25-Apr-2026

ବଲାଙ୍ଗୀର(ପ୍ରେରଣା ଖବର)- ମୁଖ୍ୟମନ୍ତ୍ରୀ ମୋହନଚରଣ ମାଝି ଆଜି ବଲାଙ୍ଗୀର ଗସ୍ତକାର୍ଯ୍ୟକ୍ରମ ଥିବା ବେଳେ ବିରୋଧୀ ବିଜେଡିଦଳ ପକ୍ଷରୁ ଏକ ପ୍ରତିନିଧିଦଳ ତାଙ୍କୁ ଭେଟି ବଲାଙ୍ଗୀର ର ବିଭିନ୍ନ ସମସ୍ୟାନେଇ ଆଲୋଚନା କରିବା ସହିତ ଏକ ଦାବିପତ୍ର ପ୍ରଦାନ କରିଛନ୍ତି । ବିଜେଡିର ବରିଷ୍ଠନେତା ଲକ୍ଷ୍ମଣ କୁମାର ମେହେରଙ୍କ ନେତୃତ୍ୱରେ ଯାଇଥିବା ଏହି ପ୍ରତିନିଧିଦଳ ନିକଟ ଅତିତରେ ଟିଏସି(ବୈଷୟିକ ପରାମର୍ଶାଦାତା କମିଟି)ର ଅନୁମୋଦନ ଲାଭ କରିଥିବା ସୋନଗଡ ନଦୀରେ ସିକୁଆଁ-ସିଲେଟକାନୀର ୧୨୪ କୋଟି ଟଙ୍କାର ଆଇଏସଏସ ପ୍ରକଲ୍ପକୁ ତୁରନ୍ତ କରାଯିବା ଦାବି କରିଛନ୍ତି। ଏହି ପ୍ରକଲ୍ପ ଯୋଗୁଁ ଦେଓଗାଁ ବ୍ଲକର୨୬ ଖଣ୍ଡ ଗ୍ରାମର ଜମିକୁ ଜଳସେଚିତ କରାଯିବା ସହିତ ୨୮ଟି ପାନୀୟଜଳ ପ୍ରକଲ୍ପ ଉପକୃତ ହେବ। ଏହା ସହିତ ସୋନଗଡରେ ଦେଓଗାଁ, ଜରାସିଂହାଠାରେ ଓ ତେଲନଦୀରେ ବ୍ରାହ୍ମଣୀପଲାଠାରେ ବ୍ୟାରେଜ କରାଯିବାକୁ ମଧ୍ୟ ଦାବି କରା ଯାଇଛି। ଠିକ ସେହିପରି ବଲାଙ୍ଗୀର ସହରର ଜଳପରିଚାଳନା ପାଇଁ ଡ୍ରେନେଜବ୍ୟବସ୍ଥା ପାଇଁ ୧ହଜାର କୋଟି ଟଙ୍କା, ରାଜେନ୍ଦ୍ର ବିଶ୍ୱବିଦ୍ୟାଳୟ ପାଇଁ ଅତିରିକ୍ତ ୧୦୦ଏକର ଜମି ଯୋଗାଇବା ସହ ଭିତ୍ତିଭୁମୀ ପାଇଁ ୧୫୦ କୋଟି ଟଙ୍କାର ଅନୁଦାନ ଦେବା, ଆବଶ୍ୟକ ପ୍ରଫେସରପଦବୀ ପୂରଣ କରିବା, ସରକାରୀ ମହିଳା ମହାବିଦ୍ୟାଳୟକୁ ଏକକ ବିଶ୍ୱବିଦ୍ୟାଳୟ କରିବା, ଭୀମଭୋଇ ମେଡିକାଲ କଲେଜରେ ଡାକ୍ତର ଓ କର୍ମଚାରୀ ପଦବୀ ପୂରଣ କରିବା, ବଲାଙ୍ଗୀରରେ ସେଣ୍ଟ୍ରାଲ ଲାଇବ୍ରେରୀ ସ୍ଥାପନ କରିବା, ବଲାଙ୍ଗୀର ସଦରବ୍ଲକ ଓ ଦେଓଗାଁ ବ୍ଲକ ଅଞ୍ଚଳରେ ଚାଷୀଙ୍କ ସୁବିଧା ପାଇଁ ଶୀତଳ ଭଣ୍ଡାର ନିର୍ମାଣ କରିବା ଓ ତୁଷୁରା ଏୟାରଷ୍ଟ୍ରିପକୁ ଅଧିକ ଅନୁଦାନ ଦେଇ ପାଇଲଟ ଟ୍ରେନିଂ କେନ୍ଦ୍ର ସ୍ଥାପନ କରିବାକୁ ଦାବିପତ୍ରରେ ଉଲ୍ଲେଖ ରହିଛି। ଏହି ପ୍ରତିନିଧି ଦଳରେ ବରିଷ୍ଠନେତା ଲକ୍ଷ୍ମଣ କୁମାର ମେହେର,ସୁଶୀଳ ଚାନ୍ଦ, ଦେଓଗାଁ ବ୍ଲକଅଧ୍ୟକ୍ଷ ଦୟାନିଧି ଖମାରୀ(ମଣ୍ଟୁ), ବଲାଙ୍ଗୀର ସଦର ବ୍ଲକ ଅଧ୍ୟକ୍ଷା ସରିତା ବାଗ, ପୂର୍ବତନ ବ୍ଲକ ଅଧ୍ୟକ୍ଷ ଗୋଲାପ ବାଗ, ଛାତ୍ର ବିଜେଡି ସଭାପତି ସୁମନ ନନ୍ଦ, ଲେଙ୍କା ସାହୁ, ପୂର୍ବତନ ପୌରାଧ୍ୟକ୍ଷା ଦମୟନ୍ତି ବାଗ, କାଉନସିଲର ଶମ୍ଭୁ ନାଗ ପ୍ରମୁଖ ଉପସ୍ଥିତ ରହିଥିଲେ ।