29-Mar-2026

ବଲାଙ୍ଗୀର (ପ୍ରେରଣା ଖବର): ବଲାଙ୍ଗୀର ଜିଲ୍ଲାର ବିଭିନ୍ନ ବ୍ଲକରେ କାର୍ଯ୍ୟରତ ମହିଳା ସ୍ୱାସ୍ଥ୍ୟ କର୍ମୀ ମାନେ ଦୀର୍ଘ ବର୍ଷ ଧରି କାମ କଲା ପରେ ମଧ୍ୟ ସେମାନଙ୍କ ପଦୋନ୍ନତିରେ ଅହେତୁକ ବିଳମ୍ବ ଯୋଗୁଁ ଜିଲ୍ଲାର ମହିଳା ସ୍ୱାସ୍ଥ୍ୟ କର୍ମୀ ମାନଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଏପରିକି କିଛି ସ୍ୱାସ୍ଥ୍ୟ କର୍ମୀ ଅବସର ନେବାକୁ ବସିଥିବା ବେଳେ ସେମାନଙ୍କ ପଦୋନ୍ନତି ଏ ପର୍ଯ୍ୟନ୍ତ ହୋଇପାରି ନାହିଁ । ଜିଲ୍ଲାର ବିଭିନ୍ନ ଦୁର୍ଗମ ଅଂଚଳରେ ଗର୍ଭବତୀ ମାଁ ଓ ଶିଶୁ ମାନଙ୍କୁ ସ୍ୱାସ୍ଥ୍ୟ ସେବା ଯୋଗାଇ ଆସୁଥିବା ଏହି ମହିଳା ସ୍ୱାସ୍ଥ୍ୟ କର୍ମୀ ମାନଙ୍କ ଉପରେ ବିଭିନ୍ନ ଅନ୍‌ଲାଇନ କାମ ନ୍ୟସ୍ତ କରାଯାଉଥିବା ବେଳେ ମହିଳା ସ୍ୱାସ୍ଥ୍ୟ କର୍ମୀ ମାନଙ୍କୁ ଅଭିଜ୍ଞତା ଭିତ୍ତିରେ ପଦୋନ୍ନତି ଦେବା ପାଇଁ ହାଇକୋର୍ଟରୁ ନିର୍ଦ୍ଦେଶ ଆସିଥିଲେ ମଧ୍ୟ ବଲାଙ୍ଗୀରର ଜିଲ୍ଲାପାଳ ଏବଂ ସିଡିଏମ୍‌ଓ ଜାଣିଶୁଣି ପଦୋନ୍ନତି ପ୍ରକିୟାକୁ ବିଳମ୍ବ କରୁଛନ୍ତି ବୋଲି ଜିଲ୍ଲାର କାର୍ଯ୍ୟରତ ମହିଳା ସ୍ୱାସ୍ଥ୍ୟ କର୍ମୀ ମାନେ କ୍ଷୋଭ ପ୍ରକାଶ କରିଛନ୍ତି । ଆଜି ଏ ନେଇ ବଲାଙ୍ଗୀର ଜିଲ୍ଲା ମହିଳା ସ୍ୱାସ୍ଥ୍ୟ କର୍ମୀ ସଂଘ ପକ୍ଷରୁ ସ୍ଥାନୀୟ ସାମ୍ବାଦିକ ଭବନ ଠାରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀ ରେ ମହିଳା ସ୍ୱାସ୍ଥ୍ୟ କର୍ମୀ ମାନେ ବଲାଙ୍ଗୀର ସିଡିଏମ୍ ଓ ଙ୍କ ଉପରେ ଆକ୍ଷେପ କରି ସଡିଏମ୍‌ଓ ମହୋଦୟା ଅଫିସର ଜଣେ ହେଡକ୍ଲାର୍କ ଦ୍ୱାରା ପରିଚାଳିତ ହୋଇ ନିଜର ମନୋମୁଖୀ କାରବାର ଚଳାଇ ଆସିଛନ୍ତି ବୋଲି କହିଥିଲେ। ରାଜ୍ୟର ୨୫ଟି ଜିଲ୍ଲାରେ ମହିଳା ସ୍ୱାସ୍ଥ୍ୟ କର୍ମୀ ମାନଙ୍କ ପଦନ୍ନୋତି ହୋଇ ସାରିଥିଲେ ସୁଦ୍ଧା କୋର୍ଟ ରାୟକୁ ଅବମାନନା କରି ବଲାଙ୍ଗୀର ଜିଲ୍ଲାରେ ପଦୋନ୍ନତି ପ୍ରକ୍ରିୟା ଆରମ୍ଭ ହୋଇ ନାହିଁ । ଜିଲ୍ଲା ପ୍ରଶାସନର ଏପରି କାରବାର ବିରୁଦ୍ଧରେ ସ୍ୱାସ୍ଥ୍ୟ କର୍ମୀ ମାନେ ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ଓ ଉପମୁଖ୍ୟମନ୍ତ୍ରୀଙ୍କୁ ସାକ୍ଷାତ କରି ନିଜର ଅଭିଯୋଗ ଜଣାଇଥିଲେ ସୁଦ୍ଧା ଏମାନଙ୍କର ଦାବିପୂରଣ ହୋଇପାରି ନାହିଁ । ଏପରିକି ଏଠାରେ ଡିପିସି (ଡିପାଟମେଂଟାଲ ପ୍ରମୋସନ କମିଟି) ମଧ୍ୟ ଏ ପର୍ଯ୍ୟନ୍ତ ବସି ନାହିଁ ବୋଲି ମହିଳା ସ୍ୱାସ୍ଥ୍ୟ କର୍ମୀ ମାନେ ଅଭିଯୋଗ କରିଛନ୍ତି । ତେଣୁ ତୁରନ୍ତ ଡିପିସି ଡକାଯାଇ ମହିଲା ସ୍ୱାସ୍ଥ୍ୟ କର୍ମୀ ମାନଙ୍କୁ ପଦୋନ୍ନତି ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ସାମ୍ବାଦିକ ସମ୍ମିଳନୀ ମାଧ୍ୟମରେ ଦାବି କରାଯାଇଛି । ଡିପିସି ଜିଲ୍ଲା ମହିଳା ସ୍ୱାସ୍ଥ୍ୟ କର୍ମୀ ସଂଘର ସଭାପତି ରୀନା ମିଶ୍ରଙ୍କ ଆବାହକତ୍ୱରେ ଅନୁଷ୍ଠିତ ଆଜିର ସାମ୍ବାଦିକ ସମ୍ମିଳନୀରେ ଅନ୍ୟ ମାନଙ୍କ ମଧ୍ୟରେ ମହିଳା ସ୍ୱାସ୍ଥ୍ୟ କର୍ମୀ ସୁଶୀଲା ପାତ୍ରୀ, ସସ୍ମିତା ଶତପଥୀ, ସବିତା ପଣ୍ଡା, ଜେମିନି ମେହେର, ପୁରୁଷ ସ୍ୱାସ୍ଥ୍ୟ କର୍ମୀ ସଦାଶିବ କଠାର ଓ ବିନୋଦ କୁମାର ସାହୁ ପ୍ରମୁଖ ସମ୍ବାଦିକ ମାନଙ୍କ ବିଭିନ୍ନ ପ୍ରଶ୍ନର ଉତ୍ତର ରଖିଥିଲେ । ଏହି ସାମ୍ବାଦିକ ସମ୍ମିଳନୀରେ ବହୁ ମହିଳା ଓ ପୁରୁଷ ସ୍ୱାସ୍ଥ୍ୟ କର୍ମୀ ଉପସ୍ଥିତ ଥିଲେ ।