23-Mar-2026

ବରପାଲି(ସୁଦାମ ଦୀପ) 
ବରଗଡ ଜିଲ୍ଲା ବରପାଲି ସ୍ଥିତ ଲିଟିଲ ଏଞ୍ଜେଲସ୍ ପବ୍ଲିକ ସ୍କୁଲ ପରିସରରେ ପ୍ରତିଷ୍ଠାତା ଡା.ଧୀରେନ୍ଦ୍ର ନାଥ ମୁଣ୍ଡଙ୍କ ୯୩ତମ ଜନ୍ମ ଜୟନ୍ତୀ ମହାସମାରୋହରେ ପାଳିତ ହୋଇଯାଇଛି । ବିଦ୍ୟାଳୟ ରୌପ୍ୟ ଜୟନ୍ତୀ ଉଦ୍‌ଯାପନୀ ଦିବସ ଅବସରରେ ଏକ ରକ୍ତଦାନ ଶିବିର ଓ ଅଷ୍ଟପ୍ରହରୀ ନାମ ସଂକୀର୍ତ୍ତନ ଆୟୋଜିତ ହୋଇଥିଲା। ଏହି ଅବସରରେ ଗତ ୨୨ ତାରିଖରେ  ପ୍ରତିଷ୍ଠାତା ସ୍ୱର୍ଗତ ଡ଼ା.ଧୀରେନ୍ଦ୍ରନାଥ ମୁଣ୍ଡଙ୍କ ପ୍ରତିମୂର୍ତ୍ତିରେ ବିଦ୍ୟାଳୟ ସଭାପତି ଡ଼ା.ସୁବ୍ରତ ମୁଣ୍ଡ ଓ ପରିଚାଳନା ନିର୍ଦ୍ଦେଶିକା ସୁନିତା ମୁଣ୍ଡ ମାଲ୍ୟାର୍ପଣ କରିଥିଲେ। ପରେ ନାମଯଜ୍ଞ ଆରମ୍ଭ ହେବା ସହ ସେମାନେ ପୂଜାକର୍ତ୍ତା ଦାୟିତ୍ବଭାର ନିର୍ବାହ କରିଥିଲେ। ଆୟୋଜିତ ରକ୍ତଦାନ ଶିବିରରେ ବିଦ୍ୟାଳୟ ଉପାଧ୍ୟକ୍ଷ ସୁଶୀଳ କୁମାର ରଥ ପ୍ରଥମେ ରକ୍ତଦାନ କରି ରକ୍ତଦାନ କାର୍ଯ୍ୟକ୍ରମକୁ ଉଦ୍‌ଘାଟନ କରିଥିଲେ । ଶିବିରରେ ସାମିଲ ରକ୍ତଦାତା ମାନେ ୧୦୦ ୟୁନିଟ ରକ୍ତଦାନ କରିଥିଲେ। ବରଗଡ ରେଡକ୍ରସ୍ ରକ୍ତଭଣ୍ଡାର ସଂସ୍ଥାକୁ ସଂଗ୍ରୃହିତ ରକ୍ତ ପ୍ରଦାନ କରାଯାଇଥିଲା। ରକ୍ତ ଭଣ୍ଡାର ପ୍ରତିନିଧି ମାନସ ରଞ୍ଜନ ବିଶି, ବୈଶାଖୁ ସୁନା, ରାକେଶ ରଣା, କୃଷ୍ଣଚନ୍ଦ୍ର ସାହୁ, ସୁଜିତ ସାହୁ ଓ ଭୁବନେଶ୍ୱର ସାହୁଙ୍କ ଦ୍ଵାରା  ରକ୍ତ ସଂଗ୍ରହ କରାଯାଇଥିଲା।  ଅନୁଷ୍ଠାନର ତରଫରୁ ରକ୍ତଦାତାମାନଙ୍କୁ ପ୍ରଶଂସାପତ୍ର ଓ ଉପହାର ପ୍ରଦାନ ମାଧ୍ୟମରେ ସମ୍ବର୍ଦ୍ଧିତ କରାଯାଇଥିଲା । ବିଦ୍ୟାଳୟର ୨୫ ବର୍ଷ ପୂର୍ତ୍ତିରେ ବିଦ୍ୟାଳୟର ମୁଖପତ୍ର 'ଆଞ୍ଜେଳିକା'କୁ ପରିଚାଳନା ନିର୍ଦ୍ଦେଶିକା ସୁନିତା ମୁଣ୍ଡ ଉନ୍ମୋଚନ କରିଥିଲେ ।  ଅଷ୍ଟପ୍ରହରୀ ନାମଯଜ୍ଞରେ ପୁରୋହିତ ଭାବେ ପଣ୍ତିତ ସାହେବ ଦାଶ, ପ୍ରଦୀପ ଦାଶ, ବଳରାମ ଦାଶ ଓ ଜଗନ୍ନାଥ ଦାଶ ପ୍ରମୁଖଙ୍କ ଦ୍ବାରା ପୂଜନ କାର୍ଯ୍ୟକ୍ରମ ସଂପାଦନ କରାଯାଇଥିଲା। ବିଦ୍ୟାଳୟ ଛାତ୍ରଛାତ୍ରୀ, ଶିକ୍ଷକ ଶିକ୍ଷୟିତ୍ରୀ ତଥା ବିଭିନ୍ନ ଅଞ୍ଚଳରୁ ସଂକୀର୍ତ୍ତନ୍ୟ ଦଳମାନ ଯୋଗଦେଇ ମହାମନ୍ତ୍ର ଉଚ୍ଚାରଣ ପୂର୍ବକ ପ୍ରହରଗୁଡିକର ଦାୟିତ୍ଵ ସୂଚାରୁ ରୂପେ ସଂପାଦନ କରିଥିଲେ । ଅନୁଷ୍ଠିତ ସମାରୋହରେ ମହାମନ୍ତ୍ର ଉଚ୍ଚାରଣ ସହିତ ପୂର୍ଣ୍ଣାହୁତି ପ୍ରଦାନ କରାଯିବା ସହ ଅନ୍ନପ୍ରସାଦ ବଣ୍ଟନ କରାଯାଇଥିଲା । ଏହି କାର୍ଯ୍ୟକ୍ରମରେ ସହସ୍ରାଧିକ ଲୋକଙ୍କ ସମାଗମ ହୋଇଥିଲା । ଅଧ୍ୟକ୍ଷା ମଧୁସ୍ମିତା ମୁଣ୍ଡ, ଉପାଧ୍ଯକ୍ଷ ସୁଶୀଳ କୁମାର ରଥ, ପ୍ରଶାସନିକ ଅଧିକାରୀ ମିନତି ପ୍ରଧାନ ଓ ଡୁଙ୍ଗୁରିପାଲି ବିଦ୍ୟାଳୟର ଅଧ୍ୟକ୍ଷ ଶିଶୁପାଳ କଲେତଙ୍କ ତତ୍ତ୍ଵାବଧାନରେ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀଗଣ ସକ୍ରିୟ ସହଯୋଗ କରିଥିଲେ।