09-May-2026

ଜଗତସିଂହପୁର(ଚିନ୍ମୟ ବିଶ୍ୱାଳ): ଜଗତସିଂହପୁର ଥାନା ପରିସରରେ ଜଗତସିଂହପୁରର ଆରକ୍ଷୀ ଅଧିକ୍ଷକ ଅଙ୍କିତ ବର୍ମାଙ୍କ ସଭାପତିତ୍ୱରେ ଓଡିଶା ପୋଲିସ ବିଭାଗ ଡି.ଜି ଙ୍କ ଭିଡିଓ କନଫରେନ୍ସ ଜରିଆରେ ଯୁଭେଣ୍ଟିକା ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ୯ ରୁ ୧୭ବର୍ଷ ଆଖପାଖ ଅଂଚଳର ବହୁ କିଶୋର ଓ କିଶୋରୀ ଯୋଗ ଦେଇଥିଲେ। ଆଜିର କାର୍ଯ୍ୟକ୍ରମରେ  ଅତିରିକ୍ତ ଆରକ୍ଷୀ ଅଧୀକ୍ଷକ ସତ୍ୟବ୍ରତ ଦାସ, ଥାନା ଅଧିକାରୀ ସୁଶାନ୍ତ କୁମାର ସାହୁ, ଏସ.ଡି.ପି.ଓ  ରଶ୍ମିରଂଜନ ଦାସ, ଡି.ଏସ.ପି  ସରୋଜିନୀ ସିଂହ, ସିଡବ୍ଲୁଡିଏ  ଅଧିକାରିଣୀ  ଓ ସି.ଡି.ପି.ଓ ଧନେଶ୍ୱରୀ ନାୟକ ପ୍ରମୁଖ ଉପସ୍ଥିତ ରହି କିଶୋର ଓ କିଶୋରୀ ମାନଙ୍କୁ ସେମାନଙ୍କ ଅଧିକାର ବିଷୟରେ ସଚେତନ କରାଇ ଥିଲେ। ଉପସ୍ଥିତ ଅଧିକାରୀମାନେ ସାଇବର ସୁରକ୍ଷା, କିଶୋର ଓ କିଶୋରୀ ନିର୍ଯାତନା ବିଷୟରେ ସଚେତନ ହେବା, ସେମାନଙ୍କ ଡିଜିଟାଲ ଅଧିକାର, ସୁରକ୍ଷିତ ଅନଲାଇନ୍ ବ୍ୟବହାର ସହ ପୀଡ଼ିତା ଓ ଆଇନ୍ ସହ ସଙ୍ଘର୍ଷରତ ଶିଶୁର ସୁରକ୍ଷା ଓ ଅଧିକାର ବିଷୟରେ ସଚେତନ କରାଇବା ଏବଂ କୌଣସି ସ୍ଥାନରେ  ନିଜକୁ ଅସୁରକ୍ଷିତ ମନେକଲେ ପୋଲିସ ତଥା ୧୯୩୦ ନମ୍ୱରକୁ ଖବର ଦେବା ଭଳି ସୂଚନା ପ୍ରଦାନ କରି ଥିଲେ। ଥାନାରେ ସେମାନଙ୍କ ପ୍ରତି କରାଯାଉଥିବା ସାବଲୀଳ ବ୍ୟବହାର ସଂପର୍କରେ ଅବଗତ କରାଯାଇଥିଲା। ଏହି କାର୍ଯ୍ୟକ୍ରମଟି ଓଡ଼ିଶାର ସମସ୍ତ ଜିଲ୍ଲାର ଥାନା ଗୁଡିକରେ ଭିଡ଼ିଓଗ୍ରାଫି ଜରିଆରେ  ଚାଲିଥିବାବେଳେ ଡି.ଜି.ପି ଙ୍କ ତଦାରଖରେ ଥାନାରେ କିଶୋରୀ ମାନଙ୍କୁ ସେମାନଙ୍କ ଅସୁବିଧା ଓ ଥାନା ବାବଦରେ ପ୍ରଶ୍ନ କରାଯାଇଥିବାବେଳେ ସେମାନେ ନିଜର ସୁଚିନ୍ତିତ ମତ ପ୍ରଦାନ କରିଥିଲେ। ପିଲା ମାନଙ୍କୁ ଏସ.ପି ଖାତା, କଲମ, ପେନସିଲ, ଖାଦ୍ୟ ପୁଡ଼ିଆ ବଣ୍ଟନ କରିଥିଲେ। ଉକ୍ତ କାର୍ଯ୍ୟକ୍ରମରେ ଜଗତସିଂହପୁର ଥାନାର ସମସ୍ତ କର୍ମଚାରୀ ଉପସ୍ଥିତ ରହି ସହଯୋଗ କରିଥିଲେ।