13-Mar-2021

ନବରଙ୍ଗପୁର, ଉମରକୋଟ (ପ୍ରେରଣା ଖବର),  ନବରଙ୍ଗପୁର ଜିଲ୍ଲା ଉମରକୋଟ ସହରରେ ଫୁଟିଲା ଗୁଳି। ବ୍ୟବସାୟୀଙ୍କୁ ଗୁଳିମାଡ଼ କରି ଫେରାର ହୋଇଗଲେ ୩ ଦୁର୍ବୃତ୍ତ। ବ୍ୟବସାୟିକ ଶତ୍ରୁତାକୁ କେନ୍ଦ୍ର କରି ଏହି ଗୁଳିକାଣ୍ଡ ଘଟିଥିବା ସନ୍ଦେହ କରାଯାଉଛି।
ସୂଚନାନୁସାରେ, ସହରର ଷ୍ଟାଇଲ ଫର୍ନିଚର ଓ ଷ୍ଟାଇଲ ପାର୍ଲର ବ୍ୟବସାୟୀ ଟି.ସଞ୍ଜୀବ ସୁବୁଦ୍ଧି ଦୋକାନ ବନ୍ଦ କରିବା ପରେ କାମ ସାରି ରାତି ପ୍ରାୟ ୯ ଟା ବେଳକୁ ବାଇକରେ ଝରିଗାଁ ରାସ୍ତାରେ ଥିବା ତାଙ୍କ ଘରକୁ ଫେରୁଥିଲେ । ସେହି ସମୟରେ ଘରୁ ଶହେ ମିଟର ଦୂରରେ ଏକ ବ୍ୟାଙ୍କ ସାମନାରେ ୩ ଜଣ ମୁଖା ପିନ୍ଧା ଦୁର୍ବୃତ୍ତ ଏକ ବାଇକରେ ଆସିଥିଲେ । ଏବଂ ସଂଜୀବ ସୁବୁଦ୍ଧିଙ୍କ ଅଣ୍ଟାରେ ଜିରୋ ରେଞ୍ଜରେ ବନ୍ଧୁକ ରଖି ଗୁଳି ମାରି ଫେରାର ହୋଇ ଯାଇଥିଲେ। ସଞ୍ଜୀବ ସୁବୁଦ୍ଧି ଘଟଣା ସ୍ଥଳରେ ଟଳି ପଡ଼ିଥିଲେ।ଆଖ ପାଖରେ ଥିବା ଲୋକ ଗୁଳି ଫୁଟିବା ଶବ୍ଦ ଓ ବ୍ୟବସାୟୀ ବାଇକରୁ ଟଳି ପଡିଥିବା ଦେଖି ତୁରନ୍ତ ତାଙ୍କୁ ଉଦ୍ଧାର କରି ପ୍ରଥମେ ଉମରକୋଟ ମେଡ଼ିକାଲ ପରେ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ଅବସ୍ଥା ଗୁରୁତର ହେବାରୁ ସଂଜୀବଙ୍କୁ ରାତିରେ କୋରାପୁଟ ମେଡିକାଲ ନିଆଯାଇଥିଲା । ସେଠାରୁ ବିଶାଖାପାଟଣା ମେଡିକାଲକୁ ସ୍ଥାନାନ୍ତର କରାଯାଇଛି। କିଛି ଦିନ ପୂର୍ବରୁ କିଛି ଲୋକଙ୍କ ସହ ସଞ୍ଜୀବଙ୍କ ଝଗଡା ହୋଇଥିଲା, ଏହାକୁ ନେଇ ଉମରକୋଟ ଥାନାରେ ସଂଜୀବ ଅଭିଯୋଗ ମଧ୍ୟ କରିଥିଲେ ।୧୦ ଦିନ ପୂର୍ବରୁ ଦୁଇ ଜଣ ଲୋକ ମୁଖା ପିନ୍ଧି ଉମରକୋଟ ବ୍ଲକ ଅଫିସ ନିକଟରେ ଥିବା ସଂଜୀବ ସୁବୁଦ୍ଧିଙ୍କ ଫର୍ନିଚର ଦୋକାନକୁ ଆସିଥିଲେ ବୋଲି ସଞ୍ଜୀବଙ୍କ ଭାଇ କହିଛନ୍ତି । ଉମରକୋଟ ପୋଲିସ ଘଟଣାର ତଦନ୍ତ ଆରମ୍ଭ କରିଛି। ଘଟଣା ସ୍ଥଳରେ ଲାଗିଥିବା ସିସିଟିଭି ଫୁଟେଜକୁ ଆଧାର କରି ତଦନ୍ତ ଆଗକୁ ବଢାଇଛି ପୋଲିସ୍ ।