29-Jun-2021

ବିନିକା (ହିମାଂଶୁ ଶେଖର ପୁଟେଲ) : ମାସେ ନୁହେଁ କି ଦୁଇ ମାସ ନୁହେଁ ଦୀର୍ଘ ୨୭ମାସ ହେଲା ସ୍କୁଲରେ ଅଧ୍ୟୟନ ରତ ଛାତ୍ରଛାତ୍ରୀଙ୍କୁ ଚାଉଳ, କୁକିଂ ଟଙ୍କା ଓ ଡ୍ରେସ ମିଳି ନ ଥିବାରୁ ଆଜି ମଙ୍ଗଳବାର ସକାଳେ ସ୍କୁଲର ଶିକ୍ଷକ ଚତୁରୁ ଭୋଇଙ୍କୁ ଅଭିଭାବକ ମାନେ ସ୍କୁଲ କୋଠରୀରେ ଅଟକ ରଖି ହକ ପାଇଁ ପ୍ରତିବାଦ ଜାରି ରଖିଛନ୍ତି l ଘଟଣାଟି ଘଟିଛି ବିନିକା ବ୍ଲକ ମହଦା ପଞ୍ଚାୟତ ଶିଆଳି ମନୋରଂଜନପୁର ସରକାରୀ ପ୍ରାଥମିକ ବିଦ୍ୟାଳୟରେ l ଖବର ନେବାରୁ ଜଣା ପଡ଼ିଛିଯେ ମହାମାରୀ କରୋନା ଯୋଗୁଁ ସ୍କୁଲ ବନ୍ଦ ରହିଛି l ହେଲେ ଏଠାରେ ପଡୁଥିବା ପ୍ରାୟ ୩୦ଜଣ ଛାତ୍ରଛାତ୍ରୀଙ୍କ ଚାଉଳ, କୁକିଂ ଟଙ୍କା ଓ ଡ୍ରେସ ଗଲା କୁଆଡେ ସେ ନେଇ ବିଭିନ୍ନ ମହଲରେ ପ୍ରଶ୍ନବାଚି ସୃଷ୍ଟି କରିଛି l ଶିକ୍ଷା ପ୍ରତି ଆକର୍ଷିତ ହେବାପାଇଁ ସରକାର ମାଗଣାରେ ଦେଉଥିବା ଖାଦ୍ୟ ଯଦି ଛାତ୍ରଛାତ୍ରୀଙ୍କୁ ମିଳୁନାହିଁ ତେବେ ସେହି ଖାଦ୍ୟ କିଏ ଖାଉଛି ବୋଲି ସାଧାରଣରେ ଚର୍ଚ୍ଚା ଜୋର ଧରୁଛି l  ମିଳିଥିବା ସୂଚନା ଅନୁସାରେ ସ୍କୁଲ ବନ୍ଦ ହୋଇଥିଲେ ମଧ୍ୟ ସ୍କୁଲ ମାଷ୍ଟର ଅଭିଭାବକଙ୍କୁ ଡାକି କିମ୍ବା ନିଜେ ଘରଘର ବୁଲି ପ୍ରତି ଛାତ୍ରଛାତ୍ରୀ ପିଛା(ପ୍ରଥମ ଶ୍ରେଣୀରୁ ପଞ୍ଚମ ଯାଏ) ଦିନକୁ ୧୦୦ଗ୍ରାମ ଚାଉଳ ଓ କୁକିଂ ବାବଦରେ ୪ ଟଙ୍କା ୮୦ପଇସା ଦେବାର ବ୍ୟବସ୍ଥା ରହିଛି l ବ୍ଲକର ଅନେକ ସ୍କୁଲ ମାଷ୍ଟରଙ୍କ ତରଫରୁ ମଧ୍ୟ ବଣ୍ଟନ ହୋଇଛି l କିନ୍ତୁ ଅତ୍ୟନ୍ତ ପରିତାପର ବିଷୟ ମନୋରଂଜନପୁର ସ୍କୁଲରେ କାହିଁକି ଛାତ୍ରଛାତ୍ରୀ ମାନଙ୍କୁ ସରକାରଙ୍କ ମାଗଣା ଖାଦ୍ୟ ଓ ଟଙ୍କା ମିଳିପାରି ନାହିଁ ତାହା ତଦନ୍ତ କରାଗଲେ ପ୍ରକୃତ ରହସ୍ୟ ଉନ୍ମୋଚିତ ହେବା ସାଙ୍ଗକୁ ଯିଏ ପିଲାଙ୍କ ଦାନାକୁ ହରିଲୁଟ କରିଛି ତାର ପ୍ରକୃତ ମୁଖା ଖୋଲିବ ବୋଲି ସାଧାରଣରେ ଦାବି ହେଉଛି l ହକ ପାଇଁ ପ୍ରତିବାଦ ଜାରି ରଖିଥିବା ଗ୍ରାମର ୨୩ଜଣ ଅଭିଭାବକ ଜିଦରେ

ଅଟଳ ରହିଥିବା ଜଣାପଡିଛି l ତେବେ ଘଟଣାସ୍ଥଳକୁ ସିଆରସିସି ଭରତ ଝାଙ୍କର ପହଞ୍ଚି ଅଭିଭାବକଙ୍କ ସହ ଆଲୋଚନା କରିଥିଲେ ହେଁ ଛାତ୍ରଛାତ୍ରୀଙ୍କ ହକ ଆମର ଦାବି ବୋଲି କହିଛନ୍ତି l ତେବେ ଏନେଇ ବିନିକା ଗୋଷ୍ଟି ଶିକ୍ଷା ଅଧିକାରୀ ଶଶୀଭୂଷଣ ସେଠୀଙ୍କ ମୋବାଇଲ କୁ ଯୋଗାଯୋଗ କରିଥିଲେ ମଧ୍ୟ ସେ ଫୋନ ଉଠାଇ ନ ଥିଲେ l ଦେଖିବାକୁ ବାକି ରହିଲା ଛାତ୍ରଛାତ୍ରୀଙ୍କ ହକ ଦାବି ଚାଉଳ,କୁ କିଂ ଟଙ୍କା ଏବଂ ଡ୍ରେସ କେବେ ମିଳିବ ?