଙ୍କ ଅଭିଯୋଗ ଯୋଗୁଁ ଆଦିବାସୀମାନଙ୍କୁ ଜଙ୍ଗଲ ଜମିର ପଟ୍ଟା ମୁଳୁନାହିଁ । ଜଙ୍ଗଲ ବିଭାଗରେ ୨୦୧୬ ମସିହାରୁ କାର୍ଯ୍ୟରତ ଅସ୍ଥାୟୀ ଜଙ୍ଗଲ କର୍ମଚାରୀମାନଙ୍କୁ ଆଉଟସୋସିଂ ସଂସ୍ଥା ଇପିଏଫ୍‌, ଇଏସ୍‌ଆଇ, ଜିଏସ୍‌ଟି ଟଙ୍କା ପ୍ରଦାନ କରାଯାଉନାହିଁ । ଆଉଟସୋସିଂ ସଂସ୍ଥା ମାଧ୍ୟମରେ ନିଯୁକ୍ତି ହୋଇଥିବା କର୍ମଚାରୀମାନଙ୍କୁ ନିଯୁକ୍ତି ପତ୍ର ଦିଆଯାଉନାହିଁ କିମ୍ବା ଇପିଏଫ୍‌, ଇଏସ୍‌ଆଇ ର ରସିଦ ଦିଆଯାଉନାହିଁ ।  ବଲାଙ୍ଗିର ଡିଏଫଓଙ୍କ ଇଙ୍ଗିତରେ ଏ ସବୁ ଅନିୟମିତତା ଏବଂ ଆଦିବାସୀମାନଙ୍କ ବିରୁଦ୍ଧରେ ଅତ୍ୟାଚାର ହେଉଛି । ଏହାର ବିଧିବଦ୍ଧ ତଦନ୍ତ କରି ଦୋଷୀ ଜଙ୍ଗଲ ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସଂଘ ଦାବି କରିଛି । ଏହି ମର୍ମରେ ଆଦିବାସୀମାଙ୍କ ସମସ୍ୟା ସଂପର୍କରେ ଜିଲ୍ଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲ୍ଲାପାଳଙ୍କ ପ୍ରକୋଷ୍ଠରେ ସଂଘର କର୍ମକର୍ତ୍ତା ଆଲୋଚନା କରିଥିଲେ । ଆଦିବାସୀମାନଙ୍କ ଜମି ଅଣଆଦିବାସୀମାନଙ୍କୁ ହସ୍ତାନ୍ତର ପାଇଁ ଅନୁମତି ନ ଦେବା, ଉପଜିଲ୍ଲାପାଳମାନେ ବଦଳି ଏବଂ ରିଲିଫ ସମୟରେ ଲଞ୍ଚ ନେଇ ଜମି ପରମିଶନ ଦେଉଥିବାର ଅଭିଯୋଗ କରାଯାଇଥିଲା । ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅତିରିକ୍ତ ଜିଲ୍ଲପାଳ ପ୍ରତିଶୃତି ଦେଇଥିଲେ । ଏଟ୍ରୋସିଟି କେସର ପିଡିତ ଆଦିବାସୀମାନଙ୍କୁ ଅନୁକମ୍ପା ମୂଳକ ଆର୍ଥିକ ସହାୟତା ହିତାଧିକାରୀଙ୍କ ବ୍ୟାଙ୍କ ପାସବହିରେ ଜମା କରିବାରେ ଜିଲ୍ଲା ମଙ୍ଗଲ ଅଧିକାରୀ ଅହେତୁକ ବିଳମ୍ବ କରୁଥିବା ରୁ ଏହାର ସମାଧାନ ପାଇଁ କଡା ନିର୍ଦ୍ଦେଶ ଦେବାକୁ ଅତିରିକ୍ତ ଜିଲ୍ଲାପାଳ ପ୍ରକାଶ କରିଥିଲେ । ଆଜିର ଏହି ଆନ୍ଦୋଳନରେ ପଶ୍ଚିମ ଓଡିଶା ଆଦିବାସୀ କଲ୍ୟାଣ ମହାସଂଘର ମହାସଚିବ ନିରଞ୍ଜନ ବିଶି, ସଂଘର ଜିଲ୍ଲା ଉପ-ସଭାପତି ଶ୍ୟାମ ସୁନ୍ଦର ଭୋଇ, ବନଲତା ମାଝି, ବ୍ଲକ ସଭାପତି ବଳଦେବ ଭୋଇ, ସନ୍ତୋଷ ପୁଟା, ଅଚ୍ୟୁତ ଧରୁଆ, ଘନଶ୍ୟାମ ପ୍ରଧାନି, ଆଦିବାସୀ ନେତା କୈଳାସ ପ୍ରଧାନୀ, ରାଜିବ କୁଅଁର, ଗିରିଧାରି ଭୋଇ, ନିରଞ୍ଜନ ମାଝି, ଭୁବନ ମାଝି, ପତରଙ୍ଗି ମାଝି, ଦୟାନିଧି ମାଝି, ଯଦୁ ବରିହା, ଧିନା ଭୋଇ, ନିଳାଦ୍ରି ଭୋଇ ପ୍ରମୁଖ ସାମିଲ ଥିଲେ ।