09-Jun-2021

ଡୁଙ୍ଗୁରିପାଲି-ଏସ୍‌.ରାମପୁର(ଅରବିନ୍ଦ ମିଶ୍ର):ଏହି ବ୍ଲକର ରାମପୁର ପେକ୍ସ ସଂପାଦକଙ୍କ ନିଳମ୍ବନ ପରେ ଉକ୍ତ ପେକ୍ସ ଦାୟିତ୍ୱ ମାୟାବର୍ହା ସଂପାଦକ ଭଗବାନ ପଧାନକୁ ଦାୟିତ୍ୱ ପ୍ରଦାନ କରାଯାଇଛି । ଆଜି ଉକ୍ତ ପେକ୍ସକୁ ଚାଷି ଧାନ ନେଇ ଯାଇଥିବା ବେଳେ ପେକ୍ସରେ କୌଣସି କର୍ମଚାରୀ ନଥିଲେ । ଯାହା ଫଳରେ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଥିଲା । ପାଇଥିବା ଟୋକନ ଲେପ୍ସ ହୋଇଯିବା ଭୟରେ ଚାଷୀମାନଙ୍କ ମଧ୍ୟରେ ଚିନ୍ତା ବଢି ଯାଇଥିଲା । ଦାୟିତ୍ୱରେ ଥିବା ସଂପାଦକ ପଧାନକୁ ଫୋନ କରିଥିଲେ ମଧ୍ୟ ସେ ଫୋନ ଗ୍ରହଣ କରିନଥିଲେ । ଯାହାକି ଧାନ ବିକ୍ରୀ ନହେବା ପାଇଁ  ଚାଷୀଙ୍କ ପ୍ରତି ଏକ ଚକ୍ରାନ୍ତ ବୋଲି ଉପସ୍ଥିତ ଚାଷୀମାନେ ବୁଝି ନେଇଥିଲେ । ଶେଷରେ ସମସ୍ତ ଚାଷି ଡୁଙ୍ଗୁରିପାଲି ରାମପୁର ରାସ୍ତାର ପେକ୍ସ ସମ୍ମୁଖରେ ରାସ୍ତା ଉପରେ ଧାରଣାରେ ବସି ରହିଥିଲେ । ଖବର ପାଇ  ରାମପୁର ତହସିଲଦାର ପୁରୁଷୋତ୍ତମ ମିର୍ଦ୍ଧା, ଯୋଗାଣ  ଅଧିକାରୀ ଜଗନ୍ନାଥ ଭୋଇ, ରାମପୁର ଥାନାଧିକାରୀ ପ୍ରଦୀପ ପଧାନ ଉପସ୍ଥିତ ରହି ଚାଷୀମାନଙ୍କ ସହିତ ଆଲୋଚନା କରିଥିଲେ । ଆସନ୍ତା କାଲି ସମସ୍ତ ଚାଷୀମାନଙ୍କ ଧାନ କିଣାଯିବାକୁ ପ୍ରତିଶୃତି ଦେବା ପରେ ରାସ୍ତାରୋକ ହଟିଥିଲା ।ମହିଳାମାନଙ୍କ ଏକାଉଣ୍ଟରୁ ଟଙ୍କା ହଡପ ଅଭିଯୋଗ
ଡୁଙ୍ଗୁରିପାଲି(ଅରବିନ୍ଦ ମିଶ୍ର): ଏହି ବ୍ଲକର ଚେରୁପାଲି ଗ୍ରାମର କେତେକ ମହିଲାମାନଙ୍କ ଜମା ଖାତାରୁ ଟଙ୍କା ହଡପ ହୋଇଥିବା ଡୁଙ୍ଗୁରିପାଲି ଥାନାରେ ଅଭିଯୋଗ ହୋଇଛି । ମହିଲାମାନେ ଥାନାରେ କରିଥିବା ଅଭିଯୋଗରେ ଦର୍ଶାଇଛନ୍ତି ଯେ,ଚେରୁପାଲି ଗ୍ରାମର ଜଣେ ମହିଲା ସ୍ୱାସ୍ଥ୍ୟ ବୀମା କାର୍ଡ କରାଇ ଦେବା କହି ଗ୍ରାମର ମହିଲାମାନଙ୍କ ବ୍ୟାଙ୍କ ଜମାଖାତା, ଟିପ ଚିହ୍ନ ନେଇଯାଇଛନ୍ତି । ବର୍ତ୍ତମାନ ଉକ୍ତ ମହିଲାମାନଙ୍କ ଜମା ଖାତାର ଟଙ୍କା ଗାଏପ ହୋଇ ଯାଉଛିତ । ଜମାଖାତାରୁ ଅନ୍ୟ ଏକାଉଣ୍ଟକୁ ଚାଲିଯାଉଛି ।  ମହିଲାମାନଙ୍କ ଧାନ ବିକ୍ରି ଟଙ୍କାଠାରୁ ଆରମ୍ଭ କରି ଅନ୍ୟାନ୍ୟ ଟଙ୍କା ଜମା କରାଯାଉଥିବା ବେଳେ ତାହା ଶୂନ୍ୟ ହୋଇ ଯାଉଛି । ଏଣୁ ଏହାର ତଦନ୍ତ କରିବାକୁ ଆଜି ପଞ୍ଚାୟତ ସରପଞ୍ଚଙ୍କ ପ୍ରତିନିଧି ସନ୍ତୋଷ ବେହେରାଙ୍କ  ନେତୃତ୍ୱରେ ମହିଲାମାନେ ଥାନାରେ ଅଭିଯୋଗ କରିଛନ୍ତି । ପ୍ରାୟ ଲକ୍ଷାଧିକ ଟଙ୍କା ହଡପ ହୋଇଥିବା ଅଭିଯୋଗରେ ଦର୍ଶାଇଛନ୍ତି ।