02-Mar-2021

ବୌଦ୍ଧ (ପ୍ରେରଣା ଖବର): ନିଜ ପ୍ରିୟ ବନ୍ଧୁଙ୍କ ବିଭାହ ଭୋଜି ଖାଇ ବାଇକ ଯୋଗେ ଘରକୁ ଫେରୁଥିବା ଜଣେ ଯୁବକ ଟ୍ରାକ୍ଟର ଧକ୍କାରେ ମୃତ୍ୟୁ ବରଣ କରିବା ଭଳି ଏକ ସମ୍ବେଦନଶୀଳ ଘଟଣା ଘଟିଛି ବୌଦ୍ଧ ଜିଲ୍ଲା ହରଭଙ୍ଗା ଥାନା ଅନ୍ତର୍ଗତ କୁଟିଝାର ଗ୍ରାମ ନିକଟସ୍ଥ ଡାଲଢପା ଠାରେ।ମୃତକ ଜଣକ ହେଲେ ଛତ୍ରଙ୍ଗ ଗ୍ରାମର ସନ୍ତୋଷ ଡାକୁଆ(୨୩) ବୋଲି ଜଣାପଡିଛି। ପ୍ରାପ୍ତ ସୂଚନା ଅନୁଯାଇ ଗତ ୬ ମାସ ତଳେ ସନ୍ତୋଷର ବାପାଙ୍କର ହାର୍ଟଆଟାର୍କରେ ମୃତ୍ୟୁ ହୋଇଥିଲା।ବାପାଙ୍କ ମୃତ୍ୟୁ ପରେ ଘରେ କେବଳ ସନ୍ତୋଷ ଓ ବିଧବା ମା ମିଶି ରହୁଥିଲେ।ସେ ସ୍ଥାନୀୟ ଅଞ୍ଚଳରେ ଥିବା ଏଆରଏସଏସ ନାମକ ଏକ ବେସରକାରୀ ଠିକାସଂସ୍ଥାରେ ଡ୍ରାଇଭର ଭାବେ କାମକରି ପରିବାର ପ୍ରତିପୋଷଣ କରୁଥିଲେ।ସୋମବାର କୁଟିଝାର ଗ୍ରାମର ଜଣେ ବନ୍ଧୁଙ୍କ ବାହା ଭୋଜିଖାଇ ଅପରାହ୍ନ ୪ଟା ସମୟରେ ଘରକୁ ବାଇକରେ ଫେରୁଥିବା ବେଳେ ସମ୍ମୁଖ ପଟୁ ଦ୍ରୁତ ଗତିରେ ଯାଉଥିବା ଏକ ଟ୍ରାକ୍ଟର ବାଇକକୁ ଧକ୍କା ଦେବାରୁ ସେ ଛିଞ୍ଚାଡି ହୋଇ ପଡ଼ିଥିଲେ।ତାଙ୍କର ବାଁ ପଟ କାନରେ ଗଭୀର ଆଘାତ ଲାଗି ପ୍ରବଳ ରକ୍ତସ୍ରାବ ହୋଇ ଘଟଣା ସ୍ଥଳରେ ହିଁ ମୃତ୍ୟୁ ହୋଇଥିଲା।ଅପର ପକ୍ଷରେ ଦୁର୍ଘଟଣା ହେବାପରେ ଟ୍ରାକ୍ଟର ଟି ସେଠାରୁ ଫେରାର ହୋଇଥିବା କୁହାଯାଉଛି।ଖବର ପାଇ ହରଭଙ୍ଗା ପୋଲିସ ସେଠାରେ ପହଞ୍ଚି ମୃତଦେହ ଓ ବାଇକକୁ ଜବତକରି ଏହାର ତଦନ୍ତ ଆରମ୍ଭ କରିବା ସହ ମୃତଦେହକୁ ବ୍ୟବଛେଦ ପାଇଁ ବୌଦ୍ଧ ପଠାଇଥିବା ଜଣାପଡ଼ିଛି।ଏହି ଦୁଃଖଦ ଘଟଣାକୁ ନେଇ ସ୍ଥାନୀୟ ଲୋକଙ୍କ ଭିତରେ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ସହ ହରଭଙ୍ଗା ଅଞ୍ଚଳରେ ଅଧିକାଂଶ ଟ୍ରାକ୍ଟର ଏବେ ଅଣ ପ୍ରଶିକ୍ଷିତ ଲାଇସେନ୍ସ ନଥିବା ଡ୍ରାଇଭର ଚାଲୁଥିବାରୁ ବାରମ୍ବାର ଦୁର୍ଘଟଣା ଘଟି ଅକାଳରେ ବହୁଲୋକ ଜୀବନ ହାରୁଥିବା ଅଭିଯୋଗ  କରିଛନ୍ତି। 

ଫେରାର୍ ହୋଇଥିବା ଟ୍ରାକ୍ଟର ମହାଲ୍ଲିକପଡା ଗ୍ରାମର ବୋଲି ସାଧାରଣରେ ଚର୍ଚ୍ଚା ହେଉଛି।ଗତ କିଛିମାସ ତଳେ ସ୍ୱାମୀ ଓ ଦୁର୍ଘଟଣାରେ ଏକମାତ୍ର ରୋଜଗାର କ୍ଷମ ପୁଅକୁ ହରାଇ ମୃତ ସନ୍ତୋଷ ର ମା ସମ୍ପୂର୍ଣ୍ଣ ରୂପେ ଅସହାୟ ହୋଇପଡିଛନ୍ତି।ଏ ଖବର ଜଣା ପଡିବା ପରେ ଛତ୍ରଙ୍ଗ ସମେତ ଆଖପାଖ ଅଞ୍ଚଳରେ ଶୋକର ଛାୟା ଖେଳି ଯାଇଛି।ପ୍ରଶାସନ ପକ୍ଷରୁ ମୃତକଙ୍କ ଅସହାୟ ମା କୁ ଆର୍ଥିକ ସହାୟତା ଯୋଗାଇଦେବାକୁ ସାଧାରଣରେ ଦାବି ହେଇଛି।