25-Feb-2021

ବଲାଙ୍ଗୀର,(ସନ୍ତୋଷ କୁମାର ଠାକୁର) ସ୍ୱାସ୍ଥ୍ୟ କ୍ଷେତ୍ରରେ ଅବହେଳିତ ବଲାଙ୍ଗୀର ଜିଲ୍ଲାରେ କ୍ୟାନ୍‌ସର ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି । ଏଠାରେ ଏକ କ୍ୟାନସ୍‌ର ହସ୍ପିଟାଲର ନିତାନ୍ତ ଅବଶ୍ୟକ ରହିଛି । କ୍ୟାନସର ଚିକିତ୍ସାର ଉପଯୁକ୍ତ ସୁବିଧା ନଥିବାରୁ  ରୋଗୀ ମାନେ କଟକ ଓ ଦୁରଦୁରାନ୍ତକୁ ଯାଇ ଅଯଥା ଖର୍ଚ୍ଚାନ୍ତା ହେବା ସହ ଅକାଳରେ ମୃତ୍ୟୁବରଣ ମଧ୍ୟ କରୁଛନ୍ତି । ତେଣୁ ଏଠାରେ ତୁରନ୍ତ ଏକ କ୍ୟାନସର ହସ୍ପିଟାଲ ନିର୍ମାଣ ପାଇଁ ଜିଲ୍ଲା ଓକିଲ ସଂଘ ଦାବି କରୁଛି । ଆଜି ଏହି ଦାବିକୁ ନେଇ ସ୍ଥାନୀୟ ସିଭିଲ କୋର୍ଟ ବାର ହଲ୍ ଠାରେ ଅନୁଷ୍ଠିତ ଏକ ପ୍ରେସ୍ ମିଟ୍ ମାଧ୍ୟମରେ ସଂଘର ସଂପାଦକ ବାସୁଦେବ ରଥ ବଲାଙ୍ଗୀରରେ କ୍ୟାନସର ହସ୍ପିଟାଲ ନିର୍ମାଣ ପାଇଁ ସରକାର ପଦକ୍ଷେପ ଗ୍ରହଣ କରନ୍ତୁ ବୋଲି ନିବେଦନ କରିଛନ୍ତି । ଏହା ପୂର୍ବରୁ ମଧ୍ୟ ସଂଘ ପକ୍ଷରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ସ୍ୱାସ୍ଥ୍ୟ ମନ୍ତ୍ରୀଙ୍କୁ ଏ ସଂପର୍କରେ ଦାବି କରାଯାଇଛି । ତେବେ କ୍ୟାନସର ହସ୍ପିଟାଲ ନିର୍ମାଣ ହେବା ପୂର୍ବରୁ ଜରୁରୀକାଳୀନ ସୁବିଧା ପାଇଁ ପ୍ରଥମେ ଏଠାରେ ଏକ କେମୋ ୟୁନିଟ ସ୍ଥାପନ କରାଯାଉ ବୋଲି ସଂଘର ସଂପାଦକ ଶ୍ରୀ ରଥ ଦାବି କରିଛନ୍ତି । ଆଗାମୀ ଦିନରେ ବଲାଙ୍ଗୀରବାସୀଙ୍କ ଏହି ନ୍ୟାର୍ଯ୍ୟ ଦାବି ପୁରଣ ନହେଲେ  ଜିଲ୍ଲା ଓକିଲ ସଂଘ ପକ୍ଷରୁ ଏକ ବିରାଟ ଆନ୍ଦୋଳନ ହେବ ବୋଲି ଚେତାବନୀ ଦିଆଯାଇଛି । ଆଜିର ଏହି ପ୍ରେସ ମିଟ୍ ରେ ଅନ୍ୟ ମାନଙ୍କ ମଧ୍ୟରେ ଯୁଗ୍ମ ସଂପାଦକ ରଶ୍ମିରଂଜନ ପଣ୍ଡା ଓ କାର୍ଯ୍ୟକାରୀ କମିଟି ସଭ୍ୟ  ରବି ନାରାୟଣ ବହିଦାର ଓ ଦୀନେଶ ନାଗ ମଂଚାସୀନ ଥିଲେ । ଅନ୍ୟ ମାନଙ୍କ ମଧ୍ୟରେ ଏ୍‌ଡଭୋକେଟ ରତନ ମହାରଣା, ସୁରେନ୍ଦ୍ର ମିଶ୍ର ଓ  ପ୍ରଶାନ୍ତ ସେନାପତି କାର୍ଯ୍ୟକ୍ରମରେ ସହଯୋଗ କରିଥିଲେ ।