20-Apr-2021

ବୌଦ୍ଧ(ଶ୍ରୀବନ୍ତମେହେର)୨୦/୪ ବୌଦ୍ଧ ଜିଲ୍ଲା ବଘିଆପଡା ଗ୍ରାମ ପଞ୍ଚାୟତ ଅନ୍ତର୍ଗତ ସମାପାଜ୍‌ ଗ୍ରାମ ନିକଟରେ ଗୋଟିଏ ଜଙ୍ଗଲୀ ଭାଲୁ ଆକ୍ରମଣରେ ଜଣେ ଯୁବକ ଗୁରୁତର ଆହତ ହୋଇଥିବା ଜଣାପଡିଛି । ମିଳିଥିବା ସୂଚନା ଅନୁଯାୟୀ ବଘିଆପଡା ଫରେଷ୍ଟ ଅନ୍ତର୍ଗତ ସମାପାଜ୍‌ ନିକଟ କୁଟିବାରୀ ଗ୍ରାମର କବିଚନ୍ଦ୍ର ଦେହୁରୀ (୩୦ ବର୍ଷ ) ଗ୍ରାମ ନିକଟରେ ଥିବା ଜଙ୍ଗଲକୁ ସୋମବାର ସକାଳେ ଘର ମରାମତି ପାଇଁ ଶିଆଳିପଟ୍ଟ ସଂଗ୍ରହ କରିବାକୁ ଯାଇଥିଲେ । ହଠାତ୍‌ ଏକ ଭାଲୁ ତାଙ୍କୁ ଆକ୍ରମଣ କରି ଆଗ ଦୁଇ ଗୋଡରେ କାନକୁ ଜାବୁଡି ମୁଣ୍ଡକୁ ଆକ୍ରମଣ କରିଥିଲା । କବିଚନ୍ଦ୍ର ଭାଲୁକୁ ଗୋଇଠା ମାରି କୌଶଳକ୍ରମେ ଗୁରୁତର ଆହତ ଅବସ୍ଥାରେ ଘରକୁ ଆସି ଏକ ଅଟୋ ଯୋଗେ ବୌଦ୍ଧ ଡାକ୍ତରଖାନାରେ ଭର୍ତ୍ତି ହୋଇଥିଲେ । ସେ ବର୍ତ୍ତମାନ ବୌଦ୍ଧଜିଲ୍ଲା ମୁଖ୍ୟ ଡାକ୍ତରଖାନାରେ ଚିକିତ୍ସାଧୀନ ଥିବା ଜଣାପଡିଛି । ସେ ଜଣେ ଗରୀବ ଶ୍ରେଣୀର ଆଦିବାସୀ ଶ୍ରେଣୀର ହୋଇଥିବାରୁ ବନବିଭାଗ ତାଙ୍କୁ ସହାୟତା ଯୋଗାଇଦେବାକୁ ଜନସାଧାରଣରେ ଦାବି ହେଉଛି ।