09-Mar-2026

ବିନିକା(ହିମାଂଶୁ ଶେଖର ପୁଟେଲ)ହସ ଖୁସିରେ ଘରୁ ବାହାରି ବାହାଘର ଭୋଜି ଖାଇ ଯାଇଥିଲେ। ହେଲେ ସେହି ହସ ଖୁସି ସବୁଦିନ ପାଇଁ ଲିଭିଗଲା ।ଭୋଜି ଖାଇ ଘରକୁ ଫେରୁଥିବା ବେଳେ ସତରେ ବାଟରେ ଯମଦୂତ ଜଗି ରହିଥିଲା ବାଇକରେ ବସି ପରିବାରର ସମସ୍ତ ସଦସ୍ୟ ରାସ୍ତାରେ ଆସୁଥିବା ବେଳେ ବିପରୀତ ଦିଗରୁ ଦୃତ ଗତିରେ ଆସୁଥିବା ଏକ ବୋଲେରୋ ଧକ୍କା ଦେଇଥିଲା ଫଳରେ ସମସ୍ତେ ଛିଟିକି ପଡ଼ିଥିଲେ ।ଘରକୁ ଫେରିବାକୁ ପ୍ରାୟ ୧୨/୧୪ କିମି ବାକି ଥିବାବେଳେ ଦୁର୍ଘଟଣାରେ ପରିବାରର ୪ସଦସ୍ୟଙ୍କ ଜୀବନ  ସେଠାରେ ହିଁ ସବୁଦିନ ପାଇଁ ଲିଭିଗଲା ଫଳରେ ଏହି ଘଟଣା ପ୍ରଚାରିତ ହେବା ପରେ ସମଗ୍ର ବିନିକା ଅଞ୍ଚଳରେ ଶୋକର ଛାୟା ଖେଳିଯାଇଛି।ଆଜି ଅପରାହ୍ନରେ ପରିବାରର ୪ସଦସ୍ୟଙ୍କ ମୃତ ଦେହ ଜାମପାଲି ଗ୍ରାମକୁ ପହଞ୍ଚିବା ପରେ ସାରା ଗ୍ରାମବାସୀଙ୍କ ଆଖିରୁ ଲୁହ ଝରୁଥିବା ଦେଖିବାକୁ ମିଳିଥିଲା। ଗ୍ରାମ ସମ୍ପୂର୍ଣ୍ଣ ଶୋକାକୁଲ ପରିବେଶରେ ବୁଡ଼ି ରହିଥିଲା । ଘଟଣା ଟି ଘଟିଥିଲା ଗତକାଲି ରବିବାର ରାତ୍ର ପ୍ରାୟ ୯ଘଣ୍ଟା ସମୟରେ ୫୩ ନଂ ରାଜ୍ୟ ରାଜପଥର ମେହେନା ନିକଟରେ  ।ସୂଚନା ଅନୁସାରେ। ସୋନପୁର ଜିଲ୍ଲା ବିନିକା ଥାନା ଘାଟିଜାମପାଳି ଗ୍ରାମର ସନ୍ତୋଷ ପ୍ରଧାନ,ତାଙ୍କ ପତ୍ନୀ,ଭାଇ ଦୟାସାଗର ପ୍ରଧାନ, ଶିଶୁ ପ୍ରିୟାଂଶ ଓ ଅନ୍ୟ ସଦସ୍ୟମାନେ ଅତାବିରା ଥାନା ଖଇରପାଲି ଗ୍ରାମକୁ ଏକ ବିବାହ ଭୋଜି ଖାଇବାକୁ ଆସିଥିଲେ। ରାତି ପ୍ରାୟ ୯ଘଣ୍ଟା ସମୟରେ ଦୁଇଟି ବାଇକ ଯୋଗେ ସେମାନେ ନିଜ ଗ୍ରାମକୁ ଫେରୁଥିବା ବେଳେ ବିପରୀତ ଦିଗରୁ ଆସୁଥିବା ଏକ ବୋଲେରୋ ସେମାନଙ୍କୁ ସାମ୍ନାରୁ ଶକ୍ତ ଧକ୍କା ଦେଇଥିଲା।ମୃତକ ସରକାରୀ ଶିକ୍ଷକ ଦୟାସାଗର ପ୍ରଧାନ, ତାଙ୍କ ବଡ଼ ଭାଇ ସନ୍ତୋଷ ପ୍ରଧାନ,ପତ୍ନୀ କହର ପ୍ରଧାନ ଓ ଶିଶୁ ପ୍ରିୟାଂଶ।ଅନ୍ୟ ପକ୍ଷରେ ଗୁରୁତର ଆହତ ଦୁଇ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଚିକିତ୍ସା ପାଇଁ ଭେଡେନ ସ୍ୱାସ୍ଥ୍ୟ କେନ୍ଦ୍ରକୁ ପଠାଯାଇଥିଲା।ସେଠାରେ ଅବସ୍ଥା ଗୁରୁତର ତୁରନ୍ତ ବୁର୍ଲା ଡ଼ାକ୍ତରଖାନାକୁ ସ୍ଥାନାନ୍ତରିତ କରାଯାଇଛି।ବର୍ତ୍ତମାନ ସେମାନେ ଆଇସିୟୁରେ ଭର୍ତ୍ତି ହୋଇ ଚିକିତ୍ସାଧୀନ ରହିଛନ୍ତି । ଦୁର୍ଘଟଣା  ପରେ ଘଟଣାସ୍ଥଳରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ଦୁର୍ଘଟଣା ଘଟାଇ ବୋଲେରୋ ଚାଳକ ଫେରାର ହୋଇଯାଇଛି। ଖବର ପାଇ ରୁଷୁଡ଼ା ଫାଣ୍ଡି ଅଧିକାରୀ ଅରୁପ କୁମାର ବରେଇ ଓ ପୋଲିସ ଟିମ୍ ତୁରନ୍ତ ପହଞ୍ଚି ମୃତଦେହ ଜବତ କରିବା ସହ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରି ଶାନ୍ତି ଶୃଙ୍ଗଳା ରକ୍ଷା କରିଥିଲେ। ପୋଲିସ ଦୁର୍ଘଟଣାଗ୍ରସ୍ତ ଗାଡ଼ି ଗୁଡ଼ିକୁ ଜବତ କରି ତଦନ୍ତ ଆରମ୍ଭ କରିଛି।ଆଜି ମୃତ ପରିବାରର ୪ସଦସ୍ୟଙ୍କ ବୁର୍ଲା ଡ଼ାକ୍ତରଖାନାରେ ଶବ ବ୍ୟବଚ୍ଛେଦ ପରେ ମୃତ ଦେହ ଗୁଡ଼ିକୁ ଗାଁ କୁ ଅଣାଯାଇଥିଲା ।ଦୁଃଖରେ ଗ୍ରାମବାସୀଙ୍କ  କାନ୍ଦ ବୋବାଳି ରେ ସାରା ଗ୍ରାମ କମ୍ପି ଉଠିଥିଲା ।ମୃତ ପରିବାର ବର୍ଗଙ୍କୁ ସରକାରୀ ସହାୟତା ଯୋଗାଇ ଦେବାକୁ ବିଭିନ୍ନ ମହଲରେ ଦାବୀ ହେଉଛି ।