02-Mar-2026

କାଲିମେଳା(ସନ୍ତୋଷ କୁମାର ପଣ୍ଡା):କୈବଲ୍ୟ ସାହିତ୍ୟ ସଂସଦ ନବ କିଶୋର ସାମନ୍ତରାୟ ସ୍ମୃତି ସଂସଦ, କଟକଙ୍କ ପକ୍ଷରୁ ଆୟୋଜିତ “ଜାତୀୟ ଶିକ୍ଷାନୀତି ସମୀକ୍ଷା ସମ୍ମିଳନୀ–୨୦୨୬” ଅବସରରେ ଶିକ୍ଷା, ସାହିତ୍ୟ ଓ ସମାଜସେବା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ମାଲକାନଗିରି ଜିଲ୍ଲା ଏମଭି–୮୦ ଗ୍ରାମର ପ୍ରତିଭାଶାଳୀ ଶିକ୍ଷକ ପ୍ରଶାନ୍ତ ସରଦାରଙ୍କୁ “ଗୋପବନ୍ଧୁ ଶିକ୍ଷା ଗୌରବ ସମ୍ମାନ–୨୦୨୬” ପ୍ରଦାନ କରାଯାଇଛି।

ଏହି ରାଜ୍ୟସ୍ତରୀୟ ସମ୍ମିଳନୀର ଉଦ୍ଘାଟନ କରିଥିଲେ କଟକ ମହାନଗର ନିଗମର ମାନ୍ୟବର ମେୟର ସୁବାସ ସିଂହ। ମୁଖ୍ୟ ଅତିଥି ଭାବେ ପରମହଂସ ବ୍ରହ୍ମାନନ୍ଦ ସରସ୍ଵତୀ ମହାରାଜ ଉପସ୍ଥିତ ଥିଲେ। ବିଶିଷ୍ଟ ଅତିଥି ଭାବେ ପ୍ରାକ୍ତନ ମାନବାଧିକାର ସଦସ୍ୟ ଅସୀମ ଅମିତାଭ ଦାଶ ଯୋଗ ଦେଇଥିଲେ। ବାରେଣ୍ୟ ଅତିଥି ଭାବେ ବନ ବିହାରୀ ମିଶ୍ର, କିସ୍ ବିଶ୍ୱବିଦ୍ୟାଳୟର ପ୍ରଫେସର ଉପସ୍ଥିତ ଥିଲେ। ସମ୍ମାନିତ ଅତିଥି ଭାବେ ପ୍ରାକ୍ତନ ବିଜେପି କଟକ ସଭାପତି ଲଲାଟେନ୍ଦୁ ବଡୁ ମଞ୍ଚାସୀନ ଥିଲେ। ସମ୍ମିଳନୀରେ ନୂତନ ଜାତୀୟ ଶିକ୍ଷାନୀତିର କାର୍ଯ୍ୟାନ୍ବୟ, ଗୁଣାତ୍ମକ ଶିକ୍ଷାର ପ୍ରସାର ଏବଂ ମାତୃଭାଷା ଆଧାରିତ ଶିକ୍ଷା ବ୍ୟବସ୍ଥା ଉପରେ ବିସ୍ତୃତ ଆଲୋଚନା ହୋଇଥିଲା। ସଂସଦ ପକ୍ଷରୁ ଜଣାଯାଇଥିଲା ଯେ, ୨୦୨୨ରୁ ୨୦୨୬ ପର୍ଯ୍ୟନ୍ତ ବିଭିନ୍ନ ସାହିତ୍ୟ ଓ ଶିକ୍ଷାକ୍ଷେତ୍ରରେ ଆୟୋଜିତ କାର୍ଯ୍ୟକ୍ରମ ମାଧ୍ୟମରେ ରାଜ୍ୟସ୍ତରରେ ୯୧ଟି କାର୍ଯ୍ୟକ୍ରମ ସଫଳତାର ସହ ଆୟୋଜନ କରାଯାଇଛି ଏବଂ ବହୁ ପ୍ରତିଭାଙ୍କୁ ସମ୍ମାନିତ କରାଯାଇଛି।

ସମ୍ମାନିତ ଶିକ୍ଷକ ପ୍ରଶାନ୍ତ ସରଦାର ଦୀର୍ଘ ବର୍ଷ ଧରି ଶିକ୍ଷାଦାନ କ୍ଷେତ୍ରରେ ନିଷ୍ଠା ଓ ଆଦର୍ଶର ସହ କାର୍ଯ୍ୟ କରୁଛନ୍ତି। ଗୁଣାତ୍ମକ ଶିକ୍ଷା ପ୍ରଦାନ ସହ ଛାତ୍ରଛାତ୍ରୀଙ୍କୁ ସାମାଜିକ ଓ ନୈତିକ ମୂଲ୍ୟବୋଧରେ ଦୃଢ଼ କରିବାରେ ସେ ଉଦ୍ୟମୀ। ଗରିବ ଓ ମେଧାବୀ ଛାତ୍ରଛାତ୍ରୀଙ୍କୁ ନିଶୁଳ୍କ ଶିକ୍ଷାଦାନ, ସାହିତ୍ୟ ସୃଷ୍ଟି, ଲୋକସାଂସ୍କୃତିକ କାର୍ଯ୍ୟରେ ସକ୍ରିୟ ଭାଗୀଦାରି ଓ ପରିବେଶ ସୁରକ୍ଷା ପ୍ରତି ସଚେତନତା ସୃଷ୍ଟି ତାଙ୍କ ଅବଦାନକୁ ଅଧିକ ଉଜ୍ଜ୍ୱଳ କରିଛି। ଅତିଥିବୃନ୍ଦ ତାଙ୍କ ଶିକ୍ଷାସେବାର ପ୍ରଶଂସା କରି କହିଥିଲେ ଯେ, ଏମିତି ଆଦର୍ଶ ଶିକ୍ଷକମାନେ ରାଷ୍ଟ୍ର ଗଠନର ମୂଳ ଭିତ୍ତି। ସମାରୋହର ଶେଷରେ ସଂସଦ ପକ୍ଷରୁ ସମ୍ମାନପତ୍ର ଓ ଉପହାର ପ୍ରଦାନ କରାଯାଇଥିଲା।

ସମାରୋହଟି ଓଡ଼ିଆ ଭାଷା, ସାହିତ୍ୟ ଓ ଜଗନ୍ନାଥ ସଂସ୍କୃତି ପ୍ରତି ଅର୍ପିତ ଭାବନାର ଏକ ଉଜ୍ଜ୍ୱଳ ପ୍ରତିଫଳନ ବୋଲି ଅତିଥିମାନେ ମତ ପ୍ରକାଶ କରିଥିଲେ।