25-May-2026

କଣ୍ଟାମାଳ(ଜୟ କୁମାର ମହାରଣା): କଣ୍ଟାମାଳ ହରିଶଙ୍କର କଳା ମଣ୍ଡପ ଠାରେ ଗତ ୨୦ତାରିଖ ଠାରୁ ଦୀର୍ଘ ପଞ୍ଚାଦିନ ଧରି ଚାଲିଥିବା ରାଜ୍ୟସ୍ତରୀୟ ୨୧ତମ ଲୋକକଳା ଉତ୍ସବ ରବିବାର ବିଳମ୍ବିତ ରାତିରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ସହ ହଜାର ହଜାର ଦର୍ଶକଙ୍କ ସମାଗମରେ ଉଦଯାପିତ ହୋଇଯାଇଛି। ଉଦଯାପନୀ ସଂନ୍ଧ୍ୟାରେ ଆବାହକ ଦିବ୍ୟଶଙ୍କର ରାଉତଙ୍କ ସଭାପତିତ୍ୱରେ ଅନୁଷ୍ଠିତ ସାଂସ୍କୃତିକ ସଭାରେ ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ତଥା କଣ୍ଟାମାଳ ବିଧାୟକ କହ୍ନାଇ ଚରଣ ଡାଙ୍ଗ ମୁଖ୍ୟଅତିଥି ଓ ଦୁଇ ନମ୍ବର ଜିଲ୍ଲାପରିଷଦ ସଭ୍ୟା ପଦ୍ମାଳୟା ପ୍ରଧାନ, କଣ୍ଠଶିଳ୍ପୀ ଶାଶ୍ୱତ

ତ୍ରିପାଠୀ,କଳାକାର ଶୁଚିସ୍ମିତା ମହାପାତ୍ର , ସମ୍ପାଦକ ଓମପ୍ରକାଶ ମିଶ୍ର ପ୍ରମୁଖ ସମ୍ମାନୀତ ଅତିଥିଭାବେ ଯୋଗଦେଇଥିଲେ  l  ସଦସ୍ୟ ରଞ୍ଜନ କୁମାର ପାତ୍ର ଅତିଥିପରିଚୟ ଓ ଓମପ୍ରକାଶ ମିଶ୍ର ଧନ୍ୟବାଦ ଅର୍ପଣ କରିଥିଲେ l ପରେ ଓଡିଆ ଭାଷା,ସାହିତ୍ୟ ଓ ସଂସ୍କୃତି ବିଭାଗ ଦ୍ବାରା ପ୍ରାୟୋଜିତ ଡ଼ଃ କୃପାସିନ୍ଧୁ ମହନ୍ତଙ୍କ କାର୍ଯ୍ୟକ୍ରମ “ମହୁଲ ଫୁଲର ବାସନା.. ବନାଇଦିବ ହାର ଆମେ କାନେ ଦେବ ସୁନା”…ମୟୁରଭଞ୍ଜ ର ସାନ୍ତାଳୀ ସଙ୍ଗୀତରେ ଝୁମିଲେ ଦର୍ଶକ  l  ଗଞ୍ଜାମ ଜିଲ୍ଲା ଦିଗପହଣ୍ଡି ର ଆଲୋକ ବିଷୋୟୀ ଓ ସାଥୀ କଳାକାରଙ୍କ ପଶୁମୁଖା ନୃତ୍ୟ ସମ୍ପୂର୍ଣ୍ଣ ଭିନ୍ନ ଯାହାକି ଦର୍ଶକଙ୍କ ମଧ୍ୟରେ

ଆବେଗ ସୃଷ୍ଟି କରିଥିଲା  l  ସେହିପରି ଗାୟତ୍ରୀ କଳା ଅନୁଷ୍ଠାନ ରାୟଗଡା ର ଢେମଶା ନୃତ୍ୟ ,ନଟରାଜ କଳା ମନ୍ଦିର ଫୁଲବାଣୀର ଓଡିଶୀ ଓ  କୁଇନାଚ ଏବଂ ଦୀପକ ଜାଲ ଟିଟଲାଗଡର ସମ୍ବଲପୁରୀ ନୃତ୍ୟ ସମେତ ରାଜୁ ନନ୍ଦ ଓ ଟ୍ଵିଙ୍କିଲ ଙ୍କ ଲୋକଗୀତ ହଜାର ହଜାର ଦର୍ଶକଙ୍କ ହୃଦୟକୁ ସ୍ପନ୍ଦିତ କରି ବିଳମ୍ବିତ ରାତିରେ ଉଦଯାପିତ ହୋଇଯାଇଛି l  ମହୋତ୍ସବ କମିଟିର ପୂର୍ଣ୍ଣଚନ୍ଦ୍ର ଖଟୁଆ, ଧର୍ମେନ୍ଦ୍ର ରଣା, ପ୍ରଦୀପ ଦାଶ, ରାଜକିଶୋର ବାଘ, ହରି ରଣା, ନରେନ୍ଦ୍ର ଖଟୁଆ, ଅରୁଣ ରଣା,ମନୋଜ ରାଜହଂସ, ରଞ୍ଜନ କୁମାର ପାତ୍ର, ନବୀନ କୁମାର ନାଏକ, ଅରୁଣ କୁମାର ଖଟୁଆ, ଶରତ କୁମାର ସାହୁ, ସୁଦାମ ମିଶ୍ର,  ପ୍ରେମରଞ୍ଜନ, ବିଶ୍ଵାମିତ୍ର ପାଢୀ, ଅକୃର ସାହୁ,  କୃଷ୍ଣ ପୁଟେଲ  ସମେତ ସମସ୍ତ ସଦସ୍ୟ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ l