23-Jul-2026

କଣ୍ଟାବାଞ୍ଜି(ମୋହନ ସୁନା): ତିଖାଳି କେନାଲରୁ ଜାମଖୁଣ୍ଟା ନିକଟସ୍ଥ ଖାସବାହାଲ ପର୍ଯ୍ୟନ୍ତ କେନାଲ ସଂଯୋଗ କାର୍ଯ୍ୟ ସମ୍ପୂର୍ଣ୍ଣ ହୋଇଥିବାରୁ ଯଥାଶୀଘ୍ର କେନାଲ ମାଧ୍ୟମରେ ଜଳଯୋଗାଣ ଆରମ୍ଭ କରିବାକୁ ସ୍ଥାନୀୟ ଅଞ୍ଚଳରେ ଜୋରଦାର ଦାବି ଉଠିଛି।

ଏହି ପ୍ରକଳ୍ପ କାର୍ଯ୍ୟକାରୀ ହେଲେ ଜାମଖୁଣ୍ଟା, ଗନ୍ଧର୍ଲଲା, ଚାନ୍ଦୋତରା ଏବଂ ଭୁରସାଗୁଡା ପଞ୍ଚାୟତର ପ୍ରାୟ ୩୦ଟି ଗ୍ରାମର ଲକ୍ଷାଧିକ ଚାଷୀ ଉପକୃତ ହେବେ ବୋଲି କୁହାଯାଉଛି। ଭୁରସାଗୁଡା ପଞ୍ଚାୟତର ୫ଟି, ଚାନ୍ଦୋତରା ଗ୍ରାମ ପଞ୍ଚାୟତର ୬ଟି, ଗନ୍ଧର୍ଲଲା ଗ୍ରାମ ପଞ୍ଚାୟତର ୬ଟି ଏବଂ ଜାମଖୁଣ୍ଟା ଗ୍ରାମ ପଞ୍ଚାୟତର ୫ଟି ଗ୍ରାମର ଚାଷୀମାନେ ସିଧାସଳଖ ଭାବେ ଏହାର ସୁଫଳ ପାଇବେ।

କେନାଲରେ ପାଣି ଯୋଗାଣ ହେଲେ ପ୍ରାୟ ୭୫୦ ଏକର ଜମିରେ ଚାଷ ସମ୍ଭବ ହେବା ସହ କୃଷି ଉତ୍ପାଦନ ବୃଦ୍ଧି ପାଇବ। ଏହା ଦ୍ୱାରା ଅଞ୍ଚଳର ଦାଦନ ସମସ୍ୟା ହ୍ରାସ ପାଇବା ସହ ସ୍ଥାନୀୟ ସ୍ତରରେ ଚାଷୀମାନଙ୍କ ପାଇଁ ଜୀବିକାର ସୁଯୋଗ ବଢ଼ିବ ବୋଲି ସାଧାରଣ ଲୋକ ଆଶା ପ୍ରକାଶ କରିଛନ୍ତି।

ଏହି ପରିପ୍ରେକ୍ଷୀରେ ତିଖାଳି କେନାଲରୁ ଅବିଳମ୍ବେ ଜଳ ଛାଡ଼ି କେନାଲ ମାଧ୍ୟମରେ ସିଚାଇ ବ୍ୟବସ୍ଥା କାର୍ଯ୍ୟକ୍ଷମ କରିବାକୁ ସରକାରଙ୍କ ନିକଟରେ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି।ଏହି ଦାବି ଉଠାଇ ବିଜୁ ଜନତା ଦଳର କୃଷକ ସଂଗଠନ ସଭାପତି ଅଜିତ ଯୋଶୀ ସରକାରଙ୍କୁ ତୁରନ୍ତ ପଦକ୍ଷେପ ନେଇ ଚାଷୀମାନଙ୍କ ସ୍ୱାର୍ଥରେ କେନାଲରେ ପାଣି ଯୋଗାଇବାକୁ ଅନୁରୋଧ କରିଛନ୍ତି।