25-Mar-2026

ତରଭା(ପ୍ରେରଣା ଖବର)-ହାଇକୋର୍ଟ ନିର୍ଦ୍ଦେଶରେ ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ ଅନ୍ତର୍ଗତ ପାଇକବାହାଲ ସରପଞ୍ଚ ଭାବେ ଗଣନାଥ ସାହୁ ପୁନଃଅବସ୍ଥାପିତ ହୋଇଛନ୍ତି । ଆଜି ଦିନ ୧୨ଟାରେ ସେ ତାଙ୍କ ସମର୍ଥକମାନଙ୍କ ସହିତ ଡାହିମାଳ ସ୍ଥିତ ପଞ୍ଚାୟତ କାର୍ଯ୍ୟାଳୟକୁ ଆସି କାର୍ଯ୍ୟରେ ଯୋଗଦାନ କରିଛନ୍ତି । ପ୍ରାୟ ଦେଢବର୍ଷ ହେଲା ପାଇକବାହାଲ ପଞ୍ଚାୟତରେ ଉନ୍ନୟନକାମ ଠପ ହୋଇପଡିଥିଲା । ଏବେ ଉନ୍ନୟନ କାମ ତ୍ୱରାନ୍ୱିତ ହେବ ବୋଲି ଆଶା କରାଯାଉଛି । ପଞ୍ଚାୟତରେ ଲଗାତାର ତିନିଟି ବୈଠକ କରିନଥିବା ଅଭିଯୋଗରେ ତାଙ୍କୁ ଗତ ୧୨.୯.୨୦୨୪ ରେ ଜିଲ୍ଲାପାଳ ଅନ୍ୟା ଦାସ ପଦରୁ ବହିସ୍କାର କରିଦେଇଥିଲେ । ସେହି ନିର୍ଦ୍ଦେଶକୁ ଗଣନାଥ ସାହୁ ପ୍ରଥମେ ପଞ୍ଚାୟତରାଜ ବିଭାଗ ଓ ପରେ ମାନ୍ୟବର ଓଡିଶା ହାଇକୋର୍ଟରେ ଚ୍ୟାଲେଞ୍ଜ କରିଥିଲେ । ମାନ୍ୟବର ହାଇକୋର୍ଟ ଏହି ମାମଲାର ବିଚାରକରି ୧୮.୭.୨୦୨୫ରେ ଜିଲ୍ଲାପାଳଙ୍କ ଦ୍ୱାରା କରାଯାଇଥିବା ବହିସ୍କାର ଆଦେଶକୁ ଖାରଜ କରିଦେଇ ପଞ୍ଚାୟତିରାଜ ବିଭାଗ ୪ ସପ୍ତାହ ମଧ୍ୟରେ ଏହାର ପୁନଃର୍ବିଚାର କରିବାକୁ ନିର୍ଦ୍ଦେଶ କରିଥିଲେ । କିନ୍ତୁ ତଥାପି ପଞ୍ଚାୟତରାଜ ବିଭାଗ କୌଣସି ପଦକ୍ଷେପ ନନେବାରୁ ଗଣନାଥ ପୁଣିଥରେ ହାଇକୋର୍ଟର ଦ୍ୱାରସ୍ଥ ହୋଇଥିଲେ । ଏହାର ବିଚାର କରି ହାଇକୋର୍ଟ ଗତ ୧୦.୩.୨୦୨୬ରେ ଗଣନାଥ ସାହୁଙ୍କୁ ସରପଞ୍ଚ ଭାବେ ପୁନଃଅବସ୍ଥାପିତ କରିବାକୁ ରାଜ୍ୟସରକାରଙ୍କ ପଞ୍ଚାୟତରାଜ ବିଭାଗକୁ ନୋଟିଫିକେସନ କରିବାକୁ ନିର୍ଦ୍ଦେଶ କରିଥିଲେ । ମାନ୍ୟବାର ହାଇକୋର୍ଟଙ୍କ ନିର୍ଦ୍ଦେଶରେ ପଞ୍ଚାୟତିରାଜ ବିଭାଗର ନିର୍ଦ୍ଦେଶକ ଗତ ୨୪.୩.୨୦୨୬ରେ ଏକ ଘୋଷଣାନାମା ଜାରିକରି ଗଣନାଥ ସାହୁଙ୍କୁ ସରପଞ୍ଚ ଭାବରେ ପୁନଃଅବସ୍ଥାପିତ କରିବାକୁ ସୁବର୍ଣ୍ଣପୁର ଜିଲ୍ଲାପାଳଙ୍କୁ ନିର୍ଦ୍ଦେଶ କରିଥିଲେ । ସୁବର୍ଣ୍ଣପୁର ଜିଲ୍ଲାପାଳ ତାଙ୍କ ପତ୍ରସଂଖ୍ୟା ୩୪୫ ତା.୨୪.୩.୨୦୨୬ରେ ଗଣନାଥ ସାହୁଙ୍କୁ ସରପଞ୍ଚ ଭାବରେ ପୁନଃଅବସ୍ଥାପିତ କରିଛନ୍ତି । ଜିଲ୍ଲାପାଳଙ୍କ ଚିଠି ପାଇଲା ପରେ ଆଜି ଗଣନାଥ ତାଙ୍କ ଶତାଧିକ ସମର୍ଥକଙ୍କ ସହିତ ପଞ୍ଚାୟତ କାର୍ଯ୍ୟାଳୟକୁ ଆସି କାର୍ଯ୍ୟରେ ଯୋଗଦେଇଛନ୍ତି । ସେ କୌଣସି ଅପରାଧ କରିନାହାଁନ୍ତି କି ଅର୍ଥତୋଷରପାତ କାରିନାହାଁନ୍ତି । କେବଳ ରାଜନୈତିକ ଚକ୍ରାନ୍ତରେ ତାଙ୍କୁ ବହିସ୍କାର କରାଯାଇଥିଲା । ଏବେ ସତ୍ୟର ଜୟ ହୋଇଛି । ରାଜ୍ୟରେ ଚାଲିଥିବା ମୋହନ ସରକାରଙ୍କ ଲୋକାଭିମୁଖି ଯୋଜନାଗୁଡିକ କିଭଳି ସାଧାରଣ ଜନତାଙ୍କ ପାଖରେ ପହଞ୍ଚିବ ସେନେଇ କାମ କରିବେ ବୋଲି ସରପଞ୍ଚ ଗଣନାଥ ସାହୁ କହିଛନ୍ତି । ହାଇକୋର୍ଟରେ ଗଣନାଥ ସାହୁଙ୍କ ପକ୍ଷରୁ ବରିଷ୍ଠ ଆଇନଜୀବି ଧରଣୀଧର ନାୟକ ଓ ତାଙ୍କ ପୁଅ ଆଇନଜୀବି ପ୍ରତୀକ ନାୟକ ମାମଲାକୁ ପରିଚାଳନା କରୁଥିଲେ ।