20-Mar-2026

ବଲାଙ୍ଗିର(ପ୍ରେରଣା ଖବର)- ବଲାଙ୍ଗୀର ସହର ସମେତ ଜିଲ୍ଲାର ବିଭିନ୍ନ ଅଞ୍ଚଳରେ ଏଲପିଜି ଗ୍ୟାସର ଅଭାବ ଦେଖା ଦେଇଛି। ଘରୋଇ ଉପଭୋକ୍ତାଙ୍କ ସହିତ ହୋଟେଲ ବ୍ୟବସାୟୀମାନେ ବହୁତ ଗ୍ୟାସ ନପାଇ ହଇରାଣ ହରକତ ହେଉଛନ୍ତି । ସେଥିପାଇଁ ଘରୋଇ ଏଲପିଜି ସିଲିଣ୍ଡର ପିଚ୍ଛା କଳାବଜାରରେ ୨୨୦୦ ଟଙ୍କାରେ ବିକ୍ରି ହେଉଛି । ପୂର୍ବରୁ ବିଭିନ୍ନ ହୋଟେଲ ତଥା ଘରମାନଙ୍କରେ କାଠଚୁଲା ମଧ୍ୟ ବ୍ୟବହାର ହେଉଥିଲା। କିନ୍ତୁ ଏବେ ଗ୍ୟାସଚୁଲା ଉପରେ ସମସ୍ତେ ସଂପୁର୍ଣ୍ଣ ନିର୍ଭରଶୀଳ। ମଧ୍ୟପ୍ରାଚ୍ୟ ଦେଶରେ ଯୁଦ୍ଧ ଚାଲିଥିବା କାରଣରୁ ଗ୍ୟାସ ଠିକରେ ଆସିପାରୁନଥିବା କୁହା ଯାଉଛି। ସରକାର ଦେଶର ଚାହିଦାକୁ ଦେଖି ଗ୍ୟାସ ମହଜୁଦ ଥିବା ଘୋଷଣା କରି କେହି ଭୟଭୀତ ନହେବାକୁ ପରାମର୍ଶ ଜାରି କରୁଛନ୍ତି। କିନ୍ତୁ ଏପଟେ ଫିଲ୍ଡରେ କିନ୍ତୁ ସ୍ଥିତି ସଂଗୀନ ହେବାକୁ ବସିଲାଣି। ଗ୍ୟାସ ଅଭାବରୁ ଅନେକ ହୋଟେଲ ବନ୍ଦ ପଡିଥିବା ବେଳେ ଛାତ୍ରାବାସ,ଭୀମଭୋଇ ମେଡିକାଲ କଲେଜରର କ୍ୟାଣ୍ଟିନ ଇତ୍ୟାଦି ବନ୍ଦ ହେଲାଣି। ଯୋଗାଣ ବିଭାଗ ଗ୍ୟାସ ବଣ୍ଟନକୁ ମନିଟରିଂ କରୁଥିବା କହୁଥିବା ତଥା ବିପିସିଏଲ କମ୍ପାନୀର ଅଧିକାରୀ ଜିଲ୍ଲାରେ ଗ୍ୟାସର ଅଭାବ ନାହିଁ ବୋଲି କହୁଥିବା ବେଳେ ପ୍ରକୃତରେ ଲୋକଙ୍କୁ ଗ୍ୟାସ ସିଲିଣ୍ଡର ମିଳୁନାହିଁ। ଏପରିକି ଅନଲାଇନରେ ଗ୍ୟାସ ବୁକିଂ ମଧ୍ୟ ବନ୍ଦ କରିଦିଆଗଲାଣି। ଗୁରୁବାର ଦିନ ଯୋଗାଣ ବିଭାଗ ଅଧିକାରୀ ମାନେ ବ୍ଲୁଲାଗୁନ ହୋଟେଲ ଓ କ୍ଲାସିକ ହୋଟେଲରେ ଚଢାଉ କରି କିଛି ଡୋମେଷ୍ଟିକ ଗ୍ୟାସ ସିଲିଣ୍ଡର ଜବତ କରିଥିଲେ। ଜିଲ୍ଲାପ୍ରଶାସନ ଏହାର ସୂଚନା ଗଣମାଧ୍ୟମକୁ ଦେଲେ। ତେବେ କେଉଁ ଗ୍ୟାସ ଡିପୋରୁ ତାହା ଅଣାଯାଇଛି ଓ କଣ କାର୍ଯ୍ୟାନୁଷ୍ଠାନ ନିଆଯାଉଛି ସେ ବିଷୟରେ କିଛି ସୂଚନା ମିଳୁ ନାହିଁ । ଖବର ନେବାରୁ ଜଣାପଡିଛି ଯେ,ବଲାଙ୍ଗୀର ଜିଲ୍ଲାକୁ ଆଇଓସିଏଲ,ବିପିସିଏଲ ଓ ଏଚପିସିଏଲ କମ୍ପାନୀ ପକ୍ଷରୁ ଗ୍ୟାସ ଯୋଗାଇ ଦିଆଯାଇଥାଏ। ଯୋଗାଣ ବିଭାଗ ସୂତ୍ରରୁ ଗତ ୧୮ତାରିଖ ସୁଦ୍ଧା ଜିଲ୍ଲାରେ ୧୪.୨ କିଲୋର ଆଇଓସିଏଲ କମ୍ପାନୀର ୨୩୫୨ଟି,୫ ଲିଟରର ୨୭୪ଟି ଓ ୧୯ କିଲୋର ୪୫୬ ଟି କମର୍ସିଆଲ ସିଲିଣ୍ଡର ମହଜୁଦ ରହିଥିଲା। ସେହିପରି ବିପିସିଏଲ କମ୍ପାନୀର ୧୪.୨ କିଲୋର ୨୩୩୮ଟି, ୫କିଲୋର ୧୦ଟି  ଘରୋଇ ଗ୍ୟାସ ସିଲିଣ୍ଡର ଓ ୧୯ କିଲୋ ଓଜନର ୧୦୧ଟି କମର୍ସିଆଲ ସିଲିଣ୍ଡର ଷ୍ଟକ ରହିଥିଲା। ଠିକ ସେହିପରି ଏସପିସିଏଲ କମ୍ପାନୀର ୧୪.୨ କିଲୋର ୨୩୩୫ଟି, ୫କିଲୋ ର ୬୭ଟି ଡୋମେଷ୍ଟିକ ସିଲିଣ୍ଡର ଷ୍ଟକଥିବା ଜଣାପଡିଥିଲା । ଆଜି ଶୁକ୍ରବାର ଦିନ କିଛି କମ୍ପାନୀର ପୁଣି ଷ୍ଟକ ଆସିଛି । କିନ୍ତୁ ତଥାପି ଲୋକଙ୍କୁ ଗ୍ୟାସ ମିଳୁନାହିଁ। କମର୍ସିଆଲ ଗ୍ୟାସ ସିଲିଣ୍ଡର ମିଳୁନଥିବା ଅଭିଯୋଗ ନେଇ ହୋଟେଲ ବ୍ୟବସାୟୀ ମାନେ ଜିଲ୍ଲାପାଳଙ୍କୁ ଅଭିଯୋଗ କରିଥିଲେ। ଗ୍ୟାସ ସିଲିଣ୍ଡର ନମିଳିଲେ ବ୍ୟବସାୟ ଠପ ହୋଇଯିବ  ବୋଲି କହିଥିଲେ । ପ୍ରଶାସନିକ ଅଧିକାରୀମାନେ ବୈଠକକରି ଆଲୋଚନା କଲେ । କୌଣସି ପ୍ରକାରେ ଷ୍ଟକଥିବା ସିଲିଣ୍ଡରକୁ ଭାଗବଣ୍ଟା କରି ଦେବାକୁ ଆଲୋଚନା ହେଲା। କିନ୍ତୁ ତଥାପି ସମସ୍ୟାର ସମାଧାନ ହେଉନାହିଁ। ଭୀମଭୋଇ ମେଡିକାଲ କଲେଜ ଓ ହସପିଟାଲରେ ଥିବା କ୍ୟାଣ୍ଟିନକୁ ଗ୍ୟାସ ଯୋଗାଇବାକୁ ହସପିଟାଲ ସୁପରିନଟେଣ୍ଡେଣ୍ଟ ଜିଲ୍ଲାପ୍ରଶସନକୁ ଲିଖିତ ଅନୁରୋଧ ଜଣାଇଥିଲେ। ଯୋଗାଣବିଭାଗ ସୁଦପଡାର ଜଣେ ଡିଲରକୁ ନିର୍ଦ୍ଦେଶ କଲେ । କିନ୍ତୁ ତାହା ମଧ୍ୟ ମିଳିଳା ନାହିଁ । ଫଳରେ ଗତ ଦୁଇଦିନ ଧରି ହସପିଟାଲ କ୍ୟାଣ୍ଟିନ ବନ୍ଦପଡିଛି । ଜିଲ୍ଲା ପ୍ରଶାସନ ଗ୍ୟାସ ସିଲିଣ୍ଡର ଯୋଗାଇବାରେ ବିଫଳ ହେବା କାରଣରୁ ବହୁସ୍ଥାନରେ ଅବ୍ୟବସ୍ଥା ଦେଖାଦେଇଥିବା ଅଭିଯୋଗ ଉଠିଛି । ସେପଟେ ବିପିସିଏଲ କମ୍ପାନୀର ଅଧିକାରୀ ବିକାଶ ମିଶ୍ରଙ୍କୁ ଫୋନରେ ଯୋଗାଯୋଗ କରିବାରୁ ଜିଲ୍ଲାରେ ଗ୍ୟାସର ଅଭାବ ନାହିଁ । ଯଦି ଅଭିଯୋଗ ଆସିଲେ ଆମେ ପଦକ୍ଷେପ ନେବୁ ବୋଲି କହିଛନ୍ତି। ଠିକ ସେହିପରି ଜିଲ୍ଲା ମୁଖ୍ୟାଳୟରେ ଥିବା ସହକାରୀ ଯୋଗାଣ ଅଧିକାରୀ ପିତବାସ ମଲ୍ଲିକଙ୍କୁ ପଚାରିବାରୁ ଯେଉଁଠି ଗ୍ୟାସର ଆବଶ୍ୟକତା ରହୁଛି ତାଙ୍କୁ ଗ୍ୟାସ ଯୋଗାଇବାର ବ୍ୟବସ୍ଥା କରାଯାଉଛି ବୋଲି କହିଛନ୍ତି। ଗ୍ୟାସ ସମସ୍ୟାର ସମାଧାନ କରିବାକୁ ରାଜ୍ୟସରକାର ତୁରନ୍ତ ପଦକ୍ଷେପ ନେବାକୁ ଦାବି ଜନସାଧାରଣରେ ହେଉଛି ।
ଗ୍ୟାସ କନେକ୍ସ୍ ନଥାଇ ଅଧିକାରୀମାନଙ୍କ ଘରେ ଡବଲସିଲିଣ୍ଡର ଏବେ ସାଧାରଣଜନତା ଗ୍ୟାସ ପାଇଁ ହାହାକାର ହେଉଥିବା ବେଳେ ସେପଟେ ଗ୍ୟାସ କନେକ୍ସନ ନଥାଇ ଅନେକ ଅଧିକାରୀଙ୍କ ଘରେ ଡବଲ ସିଲିଣ୍ଡର ମହଜୁଦଥିବା ଜଣାପଡିଛି । ବର୍ଷ ବର୍ଷ ଧିି ଅଧିକାରୀମାନେ ଗ୍ୟାସ କନେକ୍ସନ ନେଉନାହାଁନ୍ତି ଅଥଚ ତାଙ୍କ ଘରକୁ ଗ୍ୟାସ ସିଲିଣ୍ଡର ପହଞ୍ଚିଯାଉଛି। କେତେକ ଗ୍ୟାସ ଡିଲର କଳାବଜାର କରୁଥିବାରୁ ସେମାନେ ଅଧିକାରୀମାନଙ୍କୁ ଖୁସି କରିବାକୁ ଏଭଳି କାରନାମା କରୁଥିବା ଅଭିଯୋଗ ହେଉଛି। ଖୋଦ ଯୋଗାଣ ବିଭାଗର କିଛି ଅଧିକାରୀ ଓ ଜିଲ୍ଲାସ୍ତରୀୟ ପ୍ରଶାସନିକ ଅଧିକାରୀ ମାନଙ୍କ ଘରେ ଗ୍ୟାସ କନେକ୍ସନ ନଥିବା ଅଭିଯୋଗ ହେଉଛି । ଏହାର ମଧ୍ୟ ଯାଞ୍ଚ କରାଯିବାକୁ ଦାବି ହେଉଛି ।