27-Apr-2026

ବଲାଙ୍ଗୀର(ପ୍ରେରଣା ଖବର): ରାଜ୍ୟରେ ଗ୍ରୀଷ୍ମ ପ୍ରବାହର ପ୍ରକୋପ ବଢ଼ୁଥିବା ବେଳେ ସାଧାରଣ ଜନତା ଓ ପଥିକମାନଙ୍କୁ ଆଶ୍ୱସ୍ତି ଦେବା ପାଇଁ ଆଗେଇ ଆସିଛି ସ୍ୱେଚ୍ଛାସେବୀ ସଂଗଠନ 'ବିଙ୍ଗ ହ୍ୟୁମାନ ଫାଉଣ୍ଡେସନ'। ସହରର ବ୍ୟସ୍ତବହୁଳ ପୁରୁଣା ବସଷ୍ଟାଣ୍ଡ ଅଞ୍ଚଳରେ ଲୋକଙ୍କୁ ଶୀତଳ ପାନୀୟ ଜଳ ଯୋଗାଇ ଦେବା ପାଇଁ ଏକ ଜଳଛତ୍ରର ଶୁଭାରମ୍ଭ କରାଯାଇଛି।
ଏହି ଜନହିତକର କାର୍ଯ୍ୟରେ ସହରର ପ୍ରତିଷ୍ଠିତ ମେହେଫିଲ୍ ରେଷ୍ଟୁରେଣ୍ଟ ଏବଂ ଜିଓ ର ସହଭାଗିତାରେ  ସ୍ୱାବଲମ୍ବୀ ମହିଳା ଫଳ ଦୋକାନୀ ହେମଳତା ସାହୁ ଶୁଭାରମ୍ଭ କରିଥିଲେ।

ପ୍ରଖର ରୌଦ୍ରତାପ ଯୋଗୁଁ ବାହାରେ ଯାତାୟାତ କରୁଥିବା ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହାକୁ ଦୃଷ୍ଟିରେ ରଖି ଫାଉଣ୍ଡେସନ ପକ୍ଷରୁ ଏହି ପଦକ୍ଷେପ ନିଆଯାଇଛି। ବିଶେଷ କରି ପୁରୁଣା ବସଷ୍ଟାଣ୍ଡ ଭଳି ଜନଗହଳି ପୂର୍ଣ୍ଣ ସ୍ଥାନରେ ଏହି ଜଳଛତ୍ର ଖୋଲାଯାଇଥିବାରୁ ଦୂରଦୂରାନ୍ତରୁ ଆସୁଥିବା ଯାତ୍ରୀମାନେ ବିଶେଷ ଭାବେ ଉପକୃତ ହେଉଛନ୍ତି।
ଏହା ଗ୍ରୀଷ୍ମ ପ୍ରବାହ ପର୍ଯ୍ୟନ୍ତ ରହିବ ବୋଲି ଅନୁଷ୍ଠାନ ତରଫରୁ କୁହାଯାଇଛି।ଏହି ଅବସରରେ ବିଙ୍ଗ ହ୍ୟୁମାନ ଫାଉଣ୍ଡେସନର ସୋମନାଥ ମିଶ୍ର, ଘନ ପଶାୟତ, ସୁଧାଂଶୁ ମିଶ୍ର, ବ୍ରଜଗୋପାଳ ସିଂ, ଖଗେଶ୍ୱର ପଧାନ, ଅନିଲ ରଣା, ପଞ୍ଚା ପଟ୍ଟନାୟକ, କନ୍ଦର୍ପ ରଣା, ମାନସ ରଣା ଆଦି ଉପସ୍ଥିତ ରହି ଜଳଦାନ ସେବାକୁ ତ୍ୱରାନ୍ୱିତ କରିଥିଲେ । ଆଗାମୀ ଦିନରେ ଏହି ସେବାକୁ ଅଧିକ ବ୍ୟାପକ କରିବା ପାଇଁ ସଂଗଠନ ପକ୍ଷରୁ ଲକ୍ଷ୍ୟ ରଖାଯାଇଛି।