26-Mar-2026

ବଲାଙ୍ଗିର(ପ୍ରେରଣା ଖବର): ଆଜି ବଲାଙ୍ଗୀର ତାଲପାଲି ପଡାରେ ପୁନଃନିର୍ମାଣ ହୋଇଥିବା ଶ୍ରୀରାମମନ୍ଦିରର ବିଗ୍ରହପ୍ରତିଷ୍ଠା ଉତ୍ସବ ଉଦଯାପିତ ହୋଇଯାଇଛି । ଆଜି ଶେଷଦିନରେ ହୋମଯଜ୍ଞ ସହିତ ପ୍ରଭୁଶ୍ରୀରାମ, ସୀତାମାତା, ଲକ୍ଷ୍ମଣ ଓ ଭକ୍ତ ହନୁମାନଙ୍କ ବିଗ୍ରହ ପ୍ରତିଷ୍ଠା କରାଯାଇଥିଲା । ତାଲପାଲିପଡା ଅଞ୍ଚଳର ଲୋକଙ୍କ ମନସ୍କାମନା ଆଜି ପୂର୍ଣ୍ଣ ହୋଇଛି । ବହୁବର୍ଷ ହେଲା ମନ୍ଦିରନିର୍ମାଣ କରି ବିଗ୍ରହସ୍ଥାପନ ପାଇଁ ଲୋକଙ୍କ ଆଗ୍ରହ ଥିଲା । କଳିକେଶନାରାୟଣ ସିଂଦେଓ ସାଂସଦ ଥିବା ବେଳେ ଅନୁଦାନ ଦେଇ ମନ୍ଦିରନିର୍ମାଣକାମ ଆରମ୍ଭ କରାଇଥିଲେ । ପରେ ପୌରପାରିଷଦ ପକ୍ଷରୁ ବିଭିନ୍ନ ଯୋଜନାର ଅନୁଦାନ ଦିଆଯାଇଥିଲା । ଗତବର୍ଷ ମନ୍ଦିରର କାମ ସଂପୂର୍ଣ୍ଣ ହୋଇ ରତ୍ନମୁଦ ପଡିଥିଲା । ଏବେ ମନ୍ଦିରପ୍ରତିଷ୍ଠା ସହିତ ବିଗ୍ରହ ସ୍ଥାପନ କରାଯାଇଛି । ଆଜି ଦିନ ୧୨ଟାରେ ବିଧାୟକ ଶ୍ରୀ ସିଂଦେଓ ଓ ପୌରାଧ୍ୟକ୍ଷା ଲିକା ସାହୁ,ସ୍ଥାନୀୟ କାଉନସିଲର ଅରବିନ୍ଦ ପରୁଆ ମନ୍ଦିର ଉନ୍ନୟନ କାମର ଶୁଭଉଦଘାଟନ କରିଥିଲେ । ଗତ ୨୨ ତାରିଖଠାରୁ ଏହି ଶ୍ରୀରାମମନ୍ଦିର ବିଗ୍ରହପ୍ରତିଷ୍ଠା ଉତ୍ସବ ଓ ଚବିଶପ୍ରହର ନାମଯଜ୍ଞ ଆରମ୍ଭ ହୋଇଥିଲା । ଭବ୍ୟକାର୍ଯ୍ୟକ୍ରମକୁ ଆୟୋଜକ କମିଟିର ସଭାପତି ଭାବରେ ଚନ୍ଦ୍ରମଣୀ ତ୍ରୀପାଠୀ,ଉପସଭାପତି -ଋଷଭ ପୁଟେଲ,ଜାହ୍ନବୀ ନାଏକ,ସଂପାଦକ ଅରବିନ୍ଦ ପରୁଆ, ସହସଂପାଦକ ଅଶ୍ୱିନୀ ସାଏ,କୋଷାଧ୍ୟକ୍ଷ ମହେନ୍ଦ୍ର ସାଏ, ସହକୋଷାଧ୍ୟକ୍ଷ ଦୁର୍ବାଦଳ ପଟେଲ ଉପସ୍ଥିତ ରହି ପରିଚାଳନା କରିଥିଲେ ।  ମନ୍ଦିରପ୍ରତିଷ୍ଠା କର୍ତ୍ତାଭାବରେ ଦେବାନନ୍ଦ ପଟେଲ ଓ ତାଙ୍କ ଧର୍ମପତ୍ନୀ ଜୟନ୍ତି ପଟେଲ,ଚବିଶପ୍ରହରୀ ନାମ ଯଜ୍ଞ ରେ କର୍ତ୍ତାଭାବେ ରାମକୃଷ୍ଣ ସାଏ ଓ ତାଙ୍କ ଧର୍ମପତ୍ନୀ ଦିପ୍ତିମୟୀ ସାଏ ରହିଥିବା ବେଳେ ପ୍ରାୟବ ୧୫ ଯୋଡିପତିପତ୍ନୀ ପ୍ରତ୍ୟହ ହୋମରେ କର୍ତ୍ତାରୂପେ ସାମିଲ ହେଉଥିଲେ । କଆଗାଁର ସୁଶାନ୍ତ ମିଶ୍ର ମୁଖ୍ୟପୂଜକ  ଦାୟିତ୍ୱ ନେଇଥିଲେ । ବିଧାୟକଙ୍କ ଏହି ଗସ୍ତବେଳେ ପୌରାଧ୍ୟକ୍ଷା ଲିକା ସାହୁ,ଦେବଦତ୍ତ ବେହେରା, କମିଟିର ସଭାପତି ଚନ୍ଦ୍ରମଣୀ ତ୍ରୀପାଠୀ,ବରିଷ୍ଠ ବିଜେଡିନେତା ଧୃବ ଜୁଏଡ,କାଉନସିଲର ଅରବିନ୍ଦ ପରୁଆ ଓ ପୂର୍ବତନ କାଉନସିଲର ଅଶ୍ୱିନୀ ପୁଟେଲ ତଥା ଅନ୍ୟାନ୍ୟ ପଡାବାସୀ ଉପସ୍ଥିତ ରହିଥିଲେ ।
ଏହି ଅବସରରେ ବିଧାୟକ ଉନ୍ନତିକରଣ ହେବାକୁ ଥିବା ତାଲପାଲିବନ୍ଧ ଓ ନିର୍ମାଣ ଚାଲିଥିବା କଲ୍ୟାଣମଣ୍ଡପକୁ ପଡାବାସୀଙ୍କୁ ରାମନବମୀର ଭେଟି ଦେଇଥିଲେ । ଗତ ସାଧାରଣ ନିର୍ବାଚନବେଳେ ବିଧାୟକ କଳିକେଶଙ୍କୁ ସ୍ଥାନୀୟ ଲୋକେ ଏଠାରେ ଏକ କଲ୍ୟାଣମଣ୍ଡପ ପାଇଁ ଦାବି କରିଥିଲେ । ଠିକ ସେହିପରି ତାଲପାଲିପଡା ଗାଧୁଆବନ୍ଧର ପଙ୍କୋଦ୍ଧାର ପାଇଁ ମଧ୍ୟ ଦାବି କରିଥିଲେ । ଏବେ ଉଭୟକାମ ଆରମ୍ଭ ହୋଇଛି । ବିଧାୟକଙ୍କ ଏହି ପରିଦର୍ଶନ ବେଳେ ଗ୍ରାମ୍ୟ ଉନ୍ନୟନ ବିଭାଗର ଏସଡିଓ,ଜେଇ ଓ ଠିକସଂସ୍ଥାର ମାଲିକ ଉପସ୍ଥିତ ରହିଥିଲେ । ସ୍ଥାନୀୟ କାଉନସିଲରଙ୍କ ପ୍ରତିନିଧିଙ୍କ ସହିତ ପଡାବାସୀ ଉପସ୍ଥିତ ରହିଥିଲେ ।