13-Mar-2021

ବରଗଡ(ମୁକୁନ୍ଦ ଦାସ) ଆକାଶବାଣୀ ଶ୍ରୋତା ସଂଘ ଅମ୍ବାପାଲି ବରଗଡ ପକ୍ଷରୁ ଆସନ୍ତା ୧୪ତାରିଖ ରାଜ୍ୟ ସ୍ତରୀୟ ସମ୍ମିଳନୀ ଅନୁଷ୍ଠିତ ହେବ । ବରଗଡ ଅଗ୍ରଗାମୀ ଯୁବକ ସଂଘ ସଭା କକ୍ଷରେ ଅନୁଷ୍ଠିତ ହେବାକୁ ଥିବା ଏହି ସମ୍ମିଳନୀ ରେ ରାଜ୍ୟର ବିଭିନ୍ନ ଅଞ୍ଚଳରୁ ଆକାଶବାଣୀର ଶ୍ରୋତା ମାନେ ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି। ରବିବାର ସକାଳ ସାଢେ ୧୦ଟାରେ ସମ୍ମିଳନୀ ଆରମ୍ଭ ହେବ । ପ୍ରାରମ୍ଭରେ ବିଭିନ୍ନ ଅଞ୍ଚଳରୁ ଶ୍ରୋତାମାନେ ଆଣିଥିବା ରେଡ଼ିଓ ଓ ଆକାଶବାଣୀ ସମ୍ପର୍କୀତ ଫଟୋଚିତ୍ର ପ୍ରଦର୍ଶିତ କରାଯିବ । ପ୍ରତି ବର୍ଷଭଳି ଚଳିତ ବର୍ଷ ବି ୩ଜଣଙ୍କୁ ସଂମ୍ମାନୀତ କରାଯିବ । ସଂଘର ପ୍ରତିଷ୍ଠାତା ସଭ୍ୟ ସ୍ବର୍ଗତ ବିଷ୍ଣୁ ସାହୁଙ୍କ ସ୍ମୃତିରେ ଶ୍ରେଷ୍ଠ ଶ୍ରୋତା ସଂମ୍ମାନ, ସ୍ବର୍ଗତ ନାଟ୍ୟଗୁରୁ ହରେକୃଷ୍ଣ ପୂଜାରୀଙ୍କ ସ୍ମୃତିରେ ଶ୍ରେଷ୍ଠ କଳାକାର ସଂମ୍ମାନ ଏବଂ ସ୍ବର୍ଗତ ସମାଜସେବୀ ବିପିନ ବିହାରୀ ପ୍ରଧାନଙ୍କ ସ୍ମୃତିରେ ସମାଜସେବା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଜଣଙ୍କୁ ଶ୍ରେଷ୍ଠ ସମାଜସେବୀ ସଂମ୍ମାନ ରେ ସଂମ୍ମାନୀତ କରାଯିବ । ଶେଷରେ କବିତା ଆସର ମଧ୍ୟ ଅନୁଷ୍ଠିତ ହେବ ବୋଲି ସଂଘର ସାଧାରଣ ସମ୍ପାଦକ ଯୁଧିଷ୍ଠିର ମହାପାତ୍ର ଜଣାଇଛନ୍ତି ।