25-Apr-2026

ବଲାଙ୍ଗୀର (ପ୍ରେରଣା ଖବର): କାର୍ଯ୍ୟରେ ଅବହେଳା ଓ ଲୋକଙ୍କୁ ଉପଯୁକ୍ତ ସେବା ଯୋଗାଇବାରେ ଅକ୍ଷମତା ଅଭିଯୋଗରେ କେନ୍ଦ୍ର ରେଳବାଇକୁ ଜିଲ୍ଲା ଖାଉଟି ଅଦାଲତର ବିଚାରପତିଦ୍ବୟ  ରବୀନ୍ଦ୍ର ତ୍ରିପାଠୀ ଓ ଶ୍ରୀମତୀ ଜ୍ୟୋସ୍ନା ମିଶ୍ର ୧ଲକ୍ଷ ୩ ହଜାର ଟଙ୍କା ଜରିମାନା  ରେ ଦଣ୍ଡିତ କରିଛନ୍ତି । 

ଦୀର୍ଘ ସମୟ ଧରି ଟ୍ରେନ୍ ବିଳମ୍ବ ହେବାରୁ ବଲାଙ୍ଗୀର ଶାନ୍ତି ପଡାର ଜଣେ ଯାତ୍ରୀ ଚଣ୍ଡୀ ପ୍ରସାଦ ଖମାରୀ(ଉପଭୋକ୍ତା) ବିମାନ ଯାତ୍ରାରୁ ବଞ୍ଚିତ ହୋଇଥିଲେ। ଏହି  ଘଟଣାରେ ପରେ  ଶ୍ରୀଯୁକ୍ତ ଖମାରୀ  ଗତ ୨୦୨୪ ଏପ୍ରିଲ ୦୬ତରିଖରେ କେନ୍ଦ୍ର ରେଳବାଇ ବିରୁଦ୍ଧରେ ବଲାଙ୍ଗୀର ଜିଲ୍ଲା ଖାଉଟି ଅଦାଲତର ଦ୍ୱାରସ୍ଥ  ହୋଇଥିଲେ l
ଘଟଣା ଅନୁଯାୟୀ, ୨୦୨୪ ମସିହା ଅଗଷ୍ଟ ମାସରେ ଅଭିଯୋଗକାରୀ ଶ୍ରୀଯୁକ୍ତ ଖମାରୀ ଟ୍ରେନ୍‌ରେ ଯାତ୍ରା କରୁଥିଲେ। ସେ ନିର୍ଦ୍ଧାରିତ ସମୟରେ ଗନ୍ତବ୍ୟ ସ୍ଥାନକୁ ପହଞ୍ଚି ବିମାନ ଧରିବାକୁ ଯୋଜନା କରିଥିଲେ। କିନ୍ତୁ ଟ୍ରେନ୍ ବହୁ ସମୟ ବିଳମ୍ବ ହେବାରୁ ସେ ବିମାନ ଧରିପାରି ନଥିଲେ।
ଏହା ଫଳରେ ଅଭିଯୋଗକାରୀଙ୍କୁ ଆର୍ଥିକ ଓ ମାନସିକ ହାନି ଭୋଗିବାକୁ ପଡିଥିଲା। 

ଏହି ମାମଲାକୁ ଗୁରୁତ୍ୱ ଦେଇ ଜିଲ୍ଲା ଉପଭୋକ୍ତା  ଫୋରମ୍ କେନ୍ଦ୍ର ରେଳବାଇକୁ ଆର୍ଥିକ କ୍ଷତି ବାବଦକୁ ୫୫ ହଜାର ଟଙ୍କା ଓ ମାମଲା ଶୁଣାଣି  ଦିନଠୁଁ ସମାଧାନ ପର୍ଯ୍ୟନ୍ତ ପ୍ରତ୍ୟେକ ଦିନ ୫୦୦ ଟଙ୍କା ସୁଧ ରାଶି ସହ ସର୍ବମୋଟ  ୧ ଲକ୍ଷ ୩ ହଜାର ଅର୍ଥରାଶି ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି l
ସୂଚନା ମୁତାବକ ଶ୍ରୀଯୁକ୍ତ ଖମାରୀ ୨୦୨୪ ଅଗଷ୍ଟ ୨୩ ତାରିଖ ରେ ଝାରସୁଗୁଡା ଷ୍ଟେସନରୁ ତାଙ୍କ ସମ୍ପର୍କୀୟ ୪ ଜଣଙ୍କ ସହିତ ଆଜାଦ ହିନ୍ଦ ଏକ୍ସପ୍ରେସରେ ଚଢ଼ିଥିଲେ। ହାଓଡ଼ାରେ ଟ୍ରେନ୍‌ଟି ୨୪ ତାରିଖ ସକାଳ ୩ଟା ୩୦ରେ ପହଞ୍ଚିବାରଥିଲା। କିନ୍ତୁ ଟ୍ରେନ୍ ଯାଇ ପହଞ୍ଚିଲା ଦିନ ୧୧ଟା ୩୦ରେ। ଶ୍ରୀ ଖମାରୀ ଓ ସମ୍ପର୍କୀୟ ଅନ୍ୟ ୩ଜଣ ବିମାନ ଯୋଗେ ଆସାମର ଗୌହାଟୀ ଯିବା ପାଇଁ ବିମାନରେ ଟିକେଟ୍ କାଟିଥିଲେ। ସେପ୍ଟେମ୍ବର ସକାଳ ୮ଟାରେ ବିମାନ ଛାଡ଼ିବା ବେଳେ ଟ୍ରେନ୍ ବିଳମ୍ବ ଯୋଗୁଁ ବିମାନସେବା ପ୍ରଦାନକାରୀ ସଂସ୍ଥା ସେମାନଙ୍କୁ ୨ ଘଣ୍ଟା ପରେ ପୁଣି ସେହି ସେଲ ଟିକେଟରେ ଯାତ୍ରା କରିବାକୁ ସୁବିଧା ଦେଇ ଥିଲେ । ଇତି ମଧ୍ୟରେ ଶ୍ରୀଯୁକ୍ତ ଖମାରୀ ରେଳବାଇ ଆପ୍ ଓ ଟୁଇଟର ମାଧ୍ୟମରେ ଅଭିଯୋଗ ଜଣାଇବା ସତ୍ୱେ ରେଳବାଇରୁ କୌଣସି ପ୍ରତିକ୍ରିୟା  ମିଳି ନ ଥିଲା ଓ ବିଳମ୍ବ ରେ ବିମାନ ବନ୍ଦରରେ ପହଂଚିଵା ପରେ ବିମାନ ଟି ଚାଲି ଯାଇଥିବା ସେ ଜାଣିବାକୁ ପାଇଥିଲେ, ଯାହା ତାଙ୍କୁ ବିଶେଷ ମାନସିକ ଆଘାତ ଦେଇଥିଲା l  

ଶ୍ରୀ ଖମାରୀ ରେଲବାଇ ଭଳି ଏକ ଦାୟିତ୍ୱସମ୍ପନ୍ନ  ବିଭାଗର ଏଭଳି ତ୍ରୁଟିପୂର୍ଣ୍ଣ ସେବା ସମସ୍ୟା ବିରୁଦ୍ଧରେ ଖାଉଟି ଅଦାଲତର ଆଶ୍ରୟ ନେଇଥିଲେ। ଏହାପରେ କୋର୍ଟ ମାମଲା ର ଗୁରୁତ୍ୱ କୁ ଉପଲବ୍ଧି  କରି ଉଚିତ କ୍ଷତିପୂରଣ ପ୍ରଦାନ ପାଇଁ ନିର୍ଦ୍ଦେଶ ଦେଇଥିବାରୁ ହେତୁ ବଲାଙ୍ଗୀର ଜିଲ୍ଲା ଖାଉଟି ଅଦାଲତକୁ ଶ୍ରୀଯୁକ୍ତ ଖମାରୀ କୃତଜ୍ଞତା  ଜ୍ଞାପନ କରିଛନ୍ତି l