08-Feb-2021

ବଲାଙ୍ଗୀର,(ପ୍ରେରଣା ଖବର)- ଗତ କିଛି ଦିନ ତଳେ ବଲାଙ୍ଗୀର ସରକାରୀ ବସଷ୍ଟାଣ୍ଡ୍ ଠାରେ ଥିବା ପୁରୁଣା ଦୋକାନ ଗୃହ ଗୁଡିକ ଭଙ୍ଗା ଯାଇ ନୂତନ ଷ୍ଟଲ ନିର୍ମାଣ ହୋଇଥିଲା । ଏବେ ଷ୍ଟଲ ନିର୍ମାଣ ହୋଇ ଫେବୃୟାରୀ ୧ ତାରିଖରୁ ସଂପୃକ୍ତ ଦୋକାନୀ ମାନଙ୍କୁ ହେଣ୍ଡଓଭର କରି ଦିଆଯାଇ ସାରିଛି । କରୋନା ମହାମାରୀ ଯୋଗୁଁ ଦୀର୍ଘ ମାସ ଧରି ସରକାରୀ ବସ ଚଳାଚଳ ବନ୍ଦ ରହିଥିବା ବେଳେ ଏବେ କିଛି ଟା ସ୍ୱାଭାବିକ ପରିସ୍ଥିତିକୁ ଆସିଛି । ତଥାପବି ଏଠାରେ ରହିଥିବା ଦୋକାନ ଗୁଡିକରେ ବିକ୍ରିବଟା ପୁରାପୁରି ମାନ୍ଦା ଅବସ୍ଥାରେ ରହିଛି । କରୋନା କବଳରୁ ଜିଲ୍ଲା ମୁକୁଳିବବାକୁ ଯାଉଥିବା ବେଳେ ଓଡିଶା ଷ୍ଟେଟ୍ ରୋଡ ଆଣ୍ଡ ଟ୍ରାନ୍ସପୋର୍ଟ କୋରପୋରେସନର ମାଲିକାନାରେ ଥିବା ଏହି ଷ୍ଟଲ ଗୁଡିକ ପାଇଁ ଟେଣ୍ଡର କରାଗଲା ପରେ ଯେଉଁମାନେ ସିକ୍ୟୁରିଟି ଡିପୋଜିଟ କଲେ ସେମାନଙ୍କ ସହ ଏଗ୍ରିମେଣ୍ଟ କରାଯାଇ ଷ୍ଟଲ ହେଣ୍ଡଓଭର କରାଗଳା । ତେବେସବୁଠାରୁ ଦୁଃଖର ବିଷୟ,
  ଓଏସ୍‌ଆର୍‌ଟିସି ନିର୍ମାଣ କରିଥିବା ଏହି ଷ୍ଟଲ ଗୁଡିକ ହେଣ୍ଡଓ ଭର ହେବା ପୁର୍ବରୁ ଷ୍ଟଲର କାନ୍ଥ ଗୁଡିକରେ ଫାଟ ଦେଖାଯାଇଛି । ପ୍ରତ୍ୟେକ ଷ୍ଟଲର ବିଭିନ୍ନ ସ୍ଥାନରେ ଏପରି ଫାଟ ରହିଥିବା ସଂପୃକ୍ତ ଦୋକାନୀ ମାନେ ଅଭିଯୋଗ କରିଛନ୍ତି । ଏପରିକି ତଳେ ଲାଗିଥିବା ମାର୍ବଲ ପ୍ଲେଟ ଗୁଡିକ ମଧ୍ୟ ଅନେକ ସ୍ଥାନରେ ଭାଙ୍ଗିଯାଇଥିବା ଦେଖିୁବାକୁ ମିଳିଛି । ଅତି ନିମ୍ନମାନର କାମ ଓ ସିମେଣ୍ଟବାଲିର ଅନୁପାତ ଠିକା ହୋଇନଥିବା ତଥା ନିର୍ମାଣ ଦାୟିତ୍ୱରେ ଥିବା ଠିକାଦାରଙ୍କ ଅବହେଳା ଯୋଗୁଁ ଷ୍ଟଲ ଗଡିକର ଏପରି ଦୁରାବସ୍ଥା ହୋଇଛି ବୋଲି ଦୋକାନୀ ମାନେ ଅଭିଯୋଗ କରିଛନ୍ତି । ଏପରିକି ଅତି ହାଲୁକା ଲୁହାରେ ତିଆରି ସଟର୍ ସବୁ ଫିଟିଙ୍ଗ୍ ହୋଇଥିବା ଯୋଗୁଁ ଏହା ବ୍ୟବହାର ଉପଯୋଗୀ ହୋଇ ନାହିଁଁ ।

ନିର୍ମାଣ ହୋଇ ସାରିଥିବା ଏହି ଷ୍ଟଲ ଗୁଡିକୁ ଦେଖିଲେ ଏହାର ସ୍ଥାୟୀତ୍ୱ ପ୍ରତି  ସ୍ୱତଃ ପ୍ରଶ୍ନବାଚୀ ସୃଷ୍ଟି ହୁଏ । ଗୋଟିଏ ପଟେ ଓଏସ୍‌ଆର୍‌ଟିସି କର୍ତ୍ତୃପକ୍ଷ ଷ୍ଟଲ ବାବଦକୁ ମାସିକ ଭଡା ମାର୍କେଟ ରେଟ୍ ରୁ ଢ଼େର  ଅଧିକ ଟଙ୍କା  ଧାର୍ଯ୍ୟ କରିଥିବା ବେଳେ ଦୋକାନ ଗୃହ ଗୁିକର ଅବସ୍ଥା ନୂଅଁ ରୁ ଏପରି ଭଙ୍ଗାଦଦରା ହେବା ସମସ୍ତଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି । ଏ ସଂପର୍କରେ ଆମେ ଓଏସ୍‌ଆର୍‌ଟିସିର ଜନୈକ କର୍ମଚାରୀଙ୍କୁ ଏପରି ନିମ୍ନମାନର କାମ ସଂପର୍କରେ ପଚାରିବାରୁ ସେ ଏହି ଫାଟ କେବଳ ଉପରେ ହୋଇଛି ଏହାଦ୍ୱାର ଷ୍ଟଲର କିଛି ହେବ ନାହିଁ ବୋଲି ହାଲୁକା ଭାବରେ କହିଦେଇଥିଲେ । ତେବେ ସେ ଯାହା ହେଉ ଷ୍ଟଲ ନିର୍ମାଣରେ ଓଏସ୍‌ଆର୍‌ଟିସିର ଏପରି  ମନୋମୁଖୀ କାରବାରକୁ ସାଧାରଣରେ ନିନ୍ଦା କରାଯାଇଛି । ରାଜ୍ୟ ସରକାର ଏଥିପ୍ରତି ଦୃଷ୍ଟି ଦେଇ ଦୋଷୀ ବିରୁଦ୍ଧରେ ଦୃଷ୍ଟାନ୍ତମୂଳକ କାର୍ଯ୍ୟନୁଷ୍ଠାନ ଗ୍ରହଣ କରିବା ପାଇଁ ବିଭିନ୍ନ ମହଲରେ ଦାବି ହେଉଛି ।