08-May-2026

 ଅତାବିରା(ଆକାଶ ମିଶ୍ର): ଆଗାମୀ ୧୧ ତାରିଖରୁ ଚଳିତ ରବି ଫସଲର ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବ। ଆଗାମୀ ଜୁନ ଶେଷ ସୁଦ୍ଧା ଧାନ ସଂଗ୍ରହ କରିବାକୁ ସରକାର ଲକ୍ଷ୍ୟ ରଖିଥିବା ବେଳେ ପ୍ରତି ଥର ଧାନ କ୍ରୟ ନେଇ ବିଭ୍ରାଟ ଦେଖା ଦେଇଥାଏ। ଏ ନେଇ ଓଡ଼ିଶା ରାଜ୍ୟ କୃଷକ ସଂଗଠନର ବୈଠକ ସଭାପତି ଭୁବନ ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ସପ୍ତାହେ ପରେ ଏକ ବାତ୍ୟା କିମ୍ବା ଲଘୁଚାପ ବର୍ଷା ଆସିବାର ପାଣିପାଗ ବିଭାଗ ଆଗୁଆ ସୂଚନା ଦେଉଛି। ଜୁନ ପ୍ରଥମ ସପ୍ତାହ ପରେ ପ୍ରାୟତଃ ପ୍ରାକ୍ ମୌସୁମୀ ବର୍ଷା ଆସି ଥାଏ। ଏଣୁ ବର୍ଷାକୁ ଦୃଷ୍ଟିରେ ରଖି ଧାନ ସଂରକ୍ଷଣ କରିବା ପାଇଁ ଭିତ୍ତିଭୂମି, ପୋଲିଥିନ ଆଦି ମହଜୁତ ରଖିବାକୁ ଦାବି କରାଯାଇଥିଲା। ଜୁନ ଶେଷ ସୁଦ୍ଧା ସମସ୍ତ ଧାନ ଉଠାର ବ୍ୟବସ୍ଥା କରିବା ସହ ମଣ୍ଡିରେ ଚାଷୀ ଧାନ ଆଣିଲା ମାତ୍ରେ ଧାନ କିଣାଯାଉ ବୋଲି ଦାବି କରାଯାଇଥିଲା। ଏହାର ସାଂଗଠାନିକ ଆଲୋଚନା ହୋଇଥିଲା। ବୈଠକରେ ଅନ୍ୟମାନଙ୍କ ମଧ୍ୟରେ ସଂଗଠନର ସଂପାଦକ ନରେନ୍ଦ୍ର ପ୍ରଧାନ, ଚାଷୀ ନେତା ବୀରେନ୍ଦ୍ର କର, ବୃଦ୍ଧଦେବ ନନ୍ଦ, ଟିକେଲାଲ ମିଶ୍ର, ସୁରେଶ କର୍ଣ୍ଣ, ଦଶରଥ ଭୋଇ, ଅମୂଲ୍ୟ ସ୍ବାଇଁ, ଆକାଶ ପ୍ରଧାନ, ସମୀର ପ୍ରଧାନ ପ୍ରମୁଖ ଉପସ୍ଥିତ ଥିଲେ।