04-Jun-2021

ବଲାଙ୍ଗିର,(ପ୍ରେରଣା ଖବର)- ସୁପ୍ରିମକୋର୍ଟଙ୍କ ନିର୍ଦ୍ଦେଶ ଆଧାରରେ ପେନ୍‌ସନ ଦିଆଯିବାକୁ ଆଲ୍ ଓଡିଶା ଇପିଏଫ୍ ପେନସନର୍ସ ଆସୋସିଏସନ ବଲାଙ୍ଗିର ଜିଲ୍ଲା ଶାଖା ତରଫରୁ ଦାବୀ ହୋଇଆସୁଅଛି । ଅର୍ଦ୍ଧ ସରକାରୀ ଓ ବେସରକାରୀ ସଂସ୍ଥାରେ କାର୍ଯ୍ୟ କରି ଅବସର ନେଉଥିବା କର୍ମଚାରୀଙ୍କ ପାଇଁ ସାମାଜିକ, ଆର୍ଥିକ ସୁରକ୍ଷା ଲାଗି କେନ୍ଦ୍ର ସରକାର ଇପିଏଫ୍ -୯୫ ପେନସନ ଯୋଜନା -୧୯୯୫ ନଭେମ୍ବର ୧୬ ତାରିଖରେ ଲାଗୁ କଲେ । କେନ୍ଦ୍ର ସରକାର ୨୦୧୪ ମସିହାରେ ପେନସନଭୋଗୀଙ୍କ କ୍ଷେତ୍ରରେ ପାତର ଅନ୍ତର କରି ବିନା ମହଙ୍ଗା ଭତ୍ତାରେ ମାସିକ ସର୍ବନିମ୍ନ ୧ ହଜାର ଟଙ୍କା ପ୍ରଚଳନ କଲେ ଏବଂ ତାହା ମଧ୍ୟ ସମସ୍ତଙ୍କ କ୍ଷେତ୍ରରେ ଲାଗୁ ହୋଇନାହିଁ । ଦେଶରେ ପ୍ରାୟ ୬୭ଲକ୍ଷ ଇପିଏଫ୍ ପେନସନ ଭୋଗୀ ଅଛନ୍ତି । ତନ୍ମଧ୍ୟରୁ ଓଡିଶାରେ ୧ଲକ୍ଷ ୬୨ହଜାର ଫେନସନ ଭୋଗୀ କରୋନା ମହାମାରୀ ସମୟରେ ସ୍ୱଳ୍ପ ପେନସନ ଓ ଚିିକିତ୍ସା ସୁବିଧା ନ ପାଇ ଅତି ଯନ୍ତ୍ରଣାରେ ଜୀବନ ବିତାଉ ଅଛନ୍ତି । ୨୦୧୩ ମସିହାରେ ଖୋସିୟାରୀ କମିଟିର ସୁପାରିଶ ଅନୁସାରେ ସର୍ବନିମ୍ନ ମାସିକ ୯ ହଜାର ଟଙ୍କା ପେନସନ ଦିଆଯାଉ ବୋଲି ସଂଘ ପ୍ରଧାନମନ୍ତ୍ରୀଙ୍କୁ ଚିଠିରେ ଅନୁରୋଧ କରିଅଛି । ସୂଚନାଯୋଗ୍ୟ ଯେ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମେତ ଓଡିଶାର ୧୭ଜଣ ସାଂସଦ କେନ୍ଦ୍ର ଶ୍ରମମନ୍ତ୍ରୀ ସନ୍ତୋଷ କୁମାର ଗଙ୍ଗୱାରଙ୍କୁ ପତ୍ର ମାଧ୍ୟମରେ ଜଣାଇଥିଲେ ମଧ୍ୟ କୌଣସି ସୁଫଳ ଅଦ୍ୟାବଧି ମିଳିନାହିଁ । ଅନ୍ୟପକ୍ଷରେ ୨୦୧୬ ମସିହା ଅକ୍ଟୋବର ୪ ତାରିଖରେ ଆର.ସି. ଗୁପ୍ତା ବନାମ କେନ୍ଦ୍ର ସରକାର ଙ୍କ କେସକୁ ବିଚାରକୁ ନେଇ ସୁପ୍ରିମକୋର୍ଟ ପେନସନଭୋଗୀମାନଙ୍କୁ ସେମାନଙ୍କ ଶେଷ ଦରମା ଆଧାରରେ ବର୍ଦ୍ଧିତ ପେନସନ ଦେବା ପାଇଁ ଆଦେଶ ଦେଇଥିଲେ । ଉକ୍ତ ସୁପ୍ରିମକୋର୍ଟ ଦେଇଥିବା ଆଦେଶକୁ ଅନେକ ରାଜ୍ୟର ରିଜିଓନାଲ  ପ୍ରଭିଡେଣ୍ଡ ଫଣ୍ଡ କମିଶନରମାନେ କାର୍ଯ୍ୟକାରୀ କରିଥିବା ସ୍ଥଳେ ଓଡିଶା ରାଜ୍ୟର ରିଜିଓନାଲ ପ୍ରଭିଡେଣ୍ଟଫଣ୍ଡ କମିଶନର ଉକ୍ତ ଆଦେଶକୁ କାର୍ଯ୍ୟକାରୀ କରୁନାହାନ୍ତି । ଯାହା ଫଳରେ କେନ୍ଦ୍ରର ଅତିରିକ୍ତ ଭବିଷ୍ୟନିଧି କମିଶନର, ପେନସନ ବିଭାଗ, ନୂଆଦିଲ୍ଲୀ ତାଙ୍କ ଚିଠି ନଂ.୨୮୯୬ ତା.୦୮.୦୬.୨୦୧୮ ରେ ଦେଶରେ ଥିବା ସମସ୍ତ ରିଜିଓନାଲ ପ୍ରଭିଡେଣ୍ଟ ଫଣ୍ଡ କମିଶନରମାନଙ୍କୁ ଶିଘ୍ର ସୁପ୍ରିମକୋର୍ଟ ଅର୍ଡର କୁ କାର୍ଯ୍ୟକାରୀ କରିବା ପାଇଁ ନିର୍ଦ୍ଦେଶ ଦେଇଅଛନ୍ତି । ନଚେତ ତାଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ କରିବା ପାଇଁ ତାଗିଦ୍ କରିଅଛନ୍ତି । ଉକ୍ତ ଆଦେଶନାମାକୁ ମଧ୍ୟ ନ ମାନିବା ବଡ ଦୁର୍ଭାଗ୍ୟର ବିଷୟ । କରୋନା ସମୟରେ ସହାୟତା ରାଶି ବୃଦ୍ଧି କରି ମାସିକ ୯ ହଜାର ଟଙ୍କା ଦିଆଯିବା, ମଙ୍ଗାଭତ୍ତା ପ୍ରଦାନ କରିବା ଏବଂ ଆୟୁଷ୍ମାନ ଭାରତ ଯୋଜନାରେ ସାମିଲ କରାଯିବାକୁ ଇପିଏଫ୍ ସଂଘ ବଲାଙ୍ଗିର ଜିଲ୍ଲା ଆବାହକ ବିଶ୍ୱ ପ୍ରକାଶ ମିଶ୍ର, ଅମୁଲ୍ୟ ମିଶ୍ର, ସନ୍ତୋଷ ତ୍ରିପାଠୀ ପ୍ରମୁଖ ଏକ ପ୍ରେସ ବିବୃତ୍ତିରେ ଦାବି ଜଣାଇଛନ୍ତି ।